އިންޑިއާގެ ގޭޓްވޭ ސަރަހައްދުގެ ޖެޓީ ކައިރިން ބަތަލާ އާލިއާ ބަޓް އާދައިގެ އޮޓޯ ރިކްޝާއެއްގައި ދަތުރު ކުރަމުންދާ މަންޒަރު ހިމެނޭ ވީޑިއޯއެއް ސޯޝަލް މީޑިއާގައި ދައުރުވާން ފެށުމުން ގިނަ ބައެއްގެ ސަމާލުކަން އެ ވީޑިއޯއަށް އަންނަނީ ލިބެމުންނެވެ.
ގޭޓްވޭ އޮފް އިންޑިއާގެ ޖެޓީ ސަރަހައްދުން އާލިއާ ފެނުމާއެކު އެ ހިސާބުގައި ތިބި ނޫސްވެރިންގެ ބަޔަކު ވަނީ ބަތަލާއާ އެކު ފޮޓޯ ނެގުމަށް މަސައްކަތްކޮށްފައެވެ.
އެހެންނަމަވެސް ވަރަށް އަވަސް އަވަހަށް އެ ހިސާބުގައި އޮތް އޮޓޯ ރިކްޝާއަކަށް އެރުމަށްފަހު އާލިއާ އެތަނުން ދިޔަކަމަށް ރިޕޯޓުތައް ބުނެއެވެ. މަންޒަރު ދުށް މީހުން ބުނިގޮތުގައި އާލިއާއާ އެކު ބަތަލާގެ ސެކިއުރިޓީ ގާޑް ވެސް އެ އޮޓޯއަށް އެރިއެވެ.
އާލިއާ އޮޓޯގައި ދަތުރުކުރި މަންޒަރު ހިމެނޭ ވީޑިއޯ ސޯޝަލް މީޑިއާގައި ދައުރުވާން ފެށުމުން ގިނަ ބަޔަކު ވަނީ އަގުބޮޑު ލަގްޒަރީ ކާރު ދޫކޮށްލުމަށްފަހު އާދައިގެ އޮޓޯ ރިކްޝާގައި ދަތުރުކުރުމުން ބަތަލާއަށް ވަރަށް ބޮޑަށް ތައުރީފުކޮށްފައެވެ.
އާލިއާ ބަޓް އޮޓޯ ރިކްޝާގައި ދަތުރުކުރަނީ--ފޮޓޯ/ޕިންކްވިލާ
އެއްބަޔަކު އާލިއާގެ ހިތްތިރި ކަމަށް ތައުރީފު ކުރުމުން އެ ހިސާބުގެ މަގުތައް އޮންނަ ގޮތުން އޮޓޯގައި ދަތުރުކުރުމަކީ ވެސް ފަސޭހަ ކަމެއް ނޫންއިރު ބޮޑު ރޭންޖް ރޯވާ ކާރެއް އެ މަގުގައި ދުއްވާނެ ގޮތަކާ މެދު ބައެއް މީހުން ވަނީ ސުވާލު އުފައްދާފައެވެ.
އެހިސާބުގެ ޖެޓީއާ ހަމައަށް އާދައިގެ ކާރެއްގައި ދަތުރު ކުރުމަކީ ވެސް ދަތި ކަމަކަށްވާއިރު އޮޓޯއެއްގައި ދަތުރުކުރުން ނޫންގޮތެއް ނޯންނާނެތީ އާލިއާ އެގޮތް ހިޔާރުކުރީ ކަމަށް ބައެއް މީހުން ވަނީ ބުނެފައެވެ.
އާލިއާ އެންމެ ފަހުން ބެލުންތެރިންނަށް ފެނިފައި ވަނީ މިދިޔަ ހުކުރު ދުވަހު ނެޓްފްލިކްސްގައި ޕްރީމިއާކުރި ފިލްމު "ޖިގްރާ"އިންނެވެ.