މަޝްހޫރު ޅެންވެރިޔާ ޏ. ފުވައްމުލައް/ ރަނިކަ، އަލީ ޝަރީފް އިބްރާހިމް މިއަދު އަވަހާރަވެއްޖެއެވެ.
އަލީ ޝަރީފް އަވަހާރަވިއިރު، އޭނާގެ އުމުރުފުޅުން 84 އަހަރެވެ.
އަލީ ޝަރީފްގެ މައްޗަށް ކުރާ ކަށު ނަމާދު އޮންނާނީ މިއަދު އަސުރު ނަމާދަށް ފަހުގައި ހުޅުމާލެ ސަހަރާ މިސްކިތުގައެވެ.
އަލީ ޝަރީފް ވަނީ ޅެންވެރިކަމުގެ ރޮނގުން 1981ގައި އާންމު ޚިދުމަތުގެ ހިތްވަރު ދިނުމުގެ އިނާމު ހާސިލުކުރައްވާފައެވެ. އަދި "ބިއްސާވެރި 1" އަދި "ބިއްސާވެރި 2"ގެ ނަމުގައި އަލީ ޝަރީފުގެ ދެ ޅެން ފޮތެއް ވެސް ޝާއިއުކޮށްފައިވެއެވެ.
އޭނާ ވަނީ ދެ ފަހަރެއްގެ މަތިން ސަރުކާރަށް 31 އަހަރު ޚިދުމަތް ކުރައްވާފައެވެ.
ގިނަ ވަޒީފާތަކެއް އަދާކުރެއްވި އަލީ ޝަރީފް ވަނީ އެޓާނީ ޖެނެރަލްގެ އޮފީހުގައި މަސައްކަތްކުރައްވާފައެވެ. އޭނާ ވަނީ އެކި ކޯޓުތަކުގެ ގާޒީކަން ވެސް ކުރައްވާފައެވެ. އެގޮތުން ހަ ކޯޓެއްގައި އޭނާ ގާޒީކަން ކުރެއްވިއެވެ.
ތައުލީމީ ދާއިރާއަށް ވެސް ގިނަ ދުވަހު އޭނާ ވަނީ ޚިދުމަތް ކޮށްދެއްވާފައެވެ. އެގޮތުން މަޖީދިއްޔާ ސްކޫލްގެ ގްރޭޑް ތިނެއްގެ ދިވެހި މުދައްރިސްކަމާއި، އެޑިއުކޭޝަން މިނިސްޓްރީގެ ސުޕަވައިޒަރުކަމާއި، އެޑިއުކޭޝަނަލް ސުޕަވައިޒަރުކަން ވަނީ ކުރައްވާފައެވެ.
މީގެ އިތުރުން އަލީ ޝަރީފް ވަނީ ދިވެހިބަހާއި ތާރީޚަށް ޚިދުމަތްކުރާ ގައުމީ މަރުކަޒުގެ އިސް އެހީތެރިޔާގެ މަގާމު އަދާކުރައްވާފައެވެ. އަަދި އިންފޮމޭޝަން، އާޓްސް އެންޑް ކަލްޗާ މިނިސްޓްރީގެ ޑިރެކްޓަރުކަމާއި ޕަބްލިކް ކޮމްޕްލިމެންޓްސް ބިއުރޯގެ ކޮމްޕްލެއިންޓްސް ކޮމިޝަނަރުކަން ވަނީ އަދާކުރައްވާފައެވެ.
އަލީ ޝަރީފަކީ ސަން އޮންލައިންގެ ކުރީގެ ސީއީއޯ ސިނާން އަލީގެ ބައްޕައެވެ.