މައުމޫނު ފައުންޑޭޝަނުން މަތީ ތައުލީމު ހާސިލް ކުރުމުގެ ފުރުސަތު 10 ދަރިވަރަކަށް

މައުމޫނު ފައުންޑޭޝަނުން މަތީ ތައުލީމު ހާސިލް ކުރުމުގެ ފުރުސަތު މިއަހަރު ވެސް 10 ދަރިވަރަކަށްދީފި އެވެ.

މައުމޫނު ފައުންޑޭޝަނުގެ ދެވަނަ އަހަރީ އާއްމު ޖަލްސާގައި މަތީ ތައުލީމަށް ކިޔެވުމުގެ 10 ފުރުސަތެއް ވަނީ 10 ދަރިވަރަކަށް ދީފަ އެވެ. އިންޑިޔާގެ ބެންގަލޫރުގެ ގާޑަން ސިޓީ ކޮލެޖްގައި މަތީ ތައުލީމަށް ކިޔެވުމަށް ސްކޯލާޝިޕް ލިބުނު ދަރިވަރުންނަކީ ސ. ހިތަދޫ ފޯ މޫންސް އައިޝަތު ސަމާ އާއި ގދ. ގައްދޫ ވިލިގިލީގޭ މަރިޔަމް އަނީސާ އާއި ކ. ގުރައިދޫ ސޯފިޔާ އައިމިނަތު ޝާހިޔާ އާއި ހދ ނައިވާދޫ ނިވައިދަށުގޭ އައިޝަތު ނަޝީދާ އާއި ސ. ހިތަދޫ އެކަތަގޭ އާއިމިނަތު ސަމާ އާއި ހުޅުމާލޭ ދޮޅަސް، މަރިޔަމް ޝާހާ ޝަކީބާއި ޅ. ހިންވަރު މާރަންގެ އާއިޝަތު ހަނާ އަލީ އާއި ޏ. ފޯއްމުލަކު، ދޫޑިގަމު ރާޑޯ، އިބުރާހިމް ޝަމީން އާއި ވިލިމާލޭ ދިވެތި، މުހައްމަދު ނައްވާފު ޖިހާދާއި ޅ. ހިންނަވަރު އަތިރީގޭ އަލީ އަހުސަން އެވެ. ދަރިވަރުންނަށް ސްކޯލާޝިޕް ލިބުނު ކަމުގެ ހަދާނީ ލިޔުން ދެއްވީ މައުމޫނު ފައުންޑޭޝަންގެ ޗެއާމަން ރައީސް މައުމޫނު އަބްދުލް ގައްޔޫމެވެ.

ޝީ ބިލްޑިންގުގެ އަސަރީ މާލަމުގައި ކުރިއަށް ދިޔަ އެ ރަސްމިއްޔާތުގައި ވާހަކަ ފުޅުދައްކަވަމުން ރައީސް މައުމޫން ވިދާޅުވީ މައުމޫނު ފައުންޑޭޝަނުގެ ހަރަކާތްތަކަކީ ހިލޭ ސާބާހަށް ދިވެހި ރައްޔިތުންގެ ލާބައާއި މަންފާއަށް ހިންގާ ހަކަޜާތެއް ކަމަށާއި އެ ފައުންޑޭޝަނުގެ ހަރަކާތްތައް ހިންގަމުންގެންދަނީ ފައުންޑޭޝަނުގެ މެންބަރުންނާއި އެހީދޭ ފަރާތްތަތަކުގެ ދީލަތި އެކީއާއެކު ކަމަށެވެ.

ރައީސް މައުމޫނު ވިދާޅުވީ އެ ފައުންޑޭޝަނަށް އެންމެ ބޮޑު އެހީއެއް ދެއްވާ އެއް ފަރާތަކީ އެފައުންޑޭޝަންގެ ބޯޑް އޮފް ޓްރަސްޓީސްގެ މެންބަރެއް ކަމަށްވާ ބެންގަލޫރުގެ ގާޑަން ސިޓީގެ ޓްރަސްޓްގެ ޗެއާމަން ޑރ. ޖޯސެފް އީ ޖޯޖް ކަމަށެވެ. ވޭތުވެދިޔަ ދެއަހަރު މަތީތައުލީމު ހާސިލްކުރުމަށް ބޭންގަލޫރަށް ފޮނުއްވި 12 ކުދިންނާއި މިއަހަރު ފޮނުވާ 10 ކުދިންގެ ސޮކޮލާޝިޕްތައް ހަމަޖައްސައިދެއްވީ ޖޯސެފްކަމަށް ވެސް ވިދާޅުވި އެވެ.

"ވޭތުވެ ދިޔަ ދެއަހަރު މަތީތައުލީމު ހާސިލްކުރުމަށް ބޭންގަލޫރަށް ފޮނުއްވި 12 ކުދިންނާއި މިއަހަރު ފޮނުވާ 10 ކުދިންގެ ސޮކޮލާރ ޝިޕްތައް ހަމަޖައްސައިދެއްވީ ޖޯސެފް ޖޯޖް. އެހެންކަމުން ޑރ ޖޯސެފް ޖޯޖް ވެދެއްވަމުން ގެންދަވާ އެހީއަށްޓަކައި ފައުންޑޭޝަންގެ ނަމުގައާއި އަދި ފައުންޑޭޝަން ފަރާތުން ސްކޮލާޝިޕްގައި ދާކުދިންގެ ފަރާތުން ވަރަށް ބޮޑަށް ޝުކުރު ދަންނަވަން،" މައުމޫނު ވިދާޅުވި އެވެ

މިޖަލްސާގައި މައުމޫނު ފައުންޑޭޝަނުގެ ވޭތުވެދިޔަ 2011 ވަނއަހަރުގެ އަހަރީ ރިޕޯޓާއި މާލީ ރިޕޯޓް ވަނީ ޖަލްސާއަށް ވަޑައިގެންނެވި މެންބަރުންގެ އިއްތިފާގުން ފާސް ކޮށްފަ އެވެ.

މިރޭގެ ރަސްމިއްޔާތުގައި ރައީސުލް ޖުމުހޫރިއްޔާގެ ނައިބު އައްނަބީލް މުހައްމަދު ވަހިއްދީނާއި ރައީސް މައުމޫނު ސަރުކާރުގެ ދުވަސްވަރު އެމަނިކުފަނުގެ އަރިހުގައި މަސައްކަތްކުރެއްވި އިސް ބޭފުޅުން ބައިވެރިވެ ވަޑައިގެން ނެވިއެވެ.

މައުމޫނު ފައުންޑޭޝަން އުފައްދާ ފައިވަނީ 2010 ވަނއަހަރު ޖެނުއަރީ މަހުގެ 26 ވަނަ ދުވަހުއެވެ.