ސަލްމާން ޚާންގެ 59 ވަނަ އުފަންދުވަހާ ދިމާކޮށް ސަޕޯޓަރުންނަށް ގެނެސްދޭނެ ކަމަށް ވައުދުވި ފިލްމު "ސިކަންދަރު"ގެ ޓީޒާ ރިލީޒް ކޮށްފިއެވެ.
މިދިޔަ ހުކުރު ދުވަހު "ސިކަންދަރު"ގެ ޓީޒާ ގެނެސްދޭނެ ކަމަށް ވައުދުވި ނަމަވެސް މިދިޔަ ބުރާސްފަތި ދުވަހުގެ ރޭ އިންޑިއާގެ ކުރީގެ ބޮޑު ވަޒީރު މަންމޯހަން ސިންގް އަވަހާރަވުމާ ގުޅިގެން އެކަމުގެ ހިތާމައިގައި ބައިވެރިވުމުގެ ގޮތުން ސަލްމާން ވަނީ ހުކުރު ދުވަހު ފިލްމުގެ ޓީޒާ ނުނެރޭނެކަން އިއުލާނުކޮށްފައެވެ.
ސަލްމާންގެ އުފަންދުވަހުގެ ހަދިޔާއެއްގެ ގޮތުގައި ފިލްމު "ސިކަންދަރު"ގެ ޓީޒާ ދައްކާލުމާ އެކު ބެލުންތެރިން ވަނީ ފިލްމު ރިލީޒްކުރާނެ ތާރީޚަކަށް އިންތިޒާރު ކުރަމުން އަންނަ ކަމަށް ބުނެފައެވެ.
މި ފެށޭ އަހަރުގެ ފިޠުރު ޢީދު ދުވަހާ ގުޅުވައިގެން ސިނަމާތަކަށް ގެންނަން ތައްޔާރު ވަމުން އަންނަ ފިލްމު "ސިކަންދަރު" އަކީ ސާޖިދު ނަދިއަދުވާލާ ޕްރޮޑިއުސްކޮށް އޭއާރު މުރްގަދޯސް ޑައިރެކްޓްކުރާ ފިލްމެކެވެ. ސަލްމާން ޚާންއާ އެކު ފިލްމުގެ ބަތަލާ ރޯލްއިން ފެންނާނީ "އެނިމަލް" އަދި "ޕުޝްޕާ"ގެ ބަތަލާ ރަޝްމިކާ މަންދަންނާއެވެ.
ސަލްމާން ޚާން ފިލްމު "ސިކަންދަރު"ގެ ޕްރޮޑިއުސަރު ސާޖިދު ނަދިއަދުވާލާ އަދި ފިލްމުގެ ޑައިރެކްޓަރު އޭއާރު މުރްގަދޯސްއާ އެކު--ފޮޓޯ/ބޮލީވުޑްހަންގާމާ
މީގެއިތުރުން ސައުތު ސިނަމާގެ ބަތަލާ ކާޖަލް އަގަރްވާލް ފިލްމުގެ ވަރަށް މުހިއްމު ރޯލްއިން ފެންނާނެ ކަމަށް ރިޕޯޓުތައް ބުނެއެވެ. ސަލްމާން ވަނީ ސާޖިދު ނަދިއަދުވާލާ އެކު ފިލްމު "ކިކް"، "ޖުޅްވާ" އަދި "މުޖްސޭ ޝާދީ ކަރޯގީ" ފަދަ މަގުބޫލު ފިލްމުތަކުގައި އެކީގައި މަސައްކަތް ކޮށްފައެވެ.
ސަލްމާން ޚާން ލީޑް ރޯލްއިން އެންމެ ފަހުން ފެނިފައި ވަނީ މިދިޔަ އަހަރު ރިލީޒްވި ފިލްމު "ޓައިގާ 3"އިންނެވެ. ފިލްމު "ސިކަންދަރު"ގެ އިތުރުން ސަލްމާން ޚާން އަންނަނީ "ކިކް 2" އަދި ވައިއާރްއެފްގެ ސްޕައި ޔުނިވާސްގެ "ޓައިގާ ވާސަސް ޕަތާން"ގެ މަސައްކަތް ކުރަމުންނެވެ.