ކުރިއަށް އޮތް 2025 ވަނަ އަހަރަކީ ކާމިޔާބު އަހަރަކަށް ހެދުމަށް މަގުފަހިކޮށްދިނުމުގެ ގޮތުން ރެޒޫމޯ މޯލްޑިވްސްއިން "ޑިސްކަވާ ޔުއާ ބްރޭކްތްރޫ އިޔާ" ގެ ނަމުގައި ޚާއްޞަ އިވެންޓެއް ބާއްވަން ނިންމައިފިއެވެ.
މި އިވެންޓް ބާއްވަން ހަމަޖެހިފައި ވަނީ އަންނަ ޖަނަވަރީ މަހުގެ 11 ވަނަ ދުވަހުގައެވެ.
މި އިވެންޓުގައި ބައިނަލްއަގްވާމީ ދެ ކީނޯޓް ސްޕީކަރުންކަމުގައިވާ ނިކް ޖޯންސަން އާއި އަފީފް ޙުސައިން، 2025 ވަނަ އަހަރު ކާމިޔާބު އަހަރަކަށް ހެދުމަށް ބޭނުންވާ ސްޓްރެޓެޖީތައް ހިއްސާކޮށް، އެކަންކަން ޙާޞިލުކުރުމަށް ބޭނުންވާ މަގުޗާޓެއް އެކުލަވާލުމަށް އެހީތެރިވެދެއްވާނެއެވެ.
މީގެ އިތުރުން، އަމިއްލަ ދިރިއުޅުމާއި ޕްރޮފެޝަނަލް ކެރިއަރުގައި ކާމިޔާބު ހޯދުމަށްޓަކައި އެކުލަވާލަންޖެހޭ ޕްލޭންތަކާއި އެކަމަށް ބޭނުންކުރެވިދާނެ އުކުޅުތަކާ ބެހޭ މަޢުލޫމާތު ވެސް ފޯރުކޮށްދެއްވާނެއެވެ.
މި އިވެންޓުގައި ނިކް އާއި އަފީފް އަލިއަޅުވާލައްވާނެ މައިގަނޑު ބައިތަކުގެ ތެރޭގައި ހިމެނެނީ:
- 2024 ވަނަ އަހަރުގެ ކާމިޔާބީތަކާއި، ކުރިއެރުންތަކާއި، އުނގެނުމުގެ ފިލާވަޅުތަކުގެ މައްޗަށް ވިސްނުން
- މުސްތަގްބަލުގެ ކާމިޔާބީއަށްޓަކައި މާޒީގެ ތަޖުރިބާތަކުން ޙާޞިލުކުރެވިދާނެ ޢިބުރަތްތައް
- އަވަސް ކުރިއެރުންތައް ޙާޞިލުކުރެވިދާނެ ފުރުޞަތުތައް ދެނެގަތުން
- ގޮންޖެހުންތަކާ ކުރިމަތިލުމަށްޓަކައި ނަފްސާނީގޮތުން ވަރުގަދަވުމަށް އެޅިދާނެ ފިޔަވަޅުތައް'
- ދިގު މުއްދަތުގެ ލަނޑުދަނޑިތަކަށް ވާޞިލުވުމަށްޓަކައި މެންޓާޝިޕްގެ ބޭނުން ހިފުން
އަފީފަކީ ދުނިޔޭގެ ވަރަށް ގިނަ އިވެންޓްތަކުގައި ކީނޯޓު ތަގުރީރުދެއްވާފައިވާ، ކުޅަދާނަ ޕަބްލިކް ސްޕީކާއެއްގެ އިތުރުން ފާހަގަކޮށްލެވޭ އެގްޒެކެޓިވް ކޯޗެކެވެ.
ދުނިޔޭގެ މަޝްހޫރު ލަގްޒަރީ ރިޒޯޓް ޗެއިން ލަކްސް ރިސޯޓްސް އެންޑް ހޮޓެލްސްގެ ޓެލެންޓް އެންޑް ކަލްޗާގެ ސީނިއާ ޑައިރެކްޓަރުގެ މަގާމު ފުރުއްވަމުން އަންނަ އަފީފަކީ، ރާއްޖޭގެ ހިއުމަން ރިސޯސަސް ޕްރޮފެޝަނަލުންގެ ޖަމިއްޔާ މާޕްގެ ނައިބު ރައީސް ވެސް މެ އެވެ. އޭނާ އަކީ ހިއުމަން ރިސޯސަސް ސްޓްރެޓެޖީ އާއި ކަސްޓަމާ އެކްސްޕީރިއަންސް އަދި ލާނިން ޑިވެލޮޕްމަންޓުގައި ރާއްޖޭގެ އެންމެ ތަޖުރިބާކާރު އެކެކެވެ.
ނިކް އަކީ ބައިނަލްއަޤްވާމީ ކީނޯޓް ސްޕީކަރެއްގެ އިތުރުން ހޮލިސްޓިކް ލީޑާޝިޕް އަދި ވެލްބީއިންގެ ދާއިރާގައި ފާހަގަކުރެވޭ އެގްޒެކެޓިވް ކޯޗެކެވެ. އޭނާގެ އަމިއްލަ ތަޖުރިބާގެ އަލީގައި ކުރިއަށް ގެންދަވާ ސެޝަންތަކާއި، ފޯރުކޮށްދެއްވާ މެންޓާޝިޕްތަކުން ދުނިޔޭގެ ފާހަގަކޮށްލެވޭ އެތައް ބަޔަކަށް ހިތްވަރު ލިބި، ކާމިޔާބީގެ މަންޒިލަށް ވާޞިލުވެފައިވެ އެވެ.
މޯލްޑިވްސް ނެޝަނަލް ޔުނިވާސިޓީގެ ފެކަލްޓީ އޮފް އެޑިއުކޭޝަނުގެ އޮޑިޓޯރިއަމްގައި، ޖެނުއަރީ 11 ވަނަ ދުވަހުގެ ހެނދުނު ނުވަ އަކުން މެންދުރުފަހު ތިނަކަށް ބާއްވާ މި އިވެންޓުގައި ރަޖިސްޓްރީވުމުގެ ފުރުސަތު ވަނީ ހުޅުވާލައިފައެވެ.