ފްލައިޓު ޑިލޭވެގެން އިއްޔެ ނުފުރުނު ގިބްލަ ހައްޖު އެންޑް އުމުރާ ގުރޫޕުގެ ހަވާލުގައި 100 އުމްރާވެރިން މިއަދު ފުރާނެ ކަމަށް އެ ގުރޫޕުން ބުނެފިއެވެ.
އެ ކަމާ ގުޅިގެން ކަންބޮޑުވުން ފާޅުކޮށް، ނުފުރުނު އުމްރާވެރިއަކު 'ސަން'އަށް ބުނީ، އިއްޔެ އެމީހުން ފުރަން އޮތީ ހެނދުނު 8:00 ޖަހާއިރު ކަމަށެވެ. ނަމަވެސް، ފްލައިޓު ޑިލޭވެ، އިއްޔެ 11:00 ޖެހިއިރު ވެސް ނުފުރި މަޑުކުރަން ޖެހުނު ކަމަށް އުމްރާވެރިޔާ ބުނެފައިވެއެވެ.
އެކަމާ ގުޅިގެން 'ސަން'އިން ސުވާލުކުރުމުން އެ ގުރޫޕުގެ މެނޭޖިން ޑިރެކްޓަރު ޔާމީން އިދްރީސް ވިދާޅުވީ، އުމްރާވެރީން ފުރަން ހަމަޖެހިފައި އޮތް ސައުދީ އެއާލައިނަށް ދިމާދި މައްސަލައަކާ ގުޅިގެން އެ ގުރޫޕުގެ އުމްރާވެރީންތަކަށް އިއްޔެ ނުފުރުނު ކަމަށެވެ. ނަމަވެސް، ފްލައިޓު ޑިލޭވި ސަބަބެއް ސާފުވެފައެއް ނުވެއެވެ.
ޑިސެންބަރު އުމްރާގައި ގިބްލަ ހައްޖު އެންޑް އުމްރާ ގުރޫޕުގެ ހަވާލުގައި ފްލައިޓު އެކެއްގައި ފުރި އުމްރާވެރިންތަކެއް: އިއްޔެ ފްލައިޓް ޑިލޭވެގެން ނުފުރުނު އުމްރާވެރީން މިއަދު ފުރާނެ ކަމަށް އެ ގުރޫޕުން ވަނީ ބުނެފައި ---- ފޮޓޯ/ ގިބްލަ ހައްޖު އެންޑް އުމްރާ ގުރޫޕް
އިއްޔެ އެ މައްސަލަ ދިމާވުމާ ގުޅިގެން އެއާލައިންގެ ފަރާތުން އުމްރާވެރީންނަށް ތިބެވޭނެ އިންތިޒާމު ހަމަޖައްސައިދިންކަން އޭނާ ފާހަގަކުރެއްވިއެވެ.
"ފްލައިޓުން ނުފުރުނު އުމްރާވެރީންނަށް ފުރެންދެން އިންތިޒާމުތައް ހަމަޖައްސައިދިނީ އެއާލައިންގެ ފަރާތުން، މިރޭ 8:00 ޖަހާއިރު ފްލައިޓް ފުރާނެ ކަމާއި 5:00 ޖެހާއިރު ޗެކިން ފެށޭކަން އެއާއިލުން މިއަދު އަޅުގަނޑުމެނަށް އަންގާފައި ވަނީ،" ޔާމީން އިތުރަށް ތަފުސީލު ކޮށްދެއްވިއެވެ.
އަންނަ ހަފުތާއިން ފެށިގެން ސުކޫލުތައް ބަންދުވާއިރު، ގިނަ ބަޔަކު އަންނަނީ އުމްރާއަށް ފުރަން ތައްޔާރުވަމުންނެވެ.