މި އަހަރުގެ ބާ އިމްތިހާނުގައި ބައިވެރިވި ބައިވެރިންގެ ތެރެއިން ފާސްވީ 57 އިންސައްތަ ކަމަށް ބާ ކައުންސިލުން މިއަދު ބުނެފިއެވެ.
ބާ ކައުންސިލުން އޮކްޓޯބަރު 12ގައި ބޭއްވި މިއަހަރުގެ އިމްތިހާނުގެ ނަތީޖާ މިއަދު ވަނީ ދޫކޮށްފައެވެ.
ދިވެހިރާއްޖޭގެ ގާނޫނީ ފަންނުގެ ގާނޫނުން ބާ ކައުންސިލަށް މަތިކޮށްފައިވާ މަސްއޫލިއްޔަތުތަކުގެ ތެރޭގައި ހިމެނޭ ބާ އިމްތިހާނަކީ ގާނޫނީ ފަންނު އިތުރަށް ހަރުދަނާކުރުމަށްޓަކައި، ގާނޫނީ ފަންނާ އަލަށް ގުޅޭ ފަރާތްތަކަކީ ގާނޫނީ ޚިދުމަތެއް ފޯރުކޮށްދިނުމަށް ގާބިލު ބައެއްކަން ކަށަވަރުކުރުމުގެ ބޭނުމުގައި ދިވެހިރާއްޖޭގެ ބާ ކައުންސިލުން ބާއްވާ އިމްތިހާނެކެވެ.
މި އިމްތިހާނުގައި ހަ ދާއިރާއަކުން ބައިވެރިންގެ ކިބާގައި ގާނޫނީ ދާއިރާއަށް ވަނުމަށް ބޭނުންވާ އިލްމާއި، ހުނަރު ހުރި މިންވަރު ވަޒަންކުރެވިގެންދެއެވެ.
އިމްތިހާނު ކުރެވޭ ދާއިރާތަކަކީ:
- ކޮންޓްރެކްޓް ލޯ އެންޑް ޕްރެކްޓިސް
- ކްރިމިނަލް ލޯ އެންޑް ޕްރޮސީޖާ
- ލޭންޑް ލޯ އެންޑް ޕްރެކްޓިސް
- ކޮންސްޓިޓިއުޝަނަލް އެންޑް އެޑިމިނިސްޓްރޭޓިވް ލޯ
- ޓޯޓް ލޯ
- މޯލްޑިވިއަން ލީގަލް ސިސްޓަމް
މި އަހަރުގެ އިމްތިހާނުގައި 183 ކެންޑިޑޭޓުން ވަނީ ބައިވެރިވެފައެވެ. މިއަހަރުގެ އިމްތިހާނުގައި ބައިވެރިވެ ގާނޫނީ ދާއިރާއަށް ވަނުމަށް ބޭނުންވާ މިނިމަމް ކޮމްޕިޓެންސީ ތްރެޝްހޯލްޑް ހާސިލުކޮށް، އިމްތިހާނުން ފާސްވެފައިވަނީ 57 އިންސައްތަ ބައިވެރިން ކަމަށް ބާ ކައުންސިލުން ބުންޏެވެ.
އިމްތިހާނުގައި ބައިވެރިވި ކެންޑިޑޭޓުންގެ 85 އިންސައްތައަކީ ރާއްޖޭގައި މަތީ ތައުލީމު ފޯރުކޮށްދޭ މަރުކަޒުތަކުން ލޯ ޑިގްރީ ހާސިލުކޮށްގެން މި އިމްތިހާނުގައި ބައިވެރިވެފައިވާ މީހުންނެވެ. އަދި ބާކީ 15 އިންސައްތައަކީ ބޭރުގެ ޔުނިވަސިޓީތަކުން ތައުލީމު ހާސިލުކޮށްފައިވާ މީހުންނެވެ.
އިމްތިހާނުގައި އެންމެ މަތީ ދަރަޖަތައް ހާސިލުކޮށްފައިވާ ފަރާތްތައް:
- އަލީ ޖަޒީލް އަހުމަދު - ދިވެހިރާއްޖޭގެ ގައުމީ ޔުނިވަސިޓީ
- އީޝާ އާދިލް ނަސީމް - މޯލްޑިވްސް އިސްލާމިކް ޔުނިވަސިޓީ
- ހަމްދާ އަބްދުއްރަހްމާން - ދިވެހިރާއްޖޭގެ ގައުމީ ޔުނިވަސިޓީ
- ހައްވާ ޝިއުނާ - ވިލާ ކޮލެޖް
- އިބްރާހީމް ޝަރަފް ތައުފީގް - ދިވެހިރާއްޖޭގެ ގައުމީ ޔުނިވަސިޓީ
- މަރިޔަމް ނުހާ - ޔުނިވަސިޓީ އޮފް ވެސްޓް އޮފް އިންގްލަންޑް (ވިލާ ކޮލެޖް)
- އަހުމަދު އިބްރާޙީމް - ވިލާ ކޮލެޖް
- މަރިޔަމް ސަނާ - ވިލާ ކޮލެޖް
- ޝާއިރާ އަލީ - ދިވެހިރާއްޖޭގެ ގައުމީ ޔުނިވަސިޓީ
- އަބްދުﷲ ޖާބިރު - ދިވެހިރާއްޖޭގެ ގައުމީ ޔުނިވަސިޓީ
- އަހުމަދު ޣައްސާން އިބްރާހީމް - ވިލާ ކޮލެޖް
- އަހުނަފް މުހައްމަދު - ވިލާ ކޮލެޖް
- ފާތިމަތު ރީއަތު ޝަމީޒް - ޔުނިވަސިޓީ އޮފް އީސްޓް ލަންޑަން
- އިބްރާހީމް ހަޒުމް - ވިލާ ކޮލެޖް
ބާ ކައުންސިލުން ބުނީ މިއަހަރުގެ އިމްތިހާނަކީ އިންޓަނޭޝަނަލް ޓެސްޓިން ކޮލިޓީ ސްޓޭންޑަޑުތަކަށް ފެތޭ އިމްތިހާނަކަށް ހެދުމަށްޓަކައި ޔުނައިޓެޑް ސްޓޭޓަސް އެޖެންސީ ފޯ އިންޓަނޭޝަނަލް ޑިވަލޮޕްމަންޓް (ޔޫއެސްއޭއައިޑީ) އަދި އެމެރިކަން ބާ އެސޯސިއޭޝަން ރޫލް އޮފް ލޯ އިނީޝިއޭޓިވް (އޭބީއޭ-އާރްއޯއެލްއައި)އިން މާލީ އަދި ޓެކްނިކަލް އެހީތެރިކަން ހޯދާފައި ކަމަށެވެ.