ކޮންމެ އަހަރެއްގައި ވެސް މަގުބޫލުވާ ތަފާތު ކުލަތަކެއް ހުރެއެވެ. އެހެން އަހަރުތަކުގައި އާންމުކޮށް ތަފާތު ކުލަތައް މަގުބޫލުވާ ކުލަތައް ހިމެނެއެވެ. އެކަމު މި ފަހަރު އެއް ކުލައެއްގެ އެކި ވޭރިއޭޝަންތައް މަގުބޫލުވެގެންދިޔައީ ހީވެސް ނުކުރާ ކަހަލަ ގޮތަކަށެވެ. މި އަހަރުގެ އެންމެ މަގުބޫލު ކުލައަކީ އެކި ކަހަލަ ފެހި ކުލަތަކެވެ.
މި އަހަރުގެ ސިޔާސީ މާހައުލުން ވެސް އަދި އާންމު ދިރިއުޅުމުން ވެސް އެންމެ އާންމުކޮށް ފެނިގެން ގޮސްފައިވަނީ ފެހި ކުލައެކެވެ.
އިނގިރޭސިވިލާތުގެ މަޝްހޫރު ލަވަކިޔުންތެރިޔާ ޗާލީއެކްސްސީއެކްސްގެ އާ ސްޓޫޑިއޯ އަލްބަމް "ބްރެޓް"އާ އެކު އޭނާ އާންމުކޮށްފައިވަނީ ވަރަށް އާދައިގެ ކަވަރެކެވެ. އެއީ, އަލިގަދަ ފެހި ކުލައެކެވެ. އެއަށް ފަހު މާ ގިނަ އެއްޗެއް ކަވަރުގައި ވެސް ނެތެވެ. މާ ގިނަ ދުވަސްތަކެއްނުވެ މި ފެހި ކުލަ ހުރިހާ ތަންތަނަކުން ފެންނަން ފަށައިފިއެވެ. ބޮޑެތި ބްރޭންޑުތަކުން ވެސް މި ފެހި ކުލަ "ބްރެޓް" ފެހި ކުލައިގެ ގޮތުގައި ގުޅުވައިގެން ބޭނުން ކުރަން ފެށިއެވެ.
ހޯމް ޑެކޯ އަށް ފެހި ކުލަ ބޭނުން ކުރާ މިންވަރު ވެސް ވަނީ މިއަހަރު އެތައް ގުނައަކުން އިތުރު ވެފައި
މި ފެއްސަށް އެންމެ ބޮޑު ކާމިޔާބަކަށްވީ އެމެރިކާގެ ރިޔާސީ އިންތިޚާބަށް ބްރެޓް ފޯރި ހިސާބުންނެވެ. "ބްރެޓް" ސްލޯގަންއާ އެކު ނައިބު ރައީސް އަދި ކެނޑިޑޭޓް ކަމާލާ ހެރިސްގެ ކެމްޕެއިންގައި ވެސް ބްރެޓް ފެހި ކުލަ ބޭނުން ކުރަން ފެށިއެވެ. އިންތިޚާބު ގާތް ވަންދެއް މި އަހަރު އެންމެ ގިނައިން ހުރިހާ ތަނަކުން ފެނުނު އެއް ކުލައަކީ މި ފެއްސަށް ވާނެއެވެ.
ނަމަވެސް، ބްރެޓް ފެއްސާ ހިސާބުން ފެހި ކުލައިގެ ވާހަކަ މި އަހަރު އަދި ނިމޭކަށް ނެތެވެ. މި އަހަރު ދެން އެންމެ ގަދައަށް ވައިގައި ހިފާފައިވަނީ "އޮލިވް" ފެއްސެވެ. ގެއަށް ބޭނުންވާ އެކި ކަހަލަ ސާމާނުތައް ފެހި ކުލައިން ގަނެފައިވާ މިންވަރު މި އަހަރު ވަނީ އިތުރުވެފައެވެ.
އިނގިރޭސިވިލާތުގެ ޑިޕާޓްމެންޓް އައުޓްލެޓެއް ކަމަށްވާ "ޖޯން ލޫވިސް"އިން ހާމަކޮށްފައިވާ ގޮތުގައި އެ ގައުމުގައި ފެހި ކުލައިގެ އެކި ޕްރޮޑަކްޓުތައް ގަނެފައިވާ މިންވަރު މި އަހަރުގެ ތެރޭގައި ވަނީ 35 ޕަސެންޓް އިތުރުވެފައެވެ. އެގޮތުން އެންމެ ގިނައިން މި ފެހި ފެންނަނީ ސޯފާ އަދި ބެޑް ޝީޓް ކަހަލަ ތަކެތިން ކަމަށް އެ ކުންފުނިން ފާހަގަކުރެއެވެ.
އޮލިވް ފެއްސަށް ފަހު އެންމެ ގިނައިން ފެންނަނީ "ސްވޯމްޕް" ފެއްސެވެ. އަޅި ކުލައެއް އަރާ މި ފެއްސަކީ އެކި ކަހަލަ ރެޑްކާޕެޓް އިވެންޓުތަކުން އަދި ގޭގެ ޑެކޯތަކުން ފެންނަ ކުލައަކަށް ވެގެން ގޮސްފައިވެއެވެ.
ޕިންޓްރެސްޓްއިން ހާމަކޮށްފައިވާ ގޮތުގައި މި އަހަރުގެ ތެރޭގައި ގޭގެ ޑެކޯ އަށް ފެހި ކުލައިގެ މޫޑްބޯޑު ހެދުމަށް ހޯދި މިންވަރު ވަނީ 3،000 ޕަސެންޓް އިތުރުވެފައެވެ. އެހެންވީމާ މި އަހަރުގެ އެންމެ މަގުބޫލު ކުލަ އަކީ ފެހި ކުލައަށް މިއޮތީ ވެފައެވެ.