އެއްފަހަރާ ފުލުފުލުގައި ފިލްމުތަކަށް ސޮއިކޮށް ފިލްމު ތަކުގައި މަސައްކަތް ކުރުމުގެ ވިސްނުން މިހާރު ނުގެންގުޅޭ ކަމަށް ކާމިޔާބު ފްރެންޗައިސް "އިސްތިރީ"ގެ ބަތަލާ ޝްރައްދާ ކަޕޫރު ބުނެފިއެވެ.
މި އަހަރު ރިލީޒްކޮށް ބޮކްސް އޮފީހުގައި ބޮޑު ކާމިޔާބީއެއް ހޯދި "އިސްތިރީ 2"ގެ ބަތަލާ އަކީ މިވަގުތު އިންޑަސްޓްރީގައި ތިބި އެންމެ ޑިމާންޑު ބޮޑު ބަތަލާއިންގެތެރޭ ހިމެނޭ ތަރިއެކެވެ. ފިލްމު އިންޑަސްޓްރީގެ 13 އަހަރުގެ ކެރިއަރުގައި ވަރަށް ގިނަ ފިލްމުތަކުގައި ތަފާތު އެކި ރޯލްތަކުން މިހާތަނަށް ޝްރައްދާ ވަނީ ބެލުންތެރިންނަށް ފެނިފައެވެ.
ސަޢުދީ ޢަރަބިއްޔާގައި ކުރިއަށްދާ ރެޑް ސީ ފިލްމު ފެސްޓިވަލް 2024ގައި ވާހަކަ ދައްކަމުން ޝްރައްދާ ބުނީ ކެރިއަރުގެ އެންމެ ކާމިޔާބު އަދި އުއްމީދީ އަހަރުތައް ކުރިއަށް އޮތީ ކަމަށެވެ. ޝްރައްދާ މިހެން ބުނީ ކުރިމަގުގައި ވަރަށް ތަފާތު ފިލްމުތަކާއި ރޯލްތައް ކުޅުމުގެ ޝައުގުވެރިކަން ބަތަލާގެ ހުރިކަމަށް ބުނަމުންނެވެ.
ބަތަލާ ޝްރައްދާ ކަޕޫރު ހޮލީވުޑް އެކްޓަރު އެންޑްރޫ ގާފީލްޑްއާ އެކީގައި--ފޮޓޯ/ޕިންކްވިލާ
ގިނަ ފިލްމުތަކުން ބަތަލާއަށް ފުރުސަތު ލިބުނު ނަމަވެސް އެ ހުށަހަޅާ ރޯލަކީ ބަތަލާއަށް ކަމުނުދާކަހަލަ ރޯލެއްކަން އެނގި އެފަދަ ސިގުނަލެއް ލިބުމާ އެކު އެ ފިލްމަކަށް އިންކާރުކުރާ ކަމަށާއި ފުލުފުލުގައި ފިލްމުތައް ކުޅެން މިހާރު ބޭނުންނުވާ ކަމަށް ޝްރައްދާ ވަނީ ބުނެފައެވެ. އެއަށްވުރެ ބޮޑަށް ބަތަލާ ބޭނުންވަނީ ވީހާވެސް ޗެލެންޖިންގް ރޯލްތައް ހުންނަ ފިލްމުތަކަށް އިސްކަން ދިނުމަށް ކަމަށް ރެޑް ސީ ފިލްމު ފެސްޓިވަލްގައި ޝްރައްދާ ވަނީ ބުނެފައެވެ.
ފިލްމު "އާޝިޤީ 2"އިން ބޮލީވުޑަށް ތަޢާރަފްވި ބަތަލާ އެންމެ ފަހުން ސޮއިކުރިކަމަށް ރިޕޯޓުތަކުން ބުނެފައި ވަނީ "ނާގިން"ގެ ނަމުގައި އުފައްދާ ޓްރިލޮޖީ ފިލްމެކެވެ. ނަމަވެސް މިހާތަނަށް މި ފިލްމުގެ މަސައްކަތް ވަނީ ނުފެށިފައެވެ. ފިލްމު "އިސްތިރީ 2"ގެ ކާމިޔާބީއަށްފަހު ޝްރައްދާ ވަނީ މި ފްރެންޗައިސްގެ ތިން ވަނަ ބައެއް އުފައްދާނެކަން އިއުލާނުކޮށްފައެވެ.