ޣައްޒާގެ އުތުރުގައި އޮންނަ އިންޑޮނޭޝިއާ ހޮސްޕިޓަލުގެ ޚިދުމަތް މެދުކެނޑި މިހާރު ބަލި މީހުން ނުވަތަ ޒަޚަމްވާ މީހުންނަށް ފަރުވާ ނުދޭ ކަމަށް ޣައްޒާގެ ސިއްޚަތާބެހޭ ވުޒާރާއިން ބުނެފިއެވެ.
އެ ވުޒާރާއިން ފާހަގަކުރި ގޮތުގައި ޣައްޒާގެ އުތުރުގައި އާންމު ތިން ހޮސްޕިޓަލް ކަމަށްވާ ކަމާލް އަދުވާން، ބެއިތް ހަނޫން އަދި އިންޑޮނޭޝިއާ ހޮސްޕިޓަލް ހުރިއިރު، އެ ތިން ހޮސްޕިޓަލްގެ ޚިދުމަތްވެސް މިހާރު ވަނީ އިސްރާއީލުގެ ހަމަލާތަކުގެ ސަބަބުން މެދުކެނޑިފައެވެ.
ގެދޮރު ގެއްލިފައިވާ އެތައް ސަތޭކަ ބަޔަކު ހިޔާވަހިކަން ހޯދައިގެންތިބި ބެއިތް ލައްހިއްޔާގައި ހުންނަ އިންޑޮނޭޝިއާ ހޮސްޕިޓަލް އިސްރާއީލުން ވަށާލީ ހުކުރު ދުވަހުއެވެ.
ބައިތު ލަހިއްޔާގައި ހުންނަ ކަމާލް އަދުވާން ހޮސްޕިޓަލުގައި ބަލިމީހުންނާއި މުވައްޒަފުން ނެރެ، އެ ހޮސްޕިޓަލް ވަނީ މިދިޔަ ހަފްތާގައި އިސްރާއީލު ސިފައިން ވަރަށް ބޮޑަށް އަންދާލާފައެވެ. އެ ހޮސްޕިޓަލުގެ ޑިރެކްޓަރު ހުސާމް އަބޫ ސާފިޔާ ވެސް ވަނީ މިދިޔަ ހަފުތާ ހައްޔަރުކޮށްފައެވެ.
އުމުރުން 51 އަހަރުގެ އަބޫ ސާފިޔާއާ ބެހޭ އެއްވެސް މައުލޫމާތެއް އެ އިދާރާއަށް ލިބިފައި ނުވާ ކަމަށް ހޮނިހިރު ދުވަހު ދުނިޔޭގެ ސިއްޚަތު ޖަމިއްޔާ (ޑަބްލިއުއެޗްއޯ) ގެ ވެރިޔާ ޓެޑްރޯސް އަދަނޮމް ގެބްރެއިސަސް އެކްސްގައި ލިޔުއްވިއެވެ.
ޖަބަލިއާގައި ހުންނަ އަލް އައުދާ ހޮސްޕިޓަލަށް ވެސް ވަކިން އަމުރެއް ނެރެފައިވާ ކަމަށް އަލް ޖަޒީރާއިން ރިޕޯޓުކޮށްފައިވެއެވެ.
ޣައްޒާގެ ސިއްޚީ ނިޒާމު ފުނޑު ފުނޑުކޮށްލުމަށް އިސްރާއީލު ސިފައިން ތަކުރާރުކޮށް ދިން ހަމަލާތަކުގެ ތެރޭގައި މިދިޔަ ހަފުތާގައި ކަމާލް އަދުވާން ހޮސްޕިޓަލަށް ދިން ހަމަލާވެސް ހިމެނެއެވެ. ދެހާސް ތޭވީސް ވަނަ އަހަރުގެ އޮކްޓޯބަރު މަހުން ފެށިގެން އިސްރާއީލުން ތަކުރާރުކޮށް ދިން ހަމަލާތަކުގެ ސަބަބުން އިންޑޮނޭޝިއާގެ ހޮސްޕިޓަލާއި އަލްއައުދާ ހޮސްޕިޓަލަށް ވެސް ވަނީ ގެއްލުންތަކެއް ލިބިފައެވެ.
އިސްރާއީލުން އިންޑޮނޭޝިއާ ހޮސްޕިޓަލަށް މީގެކުރިން ދިން ހަމަލާއެއްގައި އެތައް ބަޔަކު ޒަޚަމްވެފައި. ފޮޓޯ/ރޮއިޓާސް
އަދި ހޮސްޕިޓަލްތަކުގެ މުވައްޒަފުންނާއި ރެޑް ކްރެސެންޓް ފަދަ އިންސާނީ އެހީތެރިކަން ފޯރުކޮށްދޭ ޖަމިއްޔާތަކާ ދެމެދު އެއްވެސް ކަހަލަ މުއާމަލާތެއް ކުރުން އިސްރާއީލުގެ ކަމާބެހޭ ފަރާތްތަކުން ހުއްޓުވާފައިވާ ކަމަށް އަލް ޖަޒީރާއިން ރިޕޯޓުކޮށްފައިވެއެވެ.
ސިއްޚީ ޚިދުމަތްދޭ ތަންތަނަށް ދޭ ހަމަލާތައް ދިފާއުކޮށް އިސްރާއީލު ބުނީ އެތަންތަނަށް ހަމަލާ ދެނީ ފަލަސްތީނުގެ ހަތިޔާރު އެޅި ޖަމާއަތްތަކުން ބޭނުންކުރާ ތަންތަން ކަމަށް ވާތީ ކަމަށެވެ. އެކަމުގެ ހެކި ފޯރުކޮށްދިނުމަށް އދ ން ތަކުރާރުކޮށް ވަނީ އެދިފައެވެ.
އިސްރާއީލުން ޣައްޒާގެ ހޮސްޕިޓަލްތަކަށް އަމާޒުކޮށް ދޭ ހަމަލާތަކާ ގުޅިގެން އދ.ގެ ސަލާމަތީ މަޖިލީހުން ހުކުރު ދުވަހު ވަނީ ކުއްލި ބައްދަލުވުމެއްވެސް ބާއްވާފައެވެ.
މި ބައްދަލުވުމުގައި އދގެ އިންސާނީ ހައްގުތަކާ ބެހޭ ވެރިޔާ ވޯލްކާ ޓާކް ވިދާޅުވީ ޣައްޒާގައި ހަނގުރާމަވެރިން ހޮސްޕިޓަލްތައް ބޭނުން ކުރަމުންދާ ކަމަށް އިސްރާއީލުން ބުނާ ގިނަ ވާހަކަތައް ސާބިތު ކުރެވިފައިނުވާ ކަމަށެވެ. އަދި އެއީ އެއްވެސް ވަރަކަށް ސާފުނުވާ ތުހުމަތުތަކެއް ކަމަށާއި ތުހުމަތުތަކަކީ ބައެއް ހާލަތްތަކުގައި އާންމުކޮށް ލިބެން ހުންނަ މައުލޫމާތާ ފުށުއަރާ ތުހުމަތުތަކެއް ކަމަށްވެސް ޓާކް ވިދާޅުވިއެވެ.
އދގެ ހައިކޮމިޝަނާ ފޯ ހިއުމަން ރައިޓްސްގެ ދާދި ފަހުން ނެރުނު ރިޕޯޓެއްގައި ބުނެފައިވާ ގޮތުގައި ފާއިތުވި އަށް މަސް ދުވަހުގެ ތެރޭގައި އިސްރާއީލުގެ ސިފައިން ވަނީ ގާތްގަނޑަކަށް 27 ހޮސްޕިޓަލަކާއި 12 މެޑިކަލް ފެސިލިޓީއަކަށް 136 އަށް ވުރެ ގިނަ ވައިގެ ހަމަލާދީފައެވެ.
މިދިޔަ އަހަރުގެ އޮކްޓޫބަރު 7 ވަނަ ދުވަހުން ފެށިގެން އިސްރާއީލުން ޣައްޒާއަށް ދެމުންގެންދާ ހަމަލާތަކުގައި މިހާތަނަށް ފަލަސްތީނުގެ 45،658 މީހުން ވަނީ ޝަހީދުކޮށްލާފައެވެ. ހަމަލާތަކުގައި ޒަޚަމްވި މީހުންގެ އަދަދު 108،583 އަށް ވަނީ އުފުލިފައެވެ.