އެއާ ކެނެޑާ އެކްސްޕްރެސްގެ ފްލައިޓެއް, ހެލިފެކްސް ސްޓެންފީލްޑް އިންޓަނޭޝަނަލް އެއާޕޯޓަށް ޖައްސަން އުޅުމުގެ ތެރޭގައި އަލިފާން ރޯވެއްޖެއެވެ.
އެ ހާދިސާގައި އެއްވެސް މީހަކަށް އަނިޔާއެއް ލިބިފައިވާ ކަމަށް މިހާތަނަށް ރިޕޯޓުކޮށްފައެއްނުވެއެވެ.
އެ އެއާޕޯޓުން ނެރުނު ބަޔާނެއްގައި ބުނެފައި ވަނީ އަލިފާން ރޯވެފައި ވަނީ ކެނެޑާގެ ސިޓީއެއް ކަމަށްވާ ސެއިންޓް ޖޯންސްއިން ފުރިގައިގެން އައި ޕާލް އެއާލައިންސްއިން އޮޕަރޭޓް ކުރާ އެއާ ކެނެޑާ އެކްސްޕްރެސް ފްލައިޓެއްގައި ކަމަށެވެ. އެ ހާދިސާ ހިނގާފައި ވަނީ އިއްޔެ ރޭ ކެނެޑާ ގަޑިން 9:30 އެހާކަންހާއިރު ކަމަށް މީޑިއާތަކުން ރިޕޯޓުކޮށްފައިވެއެވެ.
އެއާ ކެނެޑާގެ ތަރުޖަމާނު ޕީޓާ ފިޓްސްޕެޓްރިކް ވިދާޅުވީ ބޯޓުގައި އަލިފާން ރޯވާން މެދުވެރިވީ ލޭންޑިން ގިއަރުގެ މައްސަލައެއްގައި ކަމަށް ބެލެވޭ ކަމަށެވެ.
އަލިފާން ރޯވުމުގެ ސަބަބުން ބޯޓުގައި ތިބި 73 ފަސިންޖަރުން ބާލައި ބަހަށް އަރުވާފައިވާ ކަމަށް ބޭރުގެ މީޑިއާތަކުން ރިޕޯޓުކޮށްފައިވެއެވެ.
އެ ހާދިސާއާ ގުޅިގެން އެއާޕޯޓުގެ ފްލައިޓް އޮޕަރޭޝަންތައް ވަނީ ވަގުތީ ގޮތުން މެދުކަނޑާލާފައެވެ.
މި ދުވަސްވަރު ފްލައިޓްތަކަށް އެކި މައްސަލަތައް ދިމާވެ, އެކިއެކި ހާދިސާތައް ހިނގުން ވަނީ އާއްމުވެފައެވެ. މިދިޔަ ހަފުތާގެ ތެރޭގައި ރަޝިއާގެ މިސައިލެއްގެ ސަބަބުން އަޒަރުބައިޖާންގެ ފްލައިޓެއް ވެއްޓި ގިނަ ބަޔަކު ވަނީ މަރުވެފައެވެ. އަދި ސަތޭކަ އަށްޑިހަ އެއް މީހުންނާއެކު ދަތުރުކުރި ދެކުނު ކޮރެއާގެ މަތިންދާބޯޓެއްވެސް އެ ގައުމުގެ މުއާން އެއާޕޯޓަށް އިއްޔެ ވެއްޓި 94 މީހުން މަރުވެފައިވާކަން ވަނީ ކަށަވަރުވެފައެވެ.
ދެކުނު ކޮރެއާގެ ނޫސް އެޖެންސީ، ޔޮންހަޕްއިން ރިޕޯޓްކޮށްފައިވާ ގޮތުގައި ބޯޓު ވެއްޓުނީ އެ ގައުމުގެ ހުޅަނގު ދެކުނުގައި އޮންނަ އެއާޕޯޓަށް މަތިންދާބޯޓު ޖައްސަން އުޅުމުގެ ތެރޭގައި ދޫނި ބައިގަނޑެއްގައި ޖެހި ލޭންޑިން ގިޔަރަށް މައްސަލަ ދިމާވެގެންނެވެ.