ކުރީގެ ރައީސް މުހައްމަދު އަމީން ދީދީއާ މެދު އަމަލުކުރި ގޮތަށް ރައީސް ޑރ. މުޙައްމަދު މުއިއްޒާ މެދު ވެސް އަމަލުކުރަން ޖެހޭ ކަމަށް އެމްޑީޕީން ބުނުމާ ގުޅިގެން، ހެލްތު މިނިސްޓަރު އަބްދު ﷲ ނާޒިމް ނުރުހުން ފާޅުކުރައްވައި، އެއީ ލީޑަރުންގެ ވިސްނުން ހުންނަން ޖެހޭނެ ގޮތެއް ނޫން ކަމަށް ވިދާޅުވެއްޖެއެެވެ.
އެމްޑީޕީން ހޯމަ ދުވަހު ބޭއްވި ނޫސްވެރިންގެ ބައްދަލުވުމެއްގައި އެ ޕާޓީގެ ޗެއާޕާސަން ފައްޔާޒު އިސްމާއީލް ވަނީ ރައްޔިތުންނަށް އަނިޔާވެރިވެއްޖެ ނަމަ ރައްޔިތުން ވެސް އަނިޔާވެރިވާނެ ކަމަށް ވިދާޅުވެފައެވެ. އަދި އެކަމުގައި ތާރީޚުގެ ފޮތްތަކަށް ބަލާނެ ކަމަށް ވެސް އޭނާ ވިދާޅުވިއެވެ.
މިއަހަރުގެ އިންސާނީ ހައްގުތަކުގެ ދުވަހުގެ މުނާސަބަތުގައި ބޭއްވި ޖަލްސާގައި އެ ވާހަކައާ ގުޅުވައި ނާޒިމް ވިދާޅުވީ، އަމީން އަވަހާރަކޮށްލީ ސިޔާސީ ބަޔެއްގެ ސިޔާސީ މަސައްކަތުން ކަމަށެވެ.
"އެއީ ހުއްޖަތަކަށް ދައްކަވައިގެން އެ މައުޟޫއު ނަންގަވައިގެން، މިއަދު މިއީ ދިވެހިރާއްޖޭގެ އިންސާނީ ހައްގުތަކުގެ ދުވަސް ދިވެހި ދައުލަތުގެ މުއައްސަސާތަކުގެ ބައެއް ވެރިން ނުކުމެ އަޅުގަނޑުމެންގެ އެންމެ ފުރަތަމަ ރައީސް މުހައްމަދު އަމީންގެ މިސާލުން މިސާލު ނަންގަވައި މިއަދު ރައީސުލްޖުމްހޫރިއްޔާއަށް އެ މަގުން ކަން ކުރަން ޖެހޭނެ ކަމަށް ބުނުން އެއީ އަޅުގަނޑު ކުށްވެރިކުރާ ކަމެއް،" އޭނާ ވިދާޅުވިއެވެ.
ނާޒިމް ވިދާޅުވީ، އެފަދަ ގޮތަކަށް ފާޅުކަން ބޮޑުކޮށް ވާހަކަ ދައްކާއިރު، ދައުލަތެއްގެ ގޮތުގައި އިންސާނީ ހައްގުތައް ހޯދަން ކުރާ މަސައްކަތަކީ ކޮބައިކަމާ މެދު ސުވާލު އުފެދޭ ކަމަށެވެ.
ދައުލަތެއް ދައުލަތަކަށް ވަނީ އެ ދައުލަތެއްގެ ހުރިހާ މުއައްސަސާތަކެއް ގުޅިލާމެހިގެން ކަމަށާއި އެކަމުގައި ޝާމިލްވާނީ ހަމައެކަނި މިނިސްޓްރީތަކާއި ކައުންސިލްތަކާއި މިނިވަން މުއައްސަސާތައް ނޫންކަން އޭނާ ފާހަގަކުރެއްވިއެވެ.
"އަޅުގަނޑު ކުރިން އިޝާރާތް ކުރި މުޅި ގަވަނަންނަންސް މެކޭނިޒަމް އޭގެ ތެރޭގައި ޝާމިލުވާ ސިޔާސީ ޕާޓީތަކުގެ މަސައްކަތް އޭގެ ހަމަ މަގުން ރަނގަޅު މަގުން ނުގެންދެވި، އަޅުގަނޑުމެންގެ އިންސާނީ ހައްގުތައް ކަށަވަރުކުރުން އުޅޭ އުޅުން ވާނީ ފޫނެތް ފަޔަށް ފެން ފުރަން އުޅުން ފަދަ ކަމަކަމަށް،" ނާޒިމް ވިދާޅުވިއެވެ.
އެމްޑީޕީން ބޭއްވި ނޫސްވެރިންގެ ބައްދަލުވުން: އެ ނޫސްވެރިންގެ ބައްދަލުވުމުގައި ފައްޔާޒު، ރައީސް އަމީނާ ގުޅޭ ގޮތުން ދެއްކެވި ވާހަކައަށް ވަނީ ފާޑުކިޔުން އަމާޒުވެފައި -- ފޮޓޯ/ އެމްޑީޕީ
އޭނާ ވިދާޅުވީ އިންސާނީ ހައްގުތަކުގެ ދުވަހު އެފަދަ ވާހަކައެއް ދެއްކުމަކީ ހިތާމަކުރާ ކަމެއް ކަމަށާއި އެއީ މި ގައުމުން ދެކެން ބޭނުންވާ މަންޒަރެއް ނޫން ކަމަށެވެ.
އިންސާނީ ހައްގުތަކަށް އިޙުތިރާމް ކުރުން ފަދަ ކަންކަމަކީ ހަމައެކަނި ގާނޫނުތަކުން ތަންފީޒު ކުރެވޭނެ ކަމެއް ކަމަށް ދެކުން މާޒީވެއްޖެ ކަމަށާއި މިކަމުގައި އެންމެ މުހިންމު ދައުރެއް އަދާކުރަނީ އިންސާނުންގެ ދިރިއުޅުމާއި އެމީހުންގެ ވިސްނުމަށް އަންނަ ބަދަލުތައް ކަމަށް ނާޒިމް ވިދާޅުވިއެވެ.
"ލީޑަރުންގެ ގޮތުގައި ސިޔާސީ މަޝްރަހުން ރައްޔިތުންނަށް މަގު ދައްކަން ތިބި މީހުންގެ ވިސްނުން މި މަގުން ހުރެގެން އަޅުގަނޑުމެން މި ހާސިލުކުރަން ބޭނުންވާ ހިއުމަން ރައިޓްސްގެ އަސާސްތަކެއް އަޅުގަނޑުމެނަކަށް ހާސިލެއްނުވެވޭނެ،" އޭނާ ވިދާޅުވިއެވެ.
އެހެންވެ، މީހުންގެ ވިސްނުމާއި ފިކުރަށް ބަދަލު އައިސްގެން ނޫނީ އިންސާނީ ހައްގުތަކުގެ ރޮނގުން ހާސިލުކުރަން ޖެހޭ ލަނޑުދަނޑިތައް ހާސިލްނުކުރެވޭނެ ކަމަށާއި މި މަސައްކަތުގެ އެންމެ މުހިންމު އެއް ބަޔަކީ ގާނޫނުތައް ތަންފީޒު ކުރުމަށް ވުރެ، މީހުންގެ ވިސްނުމަށް ބަދަލު ގެނައުން ކަމަށް ހަދަން ޖެހޭ ކަމަށް ނާޒިމް ވިދާޅުވިއެވެ.
ފައްޔާޒު ދެއްކެވި ވާހަކައިގައި ވަނީ، ރައްޔިތުންނަށް ދެރަގޮތްވީމާ ހަދަންޖެހޭނީ އަމީނަށް ހެދިހެން ނޫން ކޮން ގޮތަކުންތޯ ސުވާލު އުފައްދަވައިފައެވެ. އޭގެ ކުރިން ކުޅުދުއްފުށި ސިޓީގައި އެ ޕާޓީން ބޭއްވި ޖަލްސާއެއްގައި ވެސް ވާހަކަ ދެއްކި މީހަކު ވަނީ، ރައީސް އަމީންގެ ވެރިކަމުގެ ނިމުމާ މި ސަރުކާރާ ގުޅުވައި ވާހަކަ ދައްކައިފައެވެ.
އެ މައްސަލައިގައި ޕީއެންސީން ވަނީ ރައްޔިތުންގެ މަޖިލީހުގައި ނުރުހުން ފާޅުކޮށް، ކަމާ ގުޅުން ހުރި މުއައްސަސާތަކުން މައްސަލަ ބަލަން ގޮވައިލައިފައެވެ.
މީގެ އިތުރުން ހިއުމަން ރައިޓްސް ކޮމިޝަން (އެޗްއާރުސީއެމް)އިން ނެރުނު ބަޔާނެއްގައި ވެސް ވަނީ އެއީ އާންމުންގެ މެދުގައި ނަފުރަތު އުފައްދައި އަނިޔާވެރިވުމަށް ހިތްވަރު ލިބޭ ގޮތަށް ދައްކައިފައިވާ ވާހަކަތަކެއް ކަމަށް ބުނެ، އެފަދަ އަމަލުތައް ނުކުރުމަށް ގޮވާލައިފައެވެ.