އިސްރާއީލުން ހަމަލާ ނުދޭނެ ކަމަށް އިއުލާނުކޮށްފައިވާ ޣައްޒާގެ ސަރަހައްދަކަށް ހަމަލާދީ, އެ ސަރަހައްދުގެ ހަމާސުން ހިންގާ ފުލުހުންގެ ވެރިޔާ މަހުމޫހު ޞަލާޙާއި އޭނާގެ ނައިބު އަދި އިތުރު ނުވަ މީހަކު ޝަހީދުކޮށްލައިފިއެވެ.
ޣައްޒާގެ ސިވިލް ޑިފެންސް އެޖެންސީން ބުނީ، ބުރާސްފަތި ދުވަހު އެ ސަރަހައްދުގެ އެހެން ތަންތަނުގައި އިސްރާއީލުން ދިން އިތުރު ދެ ހަމަލާއެއްގައި ފަލަސްތީނުގެ 14 މީހަކު ޝަހީދުވެފައިވާ ކަމަށެވެ.
އިސްރާއީލުގެ އަސްކަރިއްޔާއިން ވަނީ ޣައްޒާގެ ދެކުނުގައި އޮންނަ ޚާން ޔޫނިސް ސަރަހައްދަށް ރޭގަނޑު ހަމަލާ ދިންކަން ކަށަވަރުކޮށްދީފައެވެ. އެ ހަމަލާ އަމާޒުކުރީ އިސްރާއީލަށް ހަމަލާތައް ދޭން ރޭވި ކަމަށް ތުހުމަތުކުރެވޭ ހަމާސް ފުލުހުންގެ ނައިބު ހުސާމް ޝަހުވާނަށް ކަމަށް ވެސް އަސްކަރިއްޔާއިން ބުނެފައިވެއެވެ.
ސިވިލް ޑިފެންސް އެޖެންސީން ބުނީ، އެ ހަމަލާގައި ޝަހީދުވި 11 މީހުންގެ ތެރޭގައި ޝަހުވާނާއި ފުލުހުންގެ ވެރިޔާ މަހުމޫދު ވެސް ހިމެނޭ ކަމަށެވެ. ފުލުހުންގެ އިދާރާގެ ތަރުޖަމާނު މަހުމޫދު ބައްސާލް ވެސް ވަނީ މަރުވި މީހުންގެ ތެރޭގައި ފުލުހުންގެ އިސް ދެ އޮފިސަރުން ހިމެނޭކަން ކަށަވަރުކޮށްދެއްވާފައެވެ.
މީހުން ސަލާމަތްކުރުމަށްދިޔަ އެމްބިއުލާންސް ޑްރައިވަރު ސަލީމް އަބޫ ސުބާ ވިދާޅުވީ، ހަމަލާ ދިން ތަނުގައި ޒަޚަމުވި މީހުން ބިން މައްޗަށް ވެއްޓިފައި ތިބި ކަމަށާއި އޭގެ ތެރޭގައި ގިނައީ ކުޑަކުދިން ކަމަށެވެ. ދެ އަންހެނުން ވެސް ޝަހީދުވެފައިވާ ކަމަށް ޑްރައިވަ ބުނެފައިވެއެވެ.
އެ ސަރަހައްދުގައި ހަމާސުން ހިންގާ އިންޓީރިއާ މިނިސްޓްރީން ނެރުނު ބަޔާނެއްގައި ވަނީ އެ ދެ އިސް އޮފިސަރުން މަރާލި މައްސަލަ ކުށްވެރިކޮށް އެ މީހުން ތިބީ ރައްޔިތުންނަށް ޚިދުމަތްކުރުމުގައި އިންސާނީ އަދި ގައުމީ ވާޖިބު އަދާކުރުމުގައި ކަމަށް ބުނެފައެވެ.
މަހުމޫދަކީ 30 އަހަރު ފުލުހުންގެ ޚިދުމަތުގައި މަސައްކަތްކުރެއްވި ބޭފުޅެއް ކަމަށާއި، އޭނާ ފުލުހުންގެ ވެރިއަކަށް ހަމަޖެއްސީ މީގެ ހަ އަހަރު ކުރިން ކަމަށް ވެސް އެ ބަޔާނުގައި ބުނެފައިވެއެވެ.
ގާތްގަޑަކަށް 15 މަސް ދުވަސްވެފައިވާ ޣައްޒާ ހަނގުރާމައިގައި އިސްރާއީލުން މިހާތަނަށް ވަނީ ފަލަސްތީނުގެ 45،581 މީހުން ޝަހީދުކޮށްލާފައެވެ.