ރާއްޖޭގައި ފުޅާ ދާއިރާއެއްގައި ހަށިވިއްކުމުގެ ވިޔަފާރިކުރި ކަމަށް ތުހުމަތުކުރެވޭ ބިދޭސީން ހޯދަން އިމިގްރޭޝަނާއި ފުލުހުން ގުޅިގެން ހިންގި ޚާއްސަ އޮޕަރޭޝަންތަކެއްގައި ބިދޭސީންތަކެއް އިމިގްރޭޝަންގެ ބެލުމުގެ ދަށަށް ގެންގޮސްފިއެވެ.
އިމިގްރޭޝަންގެ ބެލުމުގެ ދަށަށް ގެންގޮސްފައިވަނީ ބިދޭސީ ހަތަރު އަންހެނަކާއި ތިން ފިރިހެނެކެވެ.
މި މައްސަލަތައް އިތުރަށް ތަހުގީގުކުރުމަށް ފަހު ރާއްޖެ އަނބުރާ ނާދެވޭ ގޮތަށް މީގެ ތެރެއިން ދެ އަންހެނަކު މިހާރު ޑީޕޯޓުކޮށްފައިވާ ކަމަށާއި ބާކީ ފަސް ބިދޭސީން ޑިޕޯޓުކުރުމުގެ މަސައްކަތް ކުރަމުންދާ ކަމަށް އިމިގްރޭޝަނުން ވަނީ ބުނެފައެވެ.
އިމިގްރޭޝަނުން ވަނީ މީގެ ކުރިން ވެސް ހަށިވިއްކުމުގެ ވިޔަފާރިކުރި ބިދޭސީންތަކެއް އަތުލައިގަނެ ޑީޕޯޓުކޮށްފައެވެ.
މި ސަރުކާރުން ދަނީ ގަވާއިދާ ޚިލާފަށް އުޅޭ ބިދޭސީން އަތުލައިގަތުމަށް ޚާއްސަ އޮޕަރޭޝަންތައް ކުރިއަށް ގެންދަމުންނެވެ. އަދި، ހަށި ވިއްކާ ބިދޭސީން އަތުލައިގަތުމަށް ވެސް އޮޕަރޭޝަންތައް ކުރިއަށް ގެންދެއެވެ.
މި ސަރުކާރަށް އަހަރެއްވީއިރު ރާއްޖޭގައި ގަވާއިދާ ހިލާފަށް އުޅޭ 5،000 އަށްވުރެ ގިނަ ބިދޭސީން ވަނީ ޑީޕޯޓުކޮށްފައެވެ.