ކ. ގުޅީގައި ފާނަބަސަންދު ފެތުރުން ހުއްޓިފައި ވާކަމަށާއި ބަލީގެ އިތުރު ރިޕޯޓުތައް މިހާރު ނުލިބޭ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން މިއަދު ބުނެފިއެވެ.
ގުޅީގައި ފާނަބަސަންދު ފެތުރެން ފަށައިފައިވާކަން އެ އެޖެންސީން ހާމަކުރީ މިދިޔަ މަހުގެ 15ވަނަ ދުވަހުއެވެ. އޭރު އެރަށުން ފެނިފައި ވަނީ 11 ކޭހެވެ. އަދި އޭރު ދެ މީހަކަށް އައިޖީއެމްއެޗުގައި ފަރުވާދިންކަމަށް ވެސް އެޗްޕީއޭ އިން ވަނީ ބުނެފައެވެ.
އޭގެ ފަހުން މިދިޔަ މަހުގެ 27 ވަނަ ދުވަހު ވަނީ ފާނަބަސަންދުގެ 24 ކޭސް ފެނިފައެވެ.
"މިއަދު ސަން"އަށް މައުލޫމާތު ދެމުން އެޗްޕީއޭ އިން ބުނީ މިދިޔަ މަހުގެ 27 ވަނަ ދުވަހު ފެނިފައިވާ ފާނަބަސަންދުގެ 24 ކޭސް ގެ އިތުރުން އެހެން ކޭސްއެއް މިއަދާ ހަމައަށް ފެނިފައިނުވާ ކަމަށެވެ.
ފާނަބަސަންދުގެ އަލާމާތްތައް:
- ހުންއައުން
- ވަރުދެރަވުން
- ނޭފަތުން ފެންއައުން
- ހަމުގައި ބިހިތަކެއް ނެގުން
އެޗްޕީއޭއިން ބުނީ، ފާނަބަސަންދު ޖެހިފައިވާ މީހެއްގެ ގައިގައި ނަގާ ބިހިތައް ފެންފޮޅުތަކަކަށް ބަދަލުވާނެ ކަމަށެވެ. އަދި، އެ ބިހިތަކަކީ ވަރަށް ހިރުވާ، ފަސޭހައިން ފަޅައިގެންދާ ބިހިތަކެއް ކަމަށް އެޗްޕީއޭއިން ބުންޏެވެ. އަދި، ދެތިން ދުވަސް ތެރޭގައި ހަނށިގަނޑުގެ އެކި ތަންތާ ފެންބިހި ނަގާނެ ކަމަށް މައުލޫމާތުދިނެވެ.
ފާނަބަސަންދު ފެތުރޭ ގޮތްގޮތް:
- ބަލިޖެހިފައި ހުރި މީހަކު ކެއްސާ ކިނބިހި އަޅާ ހަދާއިރު ނޭވާލާ ނިޒާމުގެ ޒަރީއާއިން.
- ބިހި ނަގާފައި ހުރި މީހެއްގެ ގައިގައި ބީހުމުން ނުވަތަ އޭނާ ބޭނުންކޮށްފައިވާ ތުވާލި، އަންނައުނު ފަދަ ތަކެތި ބޭނުންކުރުމުން.
- ގައިގައި ހުރި ބިހިތައް އެއްކޮށް ކުރަމަގާލިލަންދެން މި ބަލި އެކަކު ގައިން އަނެކަކު ގަޔަށް ފެތުރޭނެ.