ސަރުކާރުގެ ވަޒީފާތަކުގެ ތެރެއިން 'ޑަަބަލް ޕެންޝަން' ލިބޭ އިދާރާތަކުން އަލަށް ރިޓަޔާވާ މީހުންނަށް ކޮންމެ މަހަކު ދެމުން އަންނަ އެލަވަންސް ކަނޑާލަން ސަރުކާރުން ނިންމި ނަމަވެސް، އެ ނިންމުން ބަދަލުކޮށް އެ އެލަވަންސް ދޭން ނިންމައިފިއެވެ.
ފިނޭންސް މިނިސްޓްރީން ވަނީ މިދިޔަ ހަފުތާ ތެރޭގައި އެކަން ސަރުކާރުގެ އިދާރާތަކަށް ސިޓީއަކުން އަންގައިފައެވެ.
"ސަން"އަށް އެނގިފައިވާ ގޮތުގައި މި ނިންމުން ބަދަލުކުރަން އެންގެވީ ސީދާ ރައީސެވެ. ކުއްލި ގޮތަކަށް ނިންމުން ބަދަލުކޮށްފައިވާއިރު، މިކަމާ ގުޅިގެން ސަރުކާރުގެ ތަރުޖަމާނު ހީނާ ވަލީދު "ސަން"އަށް ވިދާޅުވީ އެ ނިންމުން ރައީސް ނިންމެވީ މުވައްޒަފުންގެ ކަންބޮޑުވުންތަކެއް ހުރުމުން ކަމަށެވެ.
އެހެންވެ އިއްޔެ އޮތް ވަޒީރުންގެ މަޖިލީހަށް އެ ކަން ހުށަހަޅައި މަޝްވަރާކުރެއްވުމަށްފަހު ފިނޭންސް މިނިސްޓްރީން ފޮނުވާފައިވާ ސިޓީއަށް ޢަމަލުނުކުރަންވަނީ ނިންމީކަމަށް ވިދާޅުވިއެވެ.
މީގެ ކުރިން އެ ކަން ހުއްޓަން އަންގައި ފިނޭންސުން ފޮނުވި ސިޓީގައި ވަނީ، އަންނަ ޖެނުއަރީން ފެށިގެން އަމަލުކުރަން ފަށާ އުސޫލެއްގެ ދަށުން، ރިޓަޔާ ކުރާ މީހުންނަށް ކޮންމެ މަހަކު ލިބޭ އެލަވަންސް ދެން ނުލިބޭނެ ކަމަށެވެ. ނަމަވެސް ރިޓަޔާ ކުރާ މުވައްޒަފުންނަށް ގަނޑުކޮށް ދޭ ފައިސާ ދެމުންދާނެ ކަމަށް އެ ސިޓީގައިވެއެވެ.
ފިނޭންސް މިނިސްޓްރީން ބުނެފައިވަނީ އެ ފިޔަވަޅު އަޅަނީ ސަރުކާރުން ޚަރަދު ކުޑަކުރުމަށް ކުރާ މަސައްކަތްތަކުގެ ތެރެއިން ކަމަށެވެ.
ޑަބަލް ޕެންޝަންއަކީ ސަރުކާރުގެ ރިޓަޔާމެންޓް ޕެންޝަން ސްކީމްގެ އިތުރުން، ސަރުކާރުގެ ބައެއް އިދާރާތަކުން ހިންގާ ސްކީމްތަކާ ހެދި ބައެއް މީހުންނަށް ދައުލަތުގެ ޚަރަދުގައި ދެ ޕެންޝަނެއް ލިބުމެވެ.