ޔުނައިޓެޑްހެލްތުކެއާގެ ސީއީއޯ ބްރައިން ތޮމްޕްސަން މަރާލި ކަމަށް ޝައްކު ކުރެވޭ މީހާ ހައްޔަރުކޮށްފައިވާ ކަމަށް ނިއުޔޯކް ޕޮލިސް ޑިޕާޓްމަންޓް (އެންވައިޕީޑީ) އިން ބުނެފިއެވެ.
އެންވައިޕީޑީގެ ކޮމިޝަނަރު ޖެސިކާ ޓިޝް ހޯމަ ދުވަހު ވިދާޅުވީ އެ މީހާއަކީ ޕެންސިލްވޭނިއާގެ އަލްޓޫނާގެ މެކްޑޮނަލްޑްސް ރެސްޓޯރެންޓެއްގެ މަސައްކަތްތެރިއެއް ކަމަށެވެ.
އެ މަރުގެ ތުހުމަތުގައި ހައްޔަރުކޮށްފައި ވަނީ އުމުރުން 26 އަހަރުގެ ލުއިޖީ ނިކޮލަސް މަންޖިއޯނޭއެވެ. އޭނާ ހައްޔަރުކުރިއިރު އޭނާގެ އަތުގައި އޮޅުވާލާފައިވާ އެތައް އައިޑީއަކާއި އެމެރިކާގެ ޕާސްޕޯޓެއް އޮތް ކަމަށާއި، އޭގެތެރެއިން އެއް އައިޑީ، ތޮމްޕްސަން މަރާލުމުގެ ކުރިން ނިއު ޔޯކު ސިޓީ ހޮސްޓެލަކަށް ޗެކްއިން ކުރުމަށް ބޭނުންކޮށްފައިވާ އައިޑީއާ ދިމާވާ ކަމަށް ވެސް ފުލުހުންނާ ހަވާލާދީ އަލް ޖަޒީރާއިން ރިޕޯޓުކޮށްފައިވެއެވެ. ހައްޔަރުކުރިއިރު، އޭނާގެ އަތުން ބަޑިއަކާ މާސްކެއް ވެސް ފެނިފައިވެއެވެ.
ޝައްކުކުރެވޭ މީހާ ހައްޔަރުކޮށްފައި ވަނީ އުމުރުން 50 އަހަރުގެ ތޮމްޕްސަން ކޮންފަރެންސެއްގައި ބައިވެރިވަމުން ދިޔަ މިޑްޓައުން މެންހަޓަންގެ ހޮޓަލެއްގެ ބޭރުގައި ބަޑިޖަހައި މަރާލިތާ ފަސް ދުވަސް ފަހުންނެވެ.
ތޮމްޕްސަންއަށް ބަޑީގެ ހަމަލާ ދިނުމަށްފަހު، އެމީހާ ވަނީ ނިއު ޔޯކު ސިޓީން ފިލާފައި ކަމަށް ފުލުހުން މީގެކުރިން ރިޕޯޓުކޮށްފައިވެއެވެ. ހައްޔަރުކުރުމުގެ ކުރިން މަންޖިއޯނޭ އެންމެ ފަހުން ފެނިފައި ވަނީ މެންހަޓަންގެ ބަސް ޓާމިނަލެއް ކައިރިންނެވެ.
ހަމަލާދިން މީހާގެ ކަމަށް ބެލެވޭ މީހާގެ ދަބަހެއް ފަހުން ސެންޓްރަލް ޕާކުން ފެނިފައިވާއިރު، ފުލުހުން ވަނީ އެކަމުގެ އިތުރު ހެކިތައް ހޯދުމުގެ މަސައްކަތްކޮށްފައެވެ.
އުމުރުން 50 އަހަރުގެ ތޮމްޕްސަން މަރާލާފައި ވަނީ ބުދަ ދުވަހުގެ ހެނދުނުގެ ވަގުތެއްގައި ނިއުޔޯކް ހިލްޓަން މިޑްޓައުން ހޮޓަލުގެ ބޭރުގައި ދިން ހަމަލާއެއްގައެވެ.
ތޮމްޕްސަން ޔުނައިޓެޑް ހެލްތުކެއާއާ ގުޅުނީ 2004ވަނަ އަހަރުއެވެ. ކުންފުނީގެ ސީއީއޯގެ މަގާމު އަދާކުރަން ފެށީ 2021ވަނަ އަހަރުން ފެށިގެންނެވެ. އޭނާއަކީ ކުންފުނީގެ އެކްޒެކްޓިވުންގެ ތެރެއިން އެންމެ ބޮޑު އާމްދަނީއެއް ލިބޭ އެކަކެވެ.
ޔުނައިޓެޑް ހެލްތްކެއާ އަކީ އެމެރިކާގެ އެންމެ ބޮޑު އެއް ހެލްތު އިންޝުއަރެންސް ކުންފުންޏެވެ. އެ ކުންފުނިން އެމެރިކާގެ 49 މިލިއަނަށް ވުރެ ގިނަ މީހުންނަށް ހެލްތު ކަވަރޭޖް ފޯރުކޮށްދެއެވެ.