އެމެރިކާއަށް ސައިބާ ހަމަލާ ދޭ ފަރާތްތަކަށް ހަރުކަށި ފިޔަވަޅު އެޅުމަށް މަސައްކަތް ކުރާނެކަމަށް އެމެރިކާގެ އިންތިޚާބީ ރައީސް ޑޮނަލްޑް ޓްރަމްޕްގެ ޤައުމީ ސަލާމަތީ ލަފާދޭ އެޑްވައިޒަރުކަމަށް އައްޔަންކުރާ މައިކް ވޯލްޓްޒް އާދީއްތަ ދުވަހު ވިދާޅުވެއްޖެއެވެ.
މި ވާހަކަތައް ދައްކަވާފައިވަނީ އެމެރިކާގެ އިސް ސިޔާސީ ފަރާތްތަކުގެ ފޯނު ކޯލްތައް ރެކޯޑުކޮށް، އަޑުއަހާފައިވާކަމަށް ބުނެ ޗައިނާގެ މައްޗަށް ތުހުމަތު ކުރެވިފައިވާ "ސޯލްޓް ޓައިފޫން" ގެ ނަމުގައި މަޝްހޫރުވެފައިވާ ސައިބާ ޖާސޫސީ ހަމަލާއާ ގުޅިގެންނެވެ.
ވައިޓް ހައުސްއިން ބުނެފައިވާ ގޮތުގައި މި ހަމަލާގައި އެމެރިކާގެ މުވާސަލާތީ، އާއި އިންފްރާސްޓްރަކްޗާގެ މަދުވެގެން އަށް ކުންފުންޏަކަށް އަސަރުކޮށް، އެމެރިކާގެ ގިނަ އަދަދެއްގެ ރައްޔިތުންގެ ޒާތީ މައުލޫމާތު ވަގަށް ނަގާފައިވެއެވެ.
ވޯލްޓްޒް ވިދާޅުވީ "ސޯލްޓް ޓައިފޫން" އާ ގުޅިގެން ޓްރަމްޕްގެ އިދާރާއިން އަޅާނެ ވަކި ފިޔަވަޅެއްގެ ވާހަކައެއް ނޫނެވެ. ނަމަވެސް އާ އިދާރާގެ އާންމު އުސޫލުގެ ވާހަކައެވެ.
އޭނާ ވިދާޅުވީ މިހާތަނަށް ވޮޝިންގްޓަނުން ގިނައިން އަހައްމިއްޔަތުކަން ދީފައިވަނީ ސައިބާ ދިފާއަށް ކަމަށެވެ.
"އަޅުގަނޑުމެން ހަމަލާ ދޭން ފަށަންޖެހޭ. އަދި އަޅުގަނޑު ދެކޭގޮތުގައި އަޅުގަނޑުމެންގެ ޑޭޓާ ވަގަށް ނަގައި، އަޅުގަނޑުމެންގެ މައްޗަށް ޖާސޫސް ކުރަމުންދާ އަމިއްލަ ފަރާތްތަކާއި ޤައުމުތަކަށް އިތުރަށް ފިޔަވަޅު އަޅައި، ނަތީޖާ ދައްކުވަން ފަށަންޖެހޭ،" ވޯލްޓްޒް ސީބީއެސް ނިއުސްގެ ފޭސް ދަ ނޭޝަން އަށް ވިދާޅުވިއެވެ.
އޭނާ އިތުރަށް ވިދާޅުވީ އެމެރިކާގެ އަމިއްލަ ޓެކްނޮލޮޖީ ސިނާއަތަށް ވެސް އިދިކޮޅު ފަރާތްތައް ނިކަމެތި ކުރުމަށާއި އެމެރިކާގެ ދިފާއަށް އެހީތެރިވެވިދާނެ ކަމަށެވެ.
ކުރިން ޗައިނާގެ އޮފިޝަލުން މި ތުހުމަތުތަކަކީ ދޮގު މައުލޫމާތު ކަމަށް ބުނެ، "ބެއިޖިންއިން ހުރިހާ ބާވަތެއްގެ ސައިބާ ހަމަލާތަކާއި ސައިބާ ވައްކަމާ ދެކޮޅު" ކަމަށް ބުނެފައިވެއެވެ.