މުޅި ރާއްޖެއަށް މިހާރު ކުރަމުންދާ ވިއްސާރައިގައި މުޅި މާލޭގައި އެއްކޮށް ފެންބޮޑުވެއްޖެއެވެ.
މެދުކެނޑުމެއް ނެތި ބޯކޮށް ވާރޭ ވެހުމާއެކު މާލޭގައި ފެންބޮޑުވެ، ބައެއް ގެތަކާއި ފިހާރަތަކަށް ވެސް ދަނީ ފެންވަދެ، އެކި ވަރުގެ ގެއްލުންތައް ވަމުންނެވެ. މީގެ އިތުރުން މަގުތުމަތީގައި ހުރި ބައެއް ވެހިކަލްތައް ވަނީ ވެއްޓިފައެވެ.
ހަމައެއާއެކު ހުޅުމާލޭގައި ވެސް ވަނީ ވަރަށް ބޮޑަށް ފެން ބޮޑުވެފައެވެ.
އެއާއެކު މަގުތަކުން ފެން ހިންދުމުގެ މަސައްކަތަށް އެމްއެންޑީއެފްގެ ފަޔަ އެންޑް ރެސްކިއު ސާވިސްއިންވަނީ މާލޭގެ ތިން ސަރަހައްދެއްގައި 11 ޕަމްޕެއް ބަހައްޓައިގެން މަސައްކަތް ފަށައިފައެވެ.
މާލޭގެ އިތުރުން، އަތޮޅު ތެރޭގެ ރަށްތަކުގައި ވެސް ވަރަށް ބޮޑަށް ފެންބޮޑުވެ، އެކިވަރުގެ ބޮޑެތި ގެއްލުންތައް ދަނީ ލިބެމުންނެވެ. އެ ގޮތުން ބައެއް ރަށްތަކަށް ރާޅު އަރައި، ދަނީ އުދައިގެ އަސަރު ކުރަމުންނެވެ. މި ގެއްލުންތައް ކުޑަކުރުމަށް ޓަކައި އެމްއެންޑީއެފުން ދަނީ އެ ރަށްތަކުގައި ހަރަކާތްތެރިވަމުންނެވެ.
އޭގެ ތެރޭގައި ކ. މާފުށި، ކ. ގުރައިދޫ، ދ. ކުޑަހުވަދޫ، ދ. މީދޫ، އދ. މާމިގިލި، ށ. ނަރުދޫ އަދި ފ. ނިލަންދޫ ހިމެނެއެވެ.
މޫސުން ގޯސްވެ، ބ. އަތޮޅުން ފެށިގެން ތ. އަތޮޅަށްވަނީ މިއަދުގެ 15:00އިން 23:00ގެ ނިޔަލަށް އޮރެންޖު އެލާޓު ވެސް ނެރެފައެވެ.