ރޭ ދަންވަރުގެ ވަގުތެއްގައި ހުޅުމާލެ ދެވަނަ ފިޔަވަހީގައި ސައިކަލަކާއި ފުލުސް ކާރެއް ޖެހި ހިނގި އެކްސިޑެންޓުގައި އަނިޔާވި ޒުވާނާގެ ހާލު ސީރިއަސް ކަމަށް ފުލުހުން ބުނެފިއެވެ.
މިކަމާ ގުޅޭގޮތުން ފުލުހުން މީޑިއާތަކާ ހިއްސާކުރި މެސެޖެއްގައި ބުނީ އެކްސިޑެންޓް ހިނގައިދިޔައީ ރޭ ދަންވަރު، 01:50 ހާއިރު ހުޅުމާލެ ފޭސް ދޭއްގައި ކަމަށެވެ.
އަދި މި ހާދިސާގައި 18 އަހަރުގެ ފިރިހެން ކުއްޖަކަށް އަނިޔާވެފައިވާ ކަމަށް ފުލުހުން ބުންޏެވެ. އަދި އެ ޒުވާނާގެ ހާލު ސީރިއަސްކަމަށް ހުޅުމާލެ ހޮސްޕިޓަލުން ފުލުހުންނަށް މައުލޫމާތު ދީފައިވާ ކަމަށް ވެސް ފުލުހުން ބުންޏެވެ.
ނަމަވެސް އެކްސިޑެންޓް ހިނގައިދިޔަ ގޮތުގެ އިތުރު ތަފްސީލެއް ފުލުހުން ހިއްސާކޮށްފައެއް ނުވެއެވެ.
"ސަން" އަށް ލިބުނު ފޮޓޯ/ ވީޑިއޯތަކުން ފެނުނު ގޮތުގައި އެކްސިޑެންޓުވި ސައިކަލު ވަނީ ވަރަށް ބޮޑަށް ހަލާކުވެފައެވެ. އަދި ސައިކަލުގެ ބައިތައް ނެއްޓި މަގުމައްޗަށް ބުރާފައި ހުއްޓެވެ.
އެކްސިޑެންޓުވި ފުލުސް ކާރުގެ ކުރީކޮޅަށް ވެސް ގެއްލުންތަކެއް ލިބިފައިވާކަން ފާހަގަކުރެވެއެވެ.