އެމްޓީސީސީ މެދުވެރިކޮށް ރާއްޖޭގައި ދޭން ފަށާފައިވާ ޒަމާނީ ފެރީގެ ޚިދުމަތް, އަރިއަތޮޅުގައި ފަށަން މަސައްކަތް ކުރަމުން އަންނަ ކަމަށް ރައީސް ޑރ. މުޙައްމަދު މުއިއްޒު މިއަދު ވިދާޅުވެއްޖެއެވެ.
އަރިއަތޮޅަށް މިހާރު ރައީސް ކުރައްވަމުން ގެންދަވާ ދަތުރުފުޅުގެ ތެރެއިން މިއަދު ވަނީ އެ އަތޮޅު ކައުންސިލާ ބައްދަލު ކުރައްވައިފައެވެ. މި ބައްދަލު ކުރެއްވުމުގައި ކައުންސިލުން ވަނީ އެ އަތޮޅުގެ ތަރައްގީއަށް ބޭނުންވެފައިވާ މުހިންމު ކަންކަން ރައީސްއަށް ހުށަހަޅުއްވައިފައެވެ.
ކައުންސިލުން ހުށަހެޅި ކަންކަމުގެ ތެރޭގައި އެ އަތޮޅު ސުކޫލުތަކުގައި ސޯލާ ހަރުކުރުން ހިމެނެއެވެ. އަދި އަތޮޅު ކައުންސިލަށް އާމްދަނީ ހޯދުމަށް މަގުފަހިވާނެ ގޮތަކަށް އދ ލޮނުބޯ، ބޭނުންކުރެވޭނެ ގޮތް ހައްދަވައިދެއްވުމަށާއި އަތޮޅުގެ ޞިއްޙީ ޚިދުމަތް ތަރައްޤީކުރުމަށާއި ދަތުރުފަތުރުގެ ނިޒާމު ހަރުދަނާކުރުމަށާއި ފަތުރުވެރިކަން ފުޅާކުރުމަށް ބޭނުންވާކަން ވަނީ ފާހަގަ ކުރައްވައިފައެވެ. މީގެ އިތުރުން އަތޮޅު ކައުންސިލުން ވަނީ އަތޮޅުގައި ޕިކްނިކް ދާނެ ރަށްތައް މަދުކަން ފާހަގަކުރައްވައި އެކަން ފަހިކޮށްދެއްވުމަށް އެދިވަޑައިގެންފައެވެ.
ރައީސް ޑރ. މުޙައްމަދު މުއިއްޒު އަރިއަތޮޅު ކައުންސިލާ ބައްދަލު ކުރެއްވުން-- ފޮޓޯ: ރައީސް އޮފީސް
ކައުންސިލުން އެދުނު ކަންކަމަށް ޖަވާބު ދެއްވަމުން ރައީސް ވިދާޅުވީ އެ އަތޮޅުގައި އާރްޓީއެލްގެ ޚިދުމަތް ފެށުމަށް މަސައްކަތް ކުރައްވަމުން ގެންދަވާ ކަމަށެވެ. އަދި ދެންވެސް ކައުންސިލުން ފާހަގަކުރެއްވި ކަންކަން ބައްލަވާނެކަމަށް އެ މަނިކުފާނު ވަނީ ބައްދަލުވުމުގައި ވިދާޅުވެފައެވެ.
އާރްޓީއެލްގެ ޚިދުމަތަކީ ނިމިދިޔަ އެމްޑީޕީ ސަރުކާރުން، މުޅި ރާއްޖެ ފެރީގެ ނިޒާމުން ގުޅައިލުމަށްޓަކައި އެމްޓީސީސީއާ ހަވާލުކޮށްގެން ކުރިއަށްގެންދާ ޕްރޮޖެކްޓެކެވެ.
އާރްޓީއެލްގެ ދަށުން މުޅި ރާއްޖެ ހަ ޒޯނަކަށް ބަހާލައި ބައެއް ޒޯންތަކުގައި ހިމެނޭ ރަށްތަކަށް ކަނޑައެޅޭ ތާވަލެއްގެ ދަށުން މިހާރުވެސް އާރުޓީއެލްގެ ޚިދުމަތް އަންނަނީ ދެމުންނެވެ.
ރައީސްގެ މި ބައްދަލުކުރެއްވުން ކުރިއަށްދިޔައީ އަރިއަތޮޅު ދެކުނުބުރީ އަތޮޅު ކައުންސިލުގެ އިދާރާގައެވެ.