އިންގްލިޝް ޕްރިމިއާ ލީގުގެ އެންމެ ފަހުގެ ޗެމްޕިއަން މެންޗެސްޓާ ސިޓީގެ ފަހަތަށް ކުޅޭ ރުބެން ޑިއާޒްއަށް އަނެއްކާ އަނިޔާވެ ކުރިއަށް އޮތް ހަތަރު ވަރަކަށް ހަފުތާގައި ކުޅުމާ ދުރަށް ދާން ޖެހިއްޖެއެވެ.
މަޢުލޫމާތު ލިބިފައިވާގޮތުގައި ޑިއާޒްއަށް އަނިޔާވެފައިވަނީ ސިޓީ އެންމެ ފަހުން ޕްރިމިއާ ލީގުގައި ވާދަވެރި މެންޗެސްޓާ ޔުނައިޓެޑާ ކުޅެ އަމިއްލަ ދަނޑުގައި ހައިރާން ކުރުވަނިވި ގޮތަކަށް ބަލިވި މެޗުގައެވެ. ސިޓީގެ ކޯޗު ޕެޕް ގާޑިއޯލާ ހާމަކުރިގޮތުގައި ޑިއާޒްގެ ފައިގެ މަސްގަނޑަށްވަނީ އަނެއްކާވެސް އަނިޔާވެފައެވެ. ޑިއާޒް މިސީޒަންގައި މިހާތަނަށްވެސް ވަނީ ފައިގެ ފަލަމަސްގަނޑަށް ލިބުނު އަނިޔާއަކާ ގުޅިގެން ހަތް މެޗުގައި ކުޅުމާ ދުރުގައި ހުރެފައެވެ.
މީގެއިތުރުން ސިޓީގެ ފަހަތަށް ކުޅޭ އެހެން ކުޅުންތެރިންކަމަށްވާ ޖޯން ސްޓޯންސް، ނޭތަން އައިކާ، މަނުއެލް އަކާންޖީ އަދި ކައިލް ވޯކާވެސް ވަނީ މިސީޒަންގައި އަނިޔާގެ ސަބަބުން ކުޅުމާ ދުރުގައި ގިނަ މެޗުތަކެއްގައި ތިބެފައެވެ. މިހާރުވެސް މީގެތެރެއިން ނޭތަން އައިކާ ހުރީ އަނިޔާގައެވެ. އަދި އަކާންޖީ އަނިޔާއިން އެނބުރި އައިސްފައިވާއިރު ސްޓޯންސްވަނީ ޔުނައިޓެޑް މެޗުގައި ބެންޗުގައި ހިމަނާފައެވެ.
ޕެޕް ހާމަކުރިގޮތުގައި ޑިއާޒް އަށް އަނިޔާވެފައިވަނީ ޔުނައިޓެޑް މެޗުގެ 75 ވަނަ މިނެޓަށް ފަހު ކަމަށާއި ނަމަވެސް އޭނާ ވަރުގަދަ ކަމުން މެޗު ނިމެންދެން ދަނދު މަތީ ހިފަހައްޓާލީ ކަމަށެެވެ. އަދި ސްޓޯންސް އާއި އަކާންޖީ އަދި މަޓިއޯ ކޮވަސިޗް މިހަފްތާގައި ޓީމާއެކު ފަރިތަކުރުންތަކުގައި ބައިވެރިވެފައިވާކަމަށްވެސް ޕެޕް ހާމަކުރިއެވެ. ސިޓީ މިއަދު ރާއްޖޭ ގަނޑިން 6 ޖަހާއިރު އެސްޓަން ވިލާއާ ދެކޮޅަށް ކުޅޭ މެޗުގައި މިކުޅުންތެރިން ވަކި ހިސާބަކުން ނުވަތަ ފުރަތަމަ އެގާރައިން ފެނިގެންދިއުމަކީ ގާތް ކަމެކެވެ. މީގެއިތުރުން ކީޕާ އެޑަސަންއަށް ވެސް ފަހަކަށް އައިސް ކުދިކުދި އުނދަގޫ ތަކެއް ކުރިމަތިވެފައިވާކަމަށާއި އަދި އޭނާ އަކީ ސިޓީއަށް ވަރަށް މުހިންމު ކުޅުންތެރިއެއް ކަމަށްވެސް ޕެޕް ފާހަގަ ކުރިއެވެ.
މީގެއިތުރުން ކުރިއަށް އޮތް ޖެނުއަރީ ޓްރާންސްފާ ވިންޑޯގައި ކުޅުންތެރިން ގަތުމަކީ ޕެޕް މާ ކުރާ ހިތްވާ ކަމެއް ނޫން ކަމަށާއި ނަމަވެސް މިހާރު ޓީމުގެ ހާލަތު އޮތް ގޮތުން ފަހަރެއްގައި ކުޅުންތެރިއެއް ޓީމަށް އިތުރު ވެގެންދިއުމަކީ ގާތް ކަމެއް ކަމަށް އޭނާ ހާމަކުރިއެވެ. އަދި ޓީމުން އެއްވެސް ކުޅުންތެރިއެއް ދާނެކަމަށް ނުބެލެވޭކަމަށްވެސް ސިޓީގެ ކޯޗު ހާމަކުރިއެވެ. ޑިއާޒްއަށް ލިބިގެންދިޔަ މިއަނިޔާގެ ސަބަބުން އޭނާއަށް ޑިސެމްބަރު ފަހު ކޮޅު ސިޓީއަށް ކުޅެން ޖެހިތާފައިވާ މެޗުތަކުގެ އިތުރުން ޖެނުއަރީ މަހުގެ 11 ވަނަ ދުވަހު އެފް އޭ ކަޕްގެ ތިންވަނަ ބުރުގައި ކުޅޭ މެޗުގައިވެސް އޭނާއަށް ނުކުޅެވޭނެއެވެ.