ހުކުރު ދުވަހު، ރ. ފައިނު ގޮނޑުދޮށަށް ލައްގަފައި އޮތް މާވަހަރެއް މީހަކަށް ފެނި، ހޮވައިފިއެވެ.
މާވަހަރު ފެނިފައިވަނީ ޒުވާނާގެ ބޭބެ "ސަން"އަށް ބުނީ، އެ މާވަހަރު ފެނުނީ މިދިޔަ ހުކުރު ދުވަހު ހެނދުނު ކަމަށެވެ.
އެގޮތުން އެ ފެނުނީ އޭނާގެ އޭނާގެ ކޮއްކޮ އެ ދުވަހު ހެނދުނު ބީޗަށް ގޮސް އުޅެނިކޮށް ކަމަށް ވެސް ބުންޏެވެ. އެއީ މާވަހަރެކަމަށް ހީވުމުން، އޭގައި އަތްލައި، ބެލި ކަމަށް ވެސް އޭނާ ބުންޏެވެ.
"މާވަހަރެކޭ އެހެން ޝައްކުވީމާ، ގޫގުލްއިންނާއި، އިންޓަނެޓް މެދުވެރިކޮށް އެހެން ބަލަން ފެށީ. ދެން ޔަގީންވީމާ ގޯންޏަކަށް ލައިގެން ގެނައީ,"
އޭނާ ބުނީ، މާވަހަރެއްތޯ ޔަގީންކުރަން ޓެސްޓުކުރުމަށް ނުވިސްނާކަމަށެވެ. އެއީ ކުރިން އެ ފެނިފައި ހުރި މީހަކު، އެއީ މާވަހަރެއްކަމަށް ވަަރަށް ޔަގީންކަމާއެކު ބުނާތީ ކަމަށް އޭނާ ބުންޏެވެ.
ނަމަވެސް މިހާރު ވިސްނުމަކީ އެ މާވަހަރު ގަންނަން ބޭނުންވާ މީހަކު ހުރި ނަމަ އެ މީހަކަށް އެ ވިއްކައިލުން ކަމަށާއި، ގަންނަން ބޭނުންވާ މީހަކު ބޭނުންނަމަ އެ މީހަކު އެ ޓެސްޓުކުރަން ފުރުސަތު ދޭނެކަމަށް ބުންޏެވެ.
އަދި ވިއްކަން ވިސްނާ ވަކި އަގެއް ނެތް ކަމަށް ވެސް އޭނާ ބުންޏެވެ. އަގު ކަނޑައަޅާނީ މާކެޓު ރޭޓަށް ބަލައި، ގަންނަ މީހާއާ މަޝްވަރާކުރުމަށްފަހު ކަމަށް ވެސް ބުންޏެވެ.
ދޭތެރެ ދޭތެރެއިން ރާއްޖޭގެ އެކި ރަށްރަށަށް މާވަހަރު ލައްގައިފައި ހުއްޓައި މީހުންނަށް ފެނި އެ ހޮވައިފައި އެބަހުއްޓެވެ.