މި އަންނަ އަހަރު އެމެރިކާގައި ބޭއްވުމަށް ހަމަޖެހިފައިވާ ފީފާ ކްލަބް ވޯލްޑް ކަޕްގެ ގުރުއަތުލުން ރޭ ބާއްވައިފިއެވެ.
ފީފާއިން ގިނަ ބަދަލު ތަކެއް ގެނެސްފައިވާ މިމުބާރާތުގެ ގުރުއަތުލުން ބާއްވާފައިވަނީ އެމެރިކާގެ މައޭމީގެ ދެ ތަނެއްގައެވެ. ނުވަދިހަ މިނެޓަށް ދެމިގެންދިޔަ މިރަސްމިއްޔާތުގައި ކްލަބް ވޯލްޑް ކަޕްގެ އާ ތަށި ދައްކާލުން އޮތެވެ. މި ރަސްމިއްޔާތުގައި އެމެރިކާގެ ރިޔާސީ އިންތިހާބު ކާމިޔާބު ކުރައްވާ އެ ޤައުމުގެ ރައީސްއަށް ދެން ވެވަޑައިގަންނަވާ ޑޮނާލްޑް ޓްރަމްޕްގެ ވީޑިއޯ މެސެޖެއް ދެއްވިއެވެ. އަދި ގުރުއަތުލުމުގައި ފުރަތަމަ ޓީމު ނަންގަވާ ދެއްވީ ޓްރަމްޕްގެ ދަރިކަނބަލުން އިވާންކާއެވެ.
މި މުބާރާތް ބާއްވަމުން އައީ ދުނިޔޭގެ ހަ ބައިނަލްއަޤްވާމީ ފުޓްބޯޅަ ފެޑެރޭޝަންތަކުގެ ޗެމްޕިއަން ކްލަބާއި މުބާރާތް ބާއްވާ ޤައުމުގެ ޓީމަކާއެކު ހަތް ޓީމުގެ މެދުގައެވެ. ނަމަވެސް ފީފާ ކްލަބް ވޯލްޑް ކަޕް މިހާރު ވަނީ މުބާރާތުގެ 24 އަހަރުވީ ތާރީހްގައި ފުރަތަމަ ފަހަރަށް 32 ޓީމް ވާދަކުރާ ބޮޑު މުބާރާތަކަށް ބަދަލުކޮށްފައެވެ. އަދި މި އަންނަ އަހަރުގެ ޖޫން މަހުގެ 15 އިން ޖުލައި މަހުގެ 13 އަށް ބާއްވާ މުބާރާތް އެމެރިކާގެ 12 ސްޓޭޑިއަމްއެއްގައި ކުޅެވިގެންދާނެއެވެ.
ފީފާ ވޯލްޑް ކަޕެކޭ އެއް ފޯމެޓަށް ކުޅުމަށް ހަމަޖެހިފައިވާ މިމުބާރާތަށް ޓީމުތައް ނަގާފައިވާ ގޮތަށް ބަލާއިރު ޔޫރަޕްގެ ފުޓްބޯޅަ ޖަމިއްޔާ ޔުއޭފާއަށް ނިސްބަތްވާ 12 ޓީމަށް ފުރުސަތު ދީފައިވާއިރު ދެކުނު އެމެރިކާ ސަރަހައްދުގެ ކޮންމެބޯލްއަށް ނިސްބަތްވާ ހަ ޓީމް ހިމެނިގެންދެއެވެ. މީގެއިތުރުން އޭޝިއާގެ އޭއެފްސީ، އެފްރިކާގެ އޭއެފްސީ އަދި އުތުރު، މެދުތެރޭ އެމެރިކާ އާއި ކެރީބިއަން ކޮންކާކަފް އިން ކުރެ ކޮންމެ ފެޑެރޭޝަނަކުން ހަތަރު ޓީމް، އޯޝޭނިއާ ސަރަހައްދުގެ އޯއެފްސީ އިން އެއް ޓީމް އަދި މުބާރާތް ބާއްވާ ޤައުމު ތަމްސީލް ކުރާ ޓީމެއް ހިމެނެއެވެ.
ފުޓްބޯޅައިގެ ދުނިޔޭގައި ފާހަގަ ކޮށްލެވޭ ގިނަ ފަރާތްތަކެއް ފެނިގެންދިޔަ މިރަސްމިއްޔާތުގައި ގުރުއަތުލުން ނެގިގެން ދިޔަ ގޮތް ތިރީގައި ފާހަގަ ކޮށްލަމެވެ.
ގްރޫޕް އޭ: ޕަލްމެއިރާސް، އެފްސީ ޕޯޓޯ، އަލް އަހްލީ އަދި އިންޓާ މައޭމީ.
ގްރޫޕް ބީ: ޕެރިސް ސެއިންޓް ޖާމެއިން، އެޓްލެޓިކޯ މެޑްރިޑް، ބޮޓަފޯގޯ އަދި ސިއާޓްލް ސައުންޑާސް.
ގްރޫޕް ސީ: ބަޔޭން މިޔުނިކް، އޯކްލަންޑް ސިޓީ، ބޮކަ ޖޫނިއާސް އަދި ބެންފީކާ.
ގްރޫޕް ޑީ: ފްލަމެންގޯ، އެސްޕެރަންސް ސްޕޯޓިވް ޑެ ޓޫނީސީ، ޗެލްސީ އަދި ކްލަބް ލެއޮން.
ގްރޫޕް އީ: ރިވާ ޕްލޭޓް، އުރާވާ ރެޑް ޑައިމަންޑްސް، މޮންޓެރޭ، އިންޓާ މިލާން.
ގްރޫޕް އެފް: ފުލުމިނެންސޭ، ޑޮރޫޝިއާ ޑޯޓްމުންޑް، އުލްސާން، މަމެލޯޑީ ސަންޑައުންސް.
ގްރޫޕް ޖީ: މެންޗެސްޓާ ސިޓީ، ވައިޑާޑު، އަލް އައިން އަދި ޔުވެންޓަސް.
ގްރޫޕް އެޗް: ރެއާލް މެޑްރިޑް، އަލް ހިލާލް، ޕަޗޫކާ އަދި ސާލްޒްބާގް.
މި މުބާރާތުގެ ފުރަތަމަ މެޗުގައި ބައްދަލުކުރުމަށް ހަމަޖެހިފައިވަނީ އެމެރިކާއަށް ނިސްބަތްވާ ޓީމް ކަމަށްވާ އަދި ލިއޮނެލް މެސީ ކުޅެމުންދާ އިންޓާ މައޭމީ އާއި މިސްރަށް ނިސްބަތްވާ އަލް އަހްލީއެވެ. މިމެޗު ކުޅުމަށް ހަމަޖެހިފައިވަނީ މައޭމީގެ ހާޑް ރޮކް ސްޓޭޑިއަމްގައެވެ.
މި މުބާރާތުގެ ގްރޫޕް މަރުހަލާގައި ކޮންމެ ޓީމެއް ކޮންމެ ޓީމަކާ ބައްދަލުކޮށް އެންމެ ގިނަ ޕޮއިންޓް ހޯދާ ދެ ޓީމު ނޮކް އައުޓް މަރްހަލާއަށް ދަތުރު ކުރާނެއެވެ. މިހާތަނަށް މި މުބާރާތުގެ އެންމެ އެންމެ ކާމިޔާބު ޓީމަކީ ފަސް ފަހަރު ކާމިޔާބު ކޮށްފައިވާ ރެއާލް މެޑްރިޑެވެ. އެ ޓީމު މުބާރާތް ފެށުމަށް ހަމަޖެހިފައިވަނީ ސައުދީ ޕްރޯ ލީގުގެ ޗެމްޕިއަން އަދި އެ ޓީމަށް ބްރެޒިލްގެ ނޭމާ ކުޅެމުންދާ އަލް ހިލާލް އާ ދެކޮޅަށެވެ. ނަމަވެސް އެންމެ ފަހުން މި މުބާރާތް ބޭއްވިފައިވަނީ މިދިޔަ އަހަރު ކަމުން އެންމެ ފަހުގެ ޗެމްޕިއަނުންގެ ހައިސިއްޔަތުން މިއަންނަ އަހަރުގެ މުބާރާތުގައި ވާދަ ކުރާނީ މެންޗެސްޓާ ސިޓީއެވެ.