ގަލޮޅު ސަހަރާގައި ކުރާ މަސައްކަތްތަކާ ގުޅިގެން، އެ ސަހަރާއިން ބައެއް މަހާނަ ގާތައް ނެގުމަށް، މާލެ ސިޓީ ކައުންސިލުން ނިންމައިފިއެވެ.
ސިޓީ ކައުންސިލުން ބުނީ ކުރަމުން ގެންދާ މަސައްކަތްތަކާ ގުޅިގެން ނަގަން ބޭނުންވަނީ ސަހަރާގެ ހުޅަނގު އުތުރު ފަރާތު ސަރަޙައްދާއި އިރު ދެކުނު ފަރާތު ސަރަޙައްދުގައި ހުރި ޤަބުރު ކަށިތައް ކަމަށެވެ.
އެހެން ކަމުން އެންމެ ފުރަތަމަ ނަގަންޖެހޭނީ އެ ސަރަހައްދުގައި ހުރި މަހާނަ ގާތަކެވެ.
އެހެން ކަމުން، އެ ސަރަހައްދުގައި މަހާނަ ގާތައް ޖަހާފައިވާ ފަރާތްތަކުން އެ ގާތައް ނަގައިގެން ގެންދަން ބޭނުންވާ ނަމަ، މި މަހުގެ 15ވަނަ ދުވަހުގެ ކުރިން އެ ކަން ކުރުމަށް ސިޓީ ކައުންސިލުން ބުނެއެވެ.
އަދި މި މަހު 15ގެ ކުރިން އެ މަހާނަ ގާތައް ނުގެންދާނަމަ، ސިޓީ ކައުންސިލުން އެ ގާތައް ނަގައި ނައްތައިލާނެ ކަމަށް ވަނީ އިއުލާން ކޮށްފައެވެ.
ގަލޮޅު ސަހަރާ މަރާމާތު ކުރުމުގެ މަސައްކަތް ސިޓީ ކައުންސިލުން އަންނަނީ ކުރަމުންނެވެ.