ބަނޑުގައި ވައި ހެދި ގޭސްޓްރިކް މައްސަލަތައް ކުރިމަތިވުމަކީ އަޅުގަނޑުމެންގެ ތެރެއިން ވަރަށް ގިނަ މީހުން އާއްމުކޮށް ތަޖުރިބާކުރާ ކަމެކެވެ.
ގިނަ މީހުންނަށް ހީވެފައި އޮންނަނީ ގޭސްޓްރިކް މައްސަލަ ދިމާވުމަކީ ވަރަށް އާދައިގެ ކަމެއް ކަމުގައެވެ. އެހެން އެ ހީވަނީ ގޭހުގެ މައްސަލަ ދިމާވެ ބައެއްފަހަރު އެކަމަށް އަވަސް ހައްލެއް ލިބޭތީ ކަމަށް އެމެރިކާގެ މެންހެޓަންގެ ގޭސްޓްރޮއެންޓްރޮލޮޖީގައި، ގެސްޓްރޮއެންޓޮރޮލޮޖިސްޓެއްގެ ގޮތުގައި މަސައްކަތް ކުރައްވާ ޑރ.މައިކަލް ސްކޮޕީ ވިދާޅުވެފައިވެއެވެ.
ގޭސްޓްރައިޓިކްސްގެ މައްސަލަ އާއްމުކޮށް ތަހައްމަލު ކުރެވޭނަމަ ޑޮކްޓަރެއްގެ އެހީތެރިކަން ހޯދުން ވަރަށް މުހިއްމު--ފޮޓޯ/މެޑްލައިންޔުނިވަސިޓީ
އާއްމުކޮށް ގޭހުގެ މައްސަލަ ދިމާވެ އުނަދަގޫތަކެއް އިހުސާސްވަނީ ތެލުގެ މިންވަރު މަތި ތެޔޮ ކާއެއްޗެހި އަދި ހަވާދުގެ ބާވަތްތައް އެކުލެވޭ ކުޅި ކެއުންތަކުގެ ސަބަބުން ކަމަށް ޑރ.މައިކަލް ސްކޮޕީގެ ލިޔުމުގެ ފާހަގަކުރައްވާފައިވެއެވެ.
ހަމައެއާއެކު ފައިބަރުގެ މާއްދާތައް މަތި ލޯ ފެޓް ކެއުންތަކުން ގޭހުގެ މައްސަލައަށް ކޮންމެވެސް ވަރެއްގެ ލުޔެއް ލިބޭ ކަމަށް ވެސް މި ލިޔުމުގައި ވަނީ ފާހަގަކޮށްފައެވެ. ގޭސްޓްރައިޓިކްސް އަކީ އާއްމު ގޮތެއްގައި ކުދި ކުދި ބަލީގެ ގޮތުގައި ބެލެވޭ ބަލިތައް ކަމަށް ވިޔަސް މި ބަލީގެ ބައެއް ބާވަތްތަކުގެ ސަބަބުން ހަށިގަނޑުގައި އަލްސާސް އުފެދޭ މިންވަރު އިތުރުވެ ކެންސަރަށް މަގުފަހި ކުރުވާ ކަމަށް މި ލިޔުމުގައި ވަނީ ފާހަގަކޮށްފައެވެ.
އަލްސާ ނުވަތަ ޕެޕްޓިކް އަލްސާއަކީ ބަނޑުގެ އެތެރެ ފަށަލަ އާއި ކުޑަ ގޮހޮރުގެ މަތީ ބައިގައި ހުޅުވިފައިވާ ރިހުމަކަށް ކިޔާ ނަމެކެވެ. މި ޕެޕްޓިކް އަލްސައަށް އާއްމުކޮށް ކިޔަނީ ގެސްޓްރިކް އަލްސައެވެ.
ތިޔައީ އާއްމުކޮށް ގޭސްޓްރައިޓިކްސް މައްސަލަ ދިމާވާ މީހެއް ނަމަ ފައިބާ ގިނައިން އެކުލެވޭ ކެއުންތައް ކަމަށްވާ ހޯލް ގްރެއިންސް، މޭވާގެ އިތުރުން ތަރުކާރީގެ ބާވައްތައް އަދި ބީންސް ކެއުމަށް ހާއްސަ ސަމާލުކަމެއް ދޭށެވެ.
އާއްމުކޮށް ގޭސްޓްރައިޓިކްސްގެ މައްސަލަ ކުރިމަތިވާނަމަ ކެއުމަށް ބަދަލު ގެނެސް ކާއެއްޗެތި ހިޔާރުކުރާއިރު ހާއްސަ ސަމާލުކަމެއް އެކަމަށް ދޭންވާނެ--ފޮޓޯ/ޕިންޓްރެސްޓް
ހަމައެއާއެކު ލޯ-ފެޓް ކާނާގެ ބާވަތްތައް ކެއުމުގައި ހިމަނާލުމަށް އާދަ ކުރާށެވެ. މީގެއިތުރުން ތަރުކާރީ އާއި މޭވާގެ ތެރޭގައި ވެސް ހުންނަ އެސިޑީ ދަށް ބާވަތްތައް ކެއުމުގައި ބޭނުން ކުރުމަށް ހާއްސަ ސަމާލުކަމެއް ދޭށެވެ.
އެސިޑީ ދަށް ނުވަތަ ލޯ-އެސިޑިޓީ މޭވާގެ ތެރޭގައި ކަރާ، ދޮންކެޔޮ، އެވަކާޑޯ، ފަޅޯ، އާފަލު، ވައްތީނި އަދި އަނބު ހިމެނެއެވެ. މި ކެޓެގަރީގެ ތަރުކާރީގެ ތެރޭގައި ބްރޮކޮލީ، އެސްޕެރެގަސް ގްރީން ބީންސް، ސެލެރީ އަދި ކޮލީ ފްލާވާ ހިމެނެއެވެ.
ގޭސްޓްރައިޓިކްސްގެ މައްސަލަ އާއްމުކޮށް ދިމާވާނަމަ އެސިޑިކް ބާވަތްތައް ކަމަށްވާ، އެކި ވައްތަރުގެ ޑެއަރީ އުފެއްދުންތައް، ދަޅުގައި ބަންދުކޮށްފައި ހުންނަ ޕްރޮސެސްޑް ކާނާ، ޓޮމާޓޯ، ސިޓްރަސް މޭވާ، ކޮފީ، ޗީޒް، ރާހުތް އަދި އެކި ވައްތަރުގެ ސޮފްޓް ބުއިންތަކުން ދުރުހެލިވުމަށް އާދަކުރުމަށް ވެސް ޑރ.މައިކަލް ސްކޮޕީގެ ލިޔުމުގެ ފާހަގަކުރައްވާފައިވެއެވެ.