ވެނެޒުއޭލާގެ ސުޕްރީމް ކޯޓުން ޓިކްޓޮކްއަށް 10 މިލިއަން ޑޮލަރުގެ ޖޫރިމަނާއެއް ކޮށްފިއެވެ.
ވެނެޒުއޭލާއިން އެ ޖޫރިމަނާ ކޮށްފައިވަނީ، ޓިކްޓޮކްގައި މަޝްހޫރުވި ޗެލެންޖެއްގެ ސަބަބުން ތިން ކުޑަކުއްޖަކު މަރުވި ކަމަށް ތުހުމަތު ކުރެވޭ މައްސަލައިގައި އެކަށީގެންވާ ފިޔަވަޅުތަކެއް ނާޅާ ކަމަށް ބުނެއެވެ.
އެ މައްސަލަ ބެއްލެވި ފަނޑިޔާރު ޓާނިއާ ޑަމެލިއޯ ވިދާޅުވީ ޓިކްޓޮކުން އިހުމާލުވެފައިވާ ކަމަށާއި، ޖޫރިމަނާ ފައިސާ ދެއްކުމަށް އަށް ދުވަހުގެ މުއްދަތެއް ދީފައިވާ ކަމަށެވެ. އަދި ވެނެޒުއޭލާގެ ގާނޫނުތަކާ އެއްގޮތަށް ކޮންޓެންޓް ބެލެހެއްޓުމަށްޓަކައި އެ ގައުމުގައި އޮފީހެއް ހުޅުވުމަށްވެސް އަމުރުކޮށްފައިވެއެވެ.
ނަމަވެސް، ޗައިނާގައި އޮންނަ ކުންފުންޏަކުން ހިންގާ ޓިކްޓޮކުން މި ޖޫރިމަނާ ދެއްކުމަށް މަޖުބޫރުކުރާނެ ގޮތެއް ފަނޑިޔާރު ވިދާޅުވެފައެއް ނުވެއެވެ.
މީގެ ކުރިން ވެނެޒުއޭލާގެ ޓެލެކޮމިއުނިކޭޝަންސް ކޮމިޝަނުގެ ގަވާއިދުތަކާ ޚިލާފުވުމުގެ ސަބަބުން އެތައް ވެބްސައިޓެއް ބްލޮކްކޮށްފައިވެއެވެ.
މިދިޔަ ނޮވެމްބަރު މަހު ޓިކްޓޮކް ޗެލެންޖެއްގައި ބައިވެރިވެގެން 12 އަހަރުގެ އަންހެން ކުއްޖެއް މަރުވެފައިވާ ކަމަށް ތުހުމަތު ކުރައްވައިފައިވަނީ ވެނެޒުއޭލާގެ ރައީސް ނިކޮލަސް މަދޫރޯއެވެ.
އެ ގައުމުގެ ތަޢުލީމީ ވަޒީރު ހެކްޓ ރޮޑްރިގެޒް ވަނީ، 14 އަހަރުގެ ކުއްޖަކު ވެސް ޓިކްޓޮކް ޗެލެންޖެއްގައި ބައިވެރިވެގެން މަރުވެފައިވާ ކަމަށް ތުހުމަތުކުރައްވައިފައެވެ.
މީގެ އިތުރުން، ނޮވެމްބަރު 21 ގައި ވެނެޒުއޭލާގެ އެޓާނީ ޖެނެރަލް ވެސް ވަނީ، ޓިކްޓޮކް ޗެލެންޖެއްގައި ބައިވެރިވި އިތުރު ކުއްޖަކު މަރުވެފައިވާ ކަމަށް މަރުވެފައިވާ ކަމަށް ތުހުމަތު ކުރައްވައިފައެވެ.
މަދޫރޯގެ ވެރިކަމުގައި ވެނެޒުއޭލާގެ އެތައް ރޭޑިއޯ އަދި ޓީވީ ޗެނަލްތަކެއް ބަންދުކޮށްފައިވާއިރު، އެ ސަރުކާރުން ނޫސްވެރިކަމާއި ޚިޔާލު ފާޅުކުރުމުގެ މިނިވަންކަމަށް އަރައިގަންނަ ކަމަށް ހައްގުތަކަށް މަސައްކަތް ކުރާ ޖަމިއްޔާތަކުން ބުނެއެވެ. އެގޮތުން ވީ ސިން ފިލްޓްރޯ ނަމަކަށް ކިޔާ، ވެނެޒުއޭލާގެ މީޑިއާގެ މިނިވަންކަން ދިރާސާކުރާ ޖަމާއަތުން ބުނާ ގޮތުގައި މިދިޔަ އަހަރު އެކި ދުވަސްވަރު އިންސާނީ ޙައްގުތަކާބެހޭ ޖަމާޢަތްތަކާއި ޚަބަރު ފަތުރާ ކުންފުނިތަކުގެ 60 އަށްވުރެ ގިނަ ވެބްސައިޓް އެގައުމުގައި ބްލޮކްކޮށްފައިވެއެވެ.
އޯގަސްޓް މަހު، މަދޫރޯ އަލުން ރައީސްކަމަށް އިންތިޚާބުވުމާ ދެކޮޅަށް އެތައް ހާސް މީހުން މަގުމައްޗަށް ނުކުތުމާ ގުޅިގެން ވެނެޒުއޭލާއިން އެކްސް ބަންދުކުރިއެވެ.
ފުރަތަމަ 10 ދުވަހުގެ މުއްދަތަށް އެކްސް ބަންދުކުރި އިރު، މަދޫރޯ ވިދާޅުވެފައިވަނީ އެކްސްގެ ވެރިފަރާތް އީލޮން މަސްކް އެ ޕްލެޓްފޯމް ބޭނުންކޮށްގެން "ވެނެޒުއޭލާއަށް ހަމަލާދިނުމަށް ރާވަމުންދާ" ކަމަށެވެ.
މަސްކް ވިދާޅުވެފައިވަނީ ޖުލައި 28ގެ ބޭއްވި އިންތިޚާބުގައި މަދޫރޯ މަކަރުހަދައި އޮޅުވާލައިފައިވާ ކަމަށެވެ. އަދި އދ.އާއި ދުނިޔޭގެ އެކި ގައުމުތަކުގެ އިންތިޚާބުތައް މޮނިޓަކުރާ ކާޓާ ސެންޓަރުންވެސް ބުނެފައިވަނީ މި އިންތިޚާބު ބައިނަލްއަގްވާމީ މިންގަނޑުތަކަށް ނުފެތޭ ކަމަށެވެ.
ވެނެޒުއޭލާގައި މިހާރު އެކްސް ބޭނުންކުރެވެނީ އަމިއްލަ ފަރާތްތަކުން ހިންގާ އިންޓަނެޓް ޕްރޮވައިޑަރުތަކުގައެވެ. ނަމަވެސް ވެނެޒުއޭލާގެ ސަރުކާރުގެ އިންޓަނެޓް ޕްރޮވައިޑަ މޮވިލްނެޓްގައި އެކްސް އަދިވެސް އޮތީ ބްލޮކްކޮށްފައެވެ.