ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) ގެ ޑެޕިއުޓީ ސީއީއޯގެ މަގާމުގައި ހުރި ޝިއުނާ އަހުމަދު އެ މަގާމުން ވަކިކޮށްފި އެވެ.
މިކަން "ސަން"އަށް ވަނީ ކަށަވަރު ވެފައެވެ. ނަމަވެސް އޭނާ މަގާމުން ވަކިކުރީ ކޮން ސަބަބަކާ ގުޅިގެން ކަމެއް އެނގިފައެއް ނުވެއެވެ.
އެނގިފައިވާ ގޮތުގައި އޭނާ މަގާމުން ވަކިކުރުމަށް ފަހު ޑެޕިއުޓީ ސީއީއޯގެ މަގާމު ވަނީ އުވައިލާފައެވެ.
މިފަހުން އެންސްޕާއަށް ވަނީ ކޮރަޕްޝަންގެ ތުހުމަތެއް އަމާޒުވެފައެވެ. މިއީ އެންސްޕާގެ އޮފީސް ހިންގުމަށްޓަކައި ކުއްޔަށް ނަގާފައިވާ އިމާރާތުގެ ދެ ފްލޯގައި މޯލްޑިވްސް މީޑިއާ ހައުސް ޕްރައިވެޓް ލިމިޓެޑްއިން "އެމްއެމްޓީވީ" ހިންގުމަށް ހަދައިފައިވާ އެއްބަސްވުމާ ގުޅިގެން ކުރެވޭ ތުހުމަތެކެވެ.
މި މައްސަލަ ފެންމަތިވުމާ ގުޅިގެން އެންސްޕާއިން ވަނީ އެ އެއްބަސްވުން ނިމުމަކަށް ގެނެސްފައެވެ.
އެންސްޕާއިން ނެރުނު ބަޔާނެއްގައިވަނީ، އެ އޭޖެންސީ ހިންގަމުންދާ މޫކައި ސުއިޓްސް އިމާރާތް މަރާމާތު ކުރުމަށް ޓަކައި ހުސްކުރުމަށް އަންގައިފައިވާތީ، އެ އޭޖެންސީ ހިންގާނެ ތަނެއް ހޯދުމަށް ފިނޭންސް މިނިސްޓްރީގެ އޯޕަން ޓެންޑާއިން ހުޅުވާލައިގެން، އެކަމާ ގުޅުންހުރި ގަވައިދުތަކާއި އުސޫލުތަކުގެ މަތިން އެމްއެމްޓީވީއަށް އިމާރާތުގެ ފަންގިފިލާތަކެއް ކުއްޔަށް ދިން ކަމަށެވެ.
އެހެން ނަމަވެސް އެ މުއާމަލާތާ ގުޅިގެން އެމްއެޓީވީގެ އަގު ވައްޓާލައި، ބަދުނާމުކުރުމަށް ހަގީގަތާ ޚިލާފު އެތައް ވާހަކަތަކެއް ދައްކައިމ މީޑިއާގެ އެކި ވަސީލަތްތައް ބޭނުންކޮށްގެން އެއްވެސް އަސްލެއް ނެތް ދޮގު ވާހަކަތައް ފަތުރަމުން ދިޔުމުގެ ސަބަބުން އެ ކުންފުންޏަށް މާއްދީ ގޮތުންނާއި މައުނަވީ ގޮތުން ފޫނުބެދޭ ވަރުގެ ބޮޑު ގެއްލުމާ ކުރިމަތިވެފައިވާ ކަމަށް އެ ބަޔާނުގައިވެއެވެ.
މި މައްސަ އެންޓި ކޮރަޕްޝަން ކޮމިޝަން (އޭސީސީ)ން ވެސް ދަނީ ތަހުގީގު ކުރަމުންނެވެ.