މެޓާ ކުންފުނީގެ "ރޭ-ބަން މެޓާ ސްމާޓް" އައިނުތަކަށް ލައިވް އޭއައި އާއި ލައިވް ތަރުޖަމާ ފީޗާ އިތުރުކޮށްފިއެވެ.
ލައިވް އޭއައި އަކީ މެޓާ އޭއައި އަށް ރިއަލް-ޓައިމް ވީޑިއޯ ޕްރޮސެސިންގ ގާބިލިއްޔަތު އިތުރުކޮށްދޭ ފީޗަރެކެވެ. މި ފީޗަރުގެ ސަބަބުން ޗެޓްބޮޓަށް، ބޭނުންކުރާ މީހާގެ ވަށައިގެންވާ މާހައުލު އަބަދުވެސް ފެނި، އެ މާހައުލާ ގުޅޭ ސުވާލުތަކަށް ޖަވާބު ދެވޭނެއެވެ.
ލައިވް ތަރުޖަމާ އަކީ އޭއައި އަށް ސަޕޯޓްކުރާ ބަސްތަކުގައި ވާހަކަދައްކާ އަޑު ރިއަލް-ޓައިމްގައި ތަރުޖަމާކޮށްދޭ ފީޗަރެކެވެ. މި ފީޗަރު ސީއީއޯ މާކް ޒަކަބާގް ވަނީ ކަނެކްޓް 2024 ގައި ޑެމޮންސްޓްރޭޓްކޮށްދީފައެވެ.
މި ދެ ފީޗަރު ފުރަތަމަ ތަޢާރަފުކުރަނީ ކެނެޑާ އާއި އެމެރިކާގައި ތިބި މެޓާގެ އާލީ އެކްސެސް ޕްރޮގްރާމްގެ މެންބަރުންނަށެވެ.
މެޓާއިން ބުނާގޮތުގައި މި ދެ ފީޗަރަކީ ސްމާޓް އައިނުތަކަށް ގެނެވޭ ވީ11 ސޮފްޓްވެއާ އަޕްޑޭޓްގެ ބައެކެވެ.
ލައިވް އޭއައި އިން މެޓާ އޭއައި އަށް ސްމާޓް އައިނުތަކުގައިވާ ކެމެރާތަކަށް އެކްސެސް ލިބި، ވީޑިއޯ ފީޑް ރިއަލް-ޓައިމްގައި ޕްރޮސެސްކުރެވޭނެއެވެ. މިއީ އޯޕަންއޭއައި އިން ފަހުން ނެރުނު ޗެޓްޖީޕީޓީގެ އެޑްވާންސްޑް ވޮއިސް ވިތު ވިޝަން ފީޗާއާ އެއްގޮތް ފީޗާއެކެވެ.
ބޭނުންކުރާ މީހުންނަށް "ހެއި މެޓާ" ކިޔުމަކާ ނުލައި މެޓާ އޭއައި އާ ވާހަކަދެއްކޭނެއެވެ. އަދި އިތުރު ސުވާލުތައް ކުރުމާއި، ކުރިން ދެކެވުނު ވާހަކަތަކަށް ރިފަރެންސް ދިނުމުގެ ފުރުސަތު ވެސް ލިބޭނެކަމަށް ކުންފުނިން ބުނެފައިވެއެވެ.
އަދި މި ފީޗަރުތަކުން މަޢުޟޫ ބަދަލުކުރުމާއި، ކުރިން ދެކެވުނު މަޢުޟޫތަކަށް އަނބުރާ ދިއުމުގެ ފުރުސަތު ލިބޭނެއެވެ. އަދި ލައިވް އޭއައި އިން ސުވާލު ކުރުމުގެ ކުރިން ވެސް ބޭނުންތެރި ލަފާ ދޭނެ ކަމަށް މެޓާ އިން ބުނެފައިވެއެވެ.
ލައިވް ތަރުޖަމާ ފީޗަރުން އިނގިރޭސި ބަހާއި ސްޕެނިޝް، ފްރެންޗް، ނުވަތަ އިޓަލިއަން ބަހުގެ މެދުގައި ރިއަލް-ޓައިމް ސްޕީޗް ތަރުޖަމާ ފޯރުކޮށްދެއެވެ. މިގޮތުން، މި ތިން ބަހުގެ ތެރެއިން ބަހަކުން ވާހަކަދައްކާ މީހަކާ ވާހަކަދައްކާއިރު، މެޓާ އޭއައި އިން ރިއަލް-ޓައިމްގައި ތަރުޖަމާކޮށް، އައިނުގެ ސްޕީކަރުތަކުން އަޑު އިއްވައިދޭނެއެވެ. އަދި ތަރުޖަމާ ސްމާޓްފޯނުން ޓްރާންސްކްރިޕްޝަނެއްގެ ގޮތުގައި ވެސް ބެލޭނެއެވެ.
މި އައު ފީޗަރުތަކުން އަބަދުވެސް ރަނގަޅަށް މަސައްކަތް ނުކުރެވިދާނެކަމަށާއި، ބޭނުންކުރާ ފަރާތްތަކުގެ ފީޑްބެކް ބޭނުންކޮށްގެން އޭއައި ފީޗަރުތައް އިތުރަށް ރަނގަޅުކުރަމުން ގެންދާނެކަމަށް މެޓާ އިން ބުނެފައިވެއެވެ.
މި ފީޗަރުތައް މިވަގުތު މަދުބަޔަކަށް ލިބޭއިރު، ދުނިޔޭގެ ހުރިހާ ޔޫޒަރުންނަށް ލިބޭނެ ދުވަހެއް އަދި އިޢުލާނުކޮށްފައެއް ނުވެއެވެ.