އިނގިރޭސި ޕްރިމިއާ ލީގުގައި ޓޮޓެންހަމް ހޮޓްސްޕާ އާއި ސައުތެމްޕްޓަން ބައްދަލުކުރި މެޗު ސްޕާސް އިން ކާމިޔާބު ކޮށްފިއެވެ.
ސައުތެމްޕްޓަންގެ ދަނޑުގައި ކުޅުނު މިމެޗު ސްޕާސް އިން ކާމިޔާބު ކޮށްފައިވަނީ ފަސް ލަނޑު ސުން ލަނޑުންނެވެ. ސްޕާސްގެ ފަރާތުން މޮޅު ކުޅުމެއް ފެނިގެންދިޔަ މިމެޗުގައި އެޓީމުން ކާމިޔާބުކުރި ހުރިހާ ލަނޑެއް ވެސް ކާމިޔާބު ކޮށްފައިވަނީ ފުރަތަމަ ހާފުގައެވެ.
މިގޮތުން މެޗުގެ ފުރަތަމަ ލަނޑު އެޓީމުން ޖަހާ ލީޑު ނަގައިފާ ވަނީ ފުރަތަމަ މިނެޓުގައެވެ. މިލަނޑު އެޓީމަށް ކާމިޔާބު ކޮށްދިނީ ޖޭމްސް މެޑިސަންއެވެ. ދެވަނަ ލަނޑު މެޗުގެ 12ވަނަ މިނެޓުގައި ކެޕްޓަން ސޮން ހެއުން މިން ކާމިޔާބު ކޮށްދިން އިރު ތިންވަނަ ލަނޑު އޭގެ ދެ މިނެޓް ފަހުން ކާމިޔާބު ކޮށްދިނީ ޑެޔާން ކުލުސޭވްސްކީއެވެ. ސްޕާސް އިން މިމެޗުގައި ކާމިޔާބު ކުރި ހަތަރު ވަނަ ލަނޑު މެޗުގެ 25ވަނަ މިނެޓުގައި ކާމިޔާބު ކޮށްދިނީ ޕެޕޭ މަޓާ ސާއެވެ. އަދި ފަހު ލަނޑު ފުރަތަމަ ހާފުގެ އިތުރު ވަގުތުގެ ފަސްވަނަ މިނެޓުގައި ކާމިޔާބު ކޮށްދިނީ ފުރަތަމަ ލަނޑު ވެސް ކާމިޔާބު ކޮށްދިން މެޑިސަންއެވެ.
މިމެޗުގެ ދެވަނަ ހާފުގައި އިތުރު ލަނޑުތަކެއް ފެނިގެން ހިނގައިދާނެކަމަށް ބެލެވުނު ނަމަވެސް ދެވަނަ ހާފަށް ސައުތެމްޕްޓަންއިން ނިކުމެފައި ވަނީ އެޓީމުގެ ޑިފެންސް އިތުރަށް ވަރުގަދަ ކުރުމާއެކުއެވެ. އަދި ހަމައެއާއެކު ސްޕާސް ފެނިގެންދިޔައީ ފުރަތަމަ ހާފަށް ވުރެ ބޮޑަށް ހަމަޖެހިގެން ކުޅުނު ތަނެވެ.
މި ނަތީޖާ އާއެކު ސްޕާސް މިހާރު އުޅެނީ 23 ޕޮއިންޓާއެކު ތާވަލްގެ 10 ވަނައިގައެވެ. އަދި ސައުތެމްޕްޓަން އުޅެނީ ފަސް ޕޮއިންޓާއެކު އެންމެ ފުލުގައެވެ.
މިނާކާމިޔާބީއާއެކު ސައުތެމްޕްޓަން އިން ވަނީ މެޗަށްފަހު އެޓީމުގެ ކޯޗު ރަސެލް މާޓިން މަގާމުން ވަކިކޮށްފައެވެ. އުމުުން 38 އަހަރުގެ ރަސެލްވަނީ މިދިޔަ ސީޒަންގައި ސައުތެމްޕްޓަންއާ ހަވާލުވެ އެޓިމު ޕްރިމިއާ ލީގަށް ޕްރޮމޯޓް ކޮށްދީފައެވެ.
ނަމަވެސް މިސީޒަންގައި ޕްރިމިއާ ލީގުގައި މިހާތަނަށް މޮޅުވެވިފައި ވަނީ އެންމެ މެޗަކުންނެވެ. އަދި ސްޕާސް އަތުން ބަލިވި މެޗު ވެފައިވަނީ މިސީޒަންގައި ލީގުގައި އެޓިމު ބަލިވި 13ވަނަ މެޗެވެ. ކްލަބުން ހާމަކުރިގޮތުގައި ޕްރިމިއާ ލީގުގެ އުނދަގޫކަން ކްލަބްގެ އެއްމެންނަށް ވެސް އެނގޭ ކަމަށާއި އެހެން ކަމުން ސީޒަން ފެށުމުގެ ކުރިން ފަށައިގެން މިހާތަނަށް ރަސެލް އާއި އޭނާގެ ޓީމަށް މެނޭޖްމަންޓްގެ ފުރިހަމަ އިތުބާރު އޮތް ކަމަށާއި އަދި މާޓިން ކޮށްދީފައިވާ ހިދުމަތަށް ކްލަބުން ޝުކުރުވެރިވާކަމަށެވެ.
މާޓިންގެ ބަދަލުގައި ވަގުތީ ގޮތުން ކޯޗުކަމާ ހަވާލުވާނީ ސައުތެމްޕްޓަންގެ 21 އަހަރުން ދަށުގެ ޓީމުގެ ކޯޗު ސައިމަން ރަސްކްއެވެ.