ދެކުނު ކޮރެއާގެ މުއާން އިންޓަނޭޝަނަލް އެއާޕޯޓަށް އާދީއްތަ ދުވަހު ވެއްޓުނު ޖެޖޫ އެއާ މަތިންދާ ބޯޓުން ހަމައެކަނި ސަލާމަތްވި ދެ ފްލައިޓް އެޓެންޑެންޓުން އެ ހިތާމަވެރި ހާދިސާ ހިނގިގޮތް ހަނދާން ނެތިފައިވާ ކަމަށް ދަ ކޮރެއާ ޓައިމްސްއިން ރިޕޯޓްކޮށްފިއެވެ.
އެ ދެމީހުން ސަލާމަތްކޮށް ހޮސްޕިޓަލަށް ގެންދިޔަ ނަމަވެސް ފަޔާ ޑިޕާޓްމަންޓުގެ އޮފިޝަލުން ހާމަކުރި ގޮތުގައި އެ ދެމީހުންނަށް ފުރާނައަށް ނުރައްކާވާ އެއްވެސް ހާލަތެއް ކުރިމަތިވެފައެއް ނުވެއެވެ.
ނަމަވެސް މޮކްޕޯ ކޮރެއާގެ ހޮސްޕިޓަލުގައި އޮތް އުމުރުން 32 އަހަރުގެ ލީއަށް ލިބުނު އަނިޔާތައް ސިފަކޮށްދިނުމަށް އެދުމުން އޭނާއަށް އެ ހާދިސާ ހަނދާކޮށް ކިޔައެއް ނުދެވުނެވެ. އޭނާ ހޮސްޕިޓަލަށް ގެނައީ ކިހިނެއްވެގެންތޯ ލީ ވަނީ ސުވާލުކޮށްފައެވެ.
ރިޕޯޓުތައް ބުނާ ގޮތުގައި ލީ ހަމައެކަނި ހުރީ ބޯޓު ޖެއްސުމުގެ ކުރިން ސީޓްބެލްޓް އެޅި ހަނދާނެވެ.
ހޮސްޕިޓަލުގެ އޮފިޝަލަކު ދަ ކޮރެއާ ޓައިމްސްއަށް ބުނީ ހަނދާން ނެތުމަކީ ޝޮކުގެ ސަބަބުން ވީ ކަމެއް ކަމަށް ވެދާނެ ކަމަށެވެ.
"ހީވަނީ އޭނާ ހުރީ ވަރަށް ބޮޑަށް ބިރުން ގަނެފައި ޕެނިކް ހާލަތުގައި." ބޯޓާއި ފަސިންޖަރުންގެ ސަލާމަތާ މެދު ކަންބޮޑުވެފައި ހުރުން އެކަށީގެންވޭ," އޮފިޝަލް ވިދާޅުވިއެވެ.
އެ ހާދިސާގެ ސަބަބުން ލީގެ ކަނާތު ކޮނޑު ބިންދައިގެން ގޮސް ބޮލަށް ވަނީ އަނިޔާވެފައެވެ. ފަހުން އޭނާ ވަނީ އާއިލާގެ އެދުމުގެ މަތިން ވެރިރަށް ސޯލްގެ ހޮސްޕިޓަލަކަށް ބަދަލުކޮށްފައެވެ.
އެ ނުރައްކާތެރި ހާދިސާއިން ސަލާމަތްވި އަނެއް ފްލައިޓް އެޓެންޑެންޓް ކަމަށްވާ އުމުރުން 15 އަހަރުގެ ކުވޮން، މޮކްޕޯ ސެންޓްރަލް ހޮސްޕިޓަލަށް ގެންދިޔައިރު ވެސް ބޯޓު ވެއްޓުނު ހާދިސާ ހަނދާނެއް ނެތެވެ.
ޑޮކްޓަރުން ބުނީ ކްވޮންގެ ބޮލުގެ ނާށިގަނޑު ފަޅައިގެން ގޮސްފައިވާ ކަމަށާއި، އަދި ފައިގެ ކުޑަހުޅަށް އަނިޔާވެ، ބަނޑަށް އަނިޔާތަކެއް ލިބިފައިވޭތޯ ބެލުމަށް ޓެސްޓުތައް ހަދަމުން އަންނަ ކަމަށެވެ.
ސަތޭކަ އަށްޑިހަ އެއް މީހަކާއެކު ދަތުރުކުރި އެ ބޯޓު ވެއްޓުނީ ރަންވޭއަށް ޖައްސަނިކޮށް ދޫނި ބައިގަނޑެއްގައި ޖެހި ލޭންޑިން ގިއަރުގައި މައްސަލައެއް ދިމާވެގެންނެވެ.
އޮފިޝަލުން ވިދާޅުވީ ދޫނިތަކެއް ބޯޓުގައި ޖެހުމާއި މޫސުން ގޯސްވުމަކީ މި އެކްސިޑެންޓުގެ ސަބަބު ކަމަށް މިހާތަނަށް ވަނީ ބެލެވިފައެވެ. ބޯޓުގައި 175 ފަސިންޖަރުންނާއި ހަ ކްރޫ ތިބި އިރު ސަލާމަތްވީ ދެ މީހުންނެވެ. ޖެޖޫ އެއާގެ އެ ބޯޓު ދަތުރުކުރަމުން ދިޔައީ ތައިލެންޑުގެ ބެންކޮކުން ފުރައިގެންނެވެ.
ދެކުނު ކޮރެއާގެ ލޭންޑް މިނިސްޓްރީން ބުނީ މި އެކްސިޑެންޓް ހިނގާފައިވަނީ އާދީއްތަ ދުވަހުގެ ހެނދުނު 9:03 (ޖީއެމްޓީ ގަޑިން މެންދަމު 12:03) ހާއިރު ޖެޖޫ އެއާގެ ފްލައިޓް 2216 ޖެއްސުމުގެ ތެރޭގައި ކަމަށެވެ.