ގިނެސް ވޯލްޑް ރެކޯޑްސްއިން ދުނިޔޭގެ އެންމެ ދުވަސްވީ މީހާގެ ގޮތުގައި ފާހަގަކޮށްފައިވާ ޖަޕާނުގެ ޓިމީކޯ އިޓޫކާ އުމުރުން 116 އަހަރުގައި މަރުވެއްޖެއެވެ.
އިޓޫކާ މަރުވީ ޖަޕާނުގެ ހިޔޯގޯ ޕްރިފެކްޗާގެ އާޝިޔާ ސިޓީގެ ނާސިން ހޯމެއްގައި ކަމަށް ކަމާބެހޭ ފަރާތްތަކުން ވަނީ ހާމަކޮށްފައެވެ.
ދުނިޔޭގެ އެންމެ ދުވަސްވީ މީހާއަށް އޭނާ ވެގެން ދިޔައީ ސްޕެއިންގެ މާރިއާ ބްރަނިއާސް މޮރެރާ އުމުރުން 117 އަހަރުގައި 2024 ވަނަ އަހަރުގެ އޮގަސްޓް މަހު މަރުވުމުންނެވެ.
"އިޓޫކާ އޭނާގެ ދިގު އުމުރުގެ ތެރެއިން އަހަރެމެންނަށް ދިނީ ހިތްވަރާއި އުންމީދު. އެކަމަށްޓަކައި އޭނާއަށް ޝުކުރު އަދާކުރަން." އިޓޫކާ މަރުވުމާ ގުޅިގެން އާޝިޔާގެ މޭޔަރު ރިއޯސޫކޭ ޓަކާޝިމާ ނެރުނު ބަޔާނެއްގައި ވިދާޅުވިއެވެ.
އިޓޫކާ އުފަންވީ 1908 ވަނަ އަހަރުގެ މެއި މަހުއެވެ. އެއީ ފުރަތަމަ ބޮޑު ހަނގުރާމައިގެ ހަ އަހަރު ކުރިއެވެ. އަދި އެ އަހަރަކީ އެމެރިކާގައި ފޯޑް މޮޑެލްގެ ޓީ ކާރު ނެރުނު އަހަރެވެ.
ދުނިޔޭގެ އެންމެ ދުވަސްވީ މީހާގެ ގޮތުގައި 2024 ވަނަ އަހަރުގެ ސެޕްޓެމްބަރު މަހު އީޓޫކާއަށް ވަނީ ޖަޕާނުގެ އުމުރުން ދުވަސްވީ މީހުންނަށް ދޭ ޝަރަފުވެރިކަން ދިނުމަށް ކޮންމެ އަހަރަކު ފާހަގަކުރާ "ރެސްޕެކްޓް ފޯ ދަ އޭޖެޑް ޑޭ" ގައި ރަސްމީކޮށް ދުނިޔޭގެ ރެކޯޑު ފޮތުގެ ސެޓްފިކެޓް ހަވާލުކޮށްފައެވެ.
ތައުލީމު ހާސިލުކުރިއިރު، ދަރިވަރެއްގެ ގޮތުގައި ވޮލީ ކުޅެ، 3،067 މީޓަރު (10،062 ފޫޓު) ގެ މައުންޓް އޮންޓޭކް އަށް ދެ ފަހަރު އިޓޫކާ އެރިއެވެ.
ގިނެސް އިން ބުނާ ގޮތުގައި އިޓޫކާ ވަނީ އުމުރުން 20 އަހަރުގައި ކައިވެނި ކޮށްފައެވެ. އެ ކައިވެންޏަށް ދެ އަންހެން ކުދިންނާއި ދެ ފިރިހެން ކުދިން ލިބިފައިވެއެވެ.
ދެވަނަ ބޮޑު ހަނގުރާމައިގެ ދުވަސްވަރު އޭނާ ވަނީ ފިރިމީހާގެ ޓެކްސްޓައިލް ފެކްޓްރީގެ އޮފީސް ބަލަހައްޓާފައެވެ. 1979 ވަނަ އަހަރު ފިރިމީހާ މަރުވުމުން އިކޫޓާ ދިރިއުޅެމުންދިޔައީ އެކަންޏެވެ.
އިކޫޓާ މަރުވިއިރު، ފިރިހެން ދަރިއަކާއި އަންހެން ދަރިއެއްގެ އިތުރުން ފަސް މާމަ ދަރިން ދުނިޔޭގައި ތިއްބެވެ. އޭނާގެ ޖަނާޒާ ބާއްވާފައި ވަނީ އާއިލާ އާއި ރައްޓެހިންނާއެކު ކަމަށް އޮފިޝަލުން ބުނެއެވެ.
މިދިޔަ އަހަރުގެ ސެޕްޓެމްބަރު މަހުގެ ނިޔަލަށް ޖަޕާނުގައި 100 އަހަރުން މަތީގެ 95،000 އަށް ވުރެ ގިނަ މީހުން ތިބި ކަމަށާއި އޭގެ ތެރެއިން 88 އިންސައްތަ މީހުންނަކީ އަންހެނުން ކަމަށް ބީބީސީން ރިޕޯޓުކޮށްފައިވެއެވެ.
އެ ގައުމުގެ 124 މިލިއަން މީހުންގެ ތެރެއިން ގާތްގަނޑަކަށް ތިންބައިކުޅަ އެއްބައި މީހުންނަކީ 65 އަހަރުން މަތީގެ މީހުންނެވެ.
އިޓޫކާ އަށް ފަހު 16 ދުވަސް ފަހުން އުފަންވި އަދި އުމުރުން 116 އަހަރުގެ ބްރެޒިލްގެ ނަންނާ އިނާ ކަނާބަރޯ ލޫކަސް އަކީ މިހާރު ދުނިޔޭގެ އެންމެ ދުވަސްވީ މީހާ ކަމަށް ބެލެވެއެވެ.
މިހާތަނަށް ރެކޯޑްކުރެވުނު އެންމެ ދުވަސްވީ މީހާއަކީ ޖީން ލޫއީސް ކެލްމާއެވެ.
އަށާރަ ސަތޭކަ ހަތްދިހަ ފަސް ވަނަ އަހަރުގެ ފެބްރުއަރީ މަހުގެ 21 ވަނަ ދުވަހު އުފަންވި ކެލްމާ ނިޔާވިއިރު، އުމުރަކީ 122 އަހަރާއި 164 ދުވަސް ކަމަށް ގިނެސް ވޯލްޑް ރެކޯޑްސްއިން ބުނެއެވެ.