އިއްޔެ އުމުރުން 68 އަހަރު ފުރުނު އިންޑިއާގެ ކާމިޔާބު އެކްޓަރު އަނިލް ކަޕޫރުގެ އުފަންދުވަހުގެ ހާއްސަ ހަދިޔާއެއްގެ ގޮތުގައި އެކްޓަރުގެ ކުރިއަށް އޮތް ފިލްމު "ސުބޭދާރު"ގެ ޓީޒާއެއް ބެލުންތެރިންނާ ހިއްސާކޮށްފިއެވެ.
މި ޓީޒާގައި ފިލްމުގެ އަނިލް ފެންނާނެ ގޮތުގެ ފަސްޓް ލުކް ދައްކާލިއިރު މިއީ ސުރޭޝް ޓްރިވެނީ ޑައިރެކްޓްކޮށް ވިކްރަމް މަލްހޯތުރާ އަދި އަނިލް ވެސް ޕްރޮޑިއުސަރެއްގެ ގޮތުގައި މަސައްކަތް ކުރާ އެކްޝަން ޑްރާމާ އެކެވެ.
އަނިލްއާ އެކު ފިލްމުގެ ބަތަލާގެ ރޯލްއިން ފެންނާނީ ބެލުންތެރިންގެ ތަރުހީބު ހޯދަމުން އަންނަ ޒުވާން ބަތަލާ ރާދިކާ މާދަވަންއެވެ. ރިޕޯޓުތައް ބުނާގޮތުން ރާދިކާ ފިލްމުގައި ފެންނާނީ އަނިލްގެ ދަރިއެއްގެ ރޯލްއިންނެވެ.
ފިލްމު "ސުބޭދާރު"ގެ ޓީޒާ ބެލުންތެރިންނަށް ދައްކާލި ނަމަވެސް ފިލްމާ ބެހޭ މާބޮޑު ތަފުސީލު ހާމަކޮށްފައެއް ނުވެއެވެ. އަދި މި ފިލްމު ސިނަމާތަކަށް ގެންނާނެ ތާރީޚެއް ވެސް އިއުލާނުކޮށްފައެއް ނުވެއެވެ. ފިލްމާ ބެހޭގޮތުން ސުރޭޝް ޓްރިވެނީ ބުނެފައި ވަނީ މިއީ ވަރަށް ހިތްވަރު ގަދަ އަދި ޝަރަފާއި ފަޚުރު ދަމަހައްޓާ ކަންކަމުގައި ފަހަތަށް ނުޖެހި ކަންކަން ހާސިލުކުރުމަށް ލޯބިކުރާ ޝަހުސިއްޔަތެއްގެ ވާހަކަ ކިޔައިދޭނެ ފިލްމެއް ކަމުގައެވެ.
އެކްޓަރު އަނިލް ކަޕޫރު ފިލްމު "ސުބޭދާރު"ގެ ޓީޒާގެ މަންޒަރެއްގައި--ފޮޓޯ/ފިލްމުފެއަ
ޢުމުރުން ދުވަސްވިޔަސް އަނިލް ކަޕޫރު ފާހަގަ ކުރެވެނީ ވަރަށް ބުރަ މަސައްކަތްކޮށް އަދާކުރާ ރޯލަކަށް ވަރަށް ރަގަޅަށް އިންސާފުކުރާ އެކްޓަރެއްގެ ގޮތުގައެވެ. އަނިލް އެންމެ ފަހުން ބެލުންތެރިންނަށް ފެނިފައި ވަނީ މި އަހަރު ރިލީޒްކުރި ޑައިރެކްޓަރު ސިދާތު އާނަންދުގެ ފިލްމު "ފައިޓާ" އަދި މުކޭޝް ބަޓް ޕްރޮޑިއުސްކޮށްފައިވާ ފިލްމު "ސަވީ"އިންނެވެ.
އަނިލް އަންނަނީ ޔަޝް ރާޖް ކުންފުނީގެ ސްޕައި ޔުނިވާސްއިން އުފައްދާ އެ ކުންފުނީގެ އެންމެ ވަރުގަދަ ދެ ފިލްމު ކަމަށްވާ "ވޯ 2" އަދި "އަލްފާ"ގައި ވެސް މަސައްކަތް ކުރަމުންނެވެ.