މިނިވަންކުރަން އިސްރާއީލުން ހުށަހަޅާފައިވާ ރަހީނުންގެ ލިސްޓަށް ހަމާސްއިން ރުހުން ދީފައިވާ ކަމަށް ހަމާސްގެ އޮފިޝަލަކު ބުނެފިއެވެ.
މިނިވަންކުރަން އިސްރާއީލުން ވަނީ 34 ރަހީނުންގެ ނަން ހުށަހަޅާފައެވެ. އެއީ، އިސްރާއީލާ އެކު ހަދަން މަސައްކަތްކުރާ ހަނގުރާމަ ހުއްޓާލުމުގެ އެއްބަސްވުމުގެ ފުރަތަމަ މަރުހަލާގައި މިނިވަންކުރާ 34 ރަހީނުންނެވެ.
ލިސްޓް ފައިނަލްކުރި ނަމަވެސް ރަހީނުން މިނިވަންކުރާނީ އިސްރާއީލު ސިފައިން ޣައްޒާއިން ފައިބައި ދާއިމީކޮށް ހަނގުރާމަ ހުއްޓާލުމާ ގުޅޭ އެއްބަސްވުމަކަށް އައުމުން ކަމަށް އޮފިޝަލް ވަނީ ބުނެފައެވެ.
އިސްރާއީލުގެ ބޮޑުވަޒީރު ބެންޖަމިން ނަތަންޔާހޫގެ އޮފީހުން އެ ކަމަށް ރައްދުދީ ބުނީ، ހަމާސްއިން އެ ލިސްޓެއް މި ވަގުތާ ހަމައަށް ވެސް ފޯރުކޮށްދީފައިނުވާ ކަމަށެވެ.
ހަނގުރާމަ ނިމުމަކަށް ގެނައުމަށް އެއްބަސްވުމަކަށް އައުމަށް ގަތަރާއު މިސްރު އަދި އެމެރިކާ މެދުވެރިވެގެން މަޝްވަރާ ކުރާތާ މަސައްކަތްކުރާތާ އެތައް މަހެއް ވެއްޖެއެވެ. މެދުކެނޑުމަކަށް ފަހު، ނުސީދާ ގޮތެއްގައި އަނެއްކާ ވެސް މިހާރު ވަނީ މަޝްވަރާތައް އަލުން ފަށާފައެވެ.
އިސްރާއީލުގެ ހަމަލާތަކަށް 15 މަސް ދުވަސްވެފައިވާއިރު، މި މުއްދަތުގެ ތެރޭގައި ހަމަލާތައް މެދުކަނޑާލީ އެންމެ ފަހަރަކުއެވެ. އެއީ، 2023 ވަނަ އަހަރުގެ ނޮވެމްބަރު މަހު އެއް ހަފުތާއަށެވެ. އެ ފަހަރު އިސްރާއީލުގެ ޖަލުތަކުން ފަލަސްތީނުގެ 240 މީހުންނާ އެކު އިސްރާއީލުގެ 80 ރަހީނަކު ވަނީ މިނިވަންކޮށްފައެވެ.
ހަމާސްއިން އިސްރާއީލުގެ 251 މީހަކު ރަހީނުކޮށްފައިވާއިރު އޭގެ ތެރެއިން 96 މީހުން ޣައްޒާގައި އެބަތިއްބެވެ. އޭގެ ތެރެއިން 34 މީހުން މަރުވެފައިވާ ކަމަށް އިސްރާއީލުގެ އަސްކަރިއްޔާއިން ވަނީ ބުނެފައެވެ.
އިސްރާއީލުން ޣައްޒާއަށް ދެމުންގެންދާ ހަމަލާތައް އަދިވެސް ކުރިއަށްގެންދާއިރު، އާދީއްތަ ދުވަހު ދިން ވަކިވަކިން ދިން ތިން ވައިގެ ހަމަލާއެއްގައި ފަލަސްތީނުގެ 14 މީހަކު މަރުވެފައިވާއިރު، ހަފުތާ ބަންދުގައި މަރުވި މީހުންގެ އަދަދު 102 އަށް އަރާފައިވާ ކަމަށް ފަލަސްތީނުގެ ސިއްޚީ ވުޒާރާއިން ބުނެއެވެ.
ސިއްހީ އޮފިޝަލުން ބުނީ، ޣައްޒާގެ މެދުތެރޭގެ އަލް ނުސެއިރާތު ކޭމްޕްގައި ހުރި ގެއަކަށް އިސްރާއީލުން ދިން ވައިގެ ހަމަލާއެއްގައި ފަސް މީހުން މަރުވެފައިވާއިރު، ގައްޒާގެ އުތުރުގައި އޮންނަ ޖަބަލިއާއަށް ދިން އިތުރު ވައިގެ ހަމަލާއެއްގައި ހަތަރު މީހަކު މަރުވެފައިވާ ކަމަށެވެ.
އާދީއްތަ ދުވަހު އިސްރާއީލުން ދިން އިތުރު ވައިގެ ހަމަލާއެއްގައި ޣައްޒާގެ ދެކުނުގެ ޚާން ޔޫނިސްގައި ހުންނަ ޕޮލިސް ސްޓޭޝަނަކަށް އަމާޒުވެ، ފަސް މީހަކު މަރުވެފައިވާ ކަމަށްވެސް ސިއްޚީ ވުޒާރާއިން ވަނީ ހާމަކޮށްފައެވެ. އެގޮތުން، 24 ގަޑިއިރު ތެރޭގައި ގާތްގަޑަކަށް 88 މީހުން ޝަހީދުކޮށްލައި 200 އެއްހާ މީހުން ޒަޚަމުކޮށްލާފައިވާ ކަމަށް ސިއްޚީ ވުޒާރާއިން ހާމަކުރެއެވެ.
މިދިޔަ 2023 ވަނަ އަހަރުގެ އޮކްޓޫބަރު މަހުގެ ހަތްވަނަ ދުވަހުން ފެށިގެން އިސްރާއީލުން ޣައްޒާއަށް ދެމުންގެންދާ ހަމަލާތަކުގައި މިހާތަނަށް 45،805 މީހުން ވަނީ ޝަހީދުކޮށްލާފައެވެ.