ފީފާއިން ހޮވާ އަހަރުގެ އެންމެ މޮޅު ފިރިހެން ކުޅުންތެރިޔާގެ މަގާމް ރެއާލް މެޑްރިޑަށް ކުޅެމުންދާ ބްރެޒިލްގެ ވިނީޝިއަސް ޖޫނިއާއަށް ލިބިއްޖެއެވެ.
މިއަހަރު ބޭއްވި ބެލޮން ޑިއޯ އިނާމް ނުލިބޭކަން ޔަގީންވުމުން އެރަސްމިއްޔާތު ބޮއިކޮޓް ކުރި ވިނީޝިއަސް ވަނީ ޤަތަރުގެ ވެރިރަށް ދޯހާގައި ބޭއްވި ރަސްމިއްޔާތުގައި ބައިވެރިވެ އިނާމާ ހަވާލުވެފައެވެ.
ވިނީޝިއަސްވަނީ މިދިޔަ ސީޒަންގައި ރެއާލްއިން ޔުއޭފާ ޗެމްޕިއަންސް ލީގުގެ އިތުރުން ސްޕެނިޝް ލަލީގާ ކާމިޔާބު ކުރުމުގައި މުހިންމު ދައުރެއް އަދާކޮށްފައެވެ. މިގޮތުން މިދިޔަ ސީޒަންގައި އޭނާ ވަނީ 24 ލަނޑު ކާމިޔާބުކޮށް 11 އެސިސްޓް ކޮށްފައެވެ. މިއީ މިއިނާމް ވިނީޝިއަސްއަށް ލިބުނު ފުރަތަމަ ފަހަރެވެ.
ދެހާސް ތޭވީސް ވަނަ އަހަރުގެ އޮގަސްޓް މަހުން މިއަހަރުގެ އޮގަސްޓް މަހުގެ ކުޅުމަށް ބަލައި ހޮވާ މިއީނާމް ލިބޭ ފަރާތެއް ހޮވުން ބިނާވެފައިވަނީ އާންމުންގެ ވޯޓުގެ އިތުރުން ކޮންމެ ޤައުމަކުން އެއް ޖާނަލިސްޓް އަދި ފީފާ މެންބަރު ޤައުމީ ޓީމުތަކުގެ ކެޕްޓަނާއި ކޯޗުންގެ ވޯޓުގެ މައްޗަށެވެ. މިގޮތުން މިއިން ކޮންމެ ބައެއް 25 އިންސައްތަ ހިއްސާ ކުރެއެވެ.
ފީފާގެ ރަސްމިއްޔާތު ޤަތަރުގައި ބޭއްވިއިރު ފީފާ އިންޓަކޮންޓިނެންޓަލް ކަޕްގެ ފައިނަލްގައި މެކްސިކޯގެ ޕަޗޫކާ އާއި ދެކޮޅަށް ކުޅުމަށްޓަކައި ރެއާލް މެޑްރިޑް ތިބީ ދޯހާގައެެވެ. މިރަސްމިއްޔާތުގައި ދެވަނަ މަގާމް ލިބުނީ މިފަހަރުގެ ބެލޮން ޑިއޯ އިނާމް ހާސިލްކުރި ރޮޑްރީއަށެވެ. އަދި ތިންވަނަ މަގާމް ލިބިގެންދިޔައީ ޖޫޑް ބެލިންހަމްއަށެވެ.
ފީފާއިން ވަނީ ޤައުމީ ޓީމުތަކުގެ ކެޕްޓަނުުންނާއި ކޯޗުން ވޯޓުދީފައިވާ ގޮތުގެ ތަފްސީލް އާންމުކޮށްފައެވެ. މިގޮތުން ރާއްޖޭގެ ފަރާތުން ސަމޫހް އަލީ އެއްވަނައަށް ވިނީޝިއަސް ޚިޔާރު ކޮށްފައިވާއިރު ދެވަނަ ދީފައިވަނީ ރޮޑްރީ އަށެެވެ. އަދި ތިންވަނަ މަގާމް ލިބުނީ ބެލިންހަމް އަށެވެ. ކޯޗަށް ބަލާލާއިރު އަލީ ސުޒެއިން ވޯޓު ދީފައިވަނީ ވިނީޝިއަސް، ބެލިންހަމް އަދި ރޮޑްރީ މިއޯޑަރުންނެވެ.
ފީފާއިން ހޮވާ އެންމެ މޮޅު ލަނޑު ޖަހާ ކުޅުންތެރިޔަކަށްދޭ ޕުސްކާސް އިނާމް ލިބުނީ އިންގްލިޝް ޕްރިމިއާ ލީގުގެ މެންޗެސްޓާ ޔުނައިޓެޑަށް ކުޅެމުންދާ އާޖެންޓީނާގެ ޒުވާން ކުޅުންތެރިޔާ އަލެހަންޑްރޯ ގެނާޗޯއެވެ. އޭނާއަށް މިއިނާމް ލިބިފައިވަނީ މިދިޔަ އަހަރުގެ ނޮވެމްބަރު މަހު އެވަޓަންއާ ދެކޮޅަށް ކުޅެ ތިން ލަނޑު ސުން ލަނޑުން ޔުނައިޓެޑް މޮޅުވި މެޗުގައި ބައިސިކަލް ކިކްއަކުން ކާމިޔާބު ކުރި ލަނޑަށެވެ. މީގެއިތުރުން އަހަރުގެ އެންމެ މޮޅު ކޯޗަކަށް ހޮވިފައިވަނީ ރެއާލް މެޑްރިޑްގެ ކާލޯ އެންޗެލޯޓީއެވެ.