އދ. ފެންފުށީގައި ގަވާއިދާ ޚިލާފަށް މަގުމަތީގައި ކެއްކުމާއި އެ ނޫން ވެސް ކަންތައްތައް ކުރަމުން އަންނަ މައްސަލަ ބޮޑުވެ، އުސޫލުގެ ދަށުން ފިޔަވަޅު އެޅުމަށް އެ ރަށުގެ ކައުންސިލުން މިއަދު ނިންމައިފިއެވެ.
މި ކަމާއި ގުޅުވާ އެ ކައުންސިލުން މިއަދު ސަރުކާރުގެ ގެޒެޓުގައި ޝާއިއުކޮށްފައިވާ އިއުލާނުގައި ވަނީ އާންމު ތަންތަނަށާއި މަގުމައްޗަށާއި ފަޅުތެރެއަށް ދޫކޮށްލާފައިވާ ތަކެތި ނެގުމާއި، ގޭގެ ގޯތީގައި ނުވަތަ މަގުގައި ހައްދާފައިވާ ގަސްތައް ކޮށައި ބެލެހެޓުމުގެ އުސޫލުގެ ހަތްވަނަ މާއްދާގައިވާ ގޮތުން ފެންފުށީ ކައުންސިލުން ހުއްދަ ނުނަގައި މަގުމަތީގައި ޖޯއްޔާއި ގޮނޑި އަދި މޭޒުފަދަ ތަކެތި ބަހައްޓައިގެން އެއްވެސް ކަމެއް ކުރުމަކީ މަނާކަމެއް ކަމަށެވެ.
ނަމަވެސް މިހާރަކަށް އައިސް ބައެއްފަރާތްތަކުން މަގުމަތީގައި އުނދުންޖައިގެން ކެއްކުމުގެ މަސައްކަތް ކުރަމުންދާކަން އެ ކައުންސިލުން ވަނީ ފާހަގަކޮށްފައެވެ.
މިއީ އެ އުސޫލުގެ 7 ވަނަ މާއްދާގެ ދަށުން މަނާކުރެވިފައިވާ ކަމެއްކަން ރައްޔިތުންނަށް ވަނީ ހަނދާން ކޮށްދީފައެވެ. އަދި މިފަދަ ކަންކަން ނުކުރުމަށް ކައުންސިލުން ވަނީ ނަސޭހަތްތެރިވެފައެވެ.
އެ ކައުންސިލުން ބުނީ މިއަދުން ފެށިގެން އުސޫލުގެ 10 ވަނަ މާއްދާގެ ދަށުން ފިޔަވަޅު އަޅާނެކަމަށެވެ.
މި މަހުގެ ކުރީކޮޅު ގާފަރު ކައުންސިލުން ވެސް ވަނީ އެ ރަށުގައި އާންމުންނަށް އުނދަގޫވާގޮތަށް ހަޓު ހަދައިގެން މަސް ކައްކާ މައްސަލަ ބޮޑުވެ، އެކަމަށް ފިޔަވަޅު އަޅަން ނިންމާފައެވެ.
ގާފަރު ކައުންސިލުން އޭރު ބުނީ ހަޓް ހަދައިގެންނާއި އެހެނިހެން ގޮތްގޮތުން އާންމުންނަށް އުނދަގޫވާގޮތަށް މަސްކެއްކުމުގެ މަސައްކަތް ކުރުމުގެ ސަބަބުން ކައުންސިލަށް ޝަކުވާއެއް ހުށަހެޅިއްޖެނަމަ އެމައްސަލައެއް ބަލައި ހަމަޖެހިފައިވާ އުސޫލުގެމަތިން އެ ފަރާތަކަށް ފިޔަވަޅު އަޅާނެ ކަމަށެވެ.