އެމެރިކާގެ ރައީސް ޖޯ ބައިޑެންގެ ދަރިފުޅު، ހަންޓާ ބައިޑެންގެ މައްޗަށް ސާބިތުވެފައިވާ ޖިނާއީ ކުށުގެ މައްސަލައިގައި ބައިޑެންގެ ވެރިކަމުގެ އެންމެ ފަހު ހަފުތާގައި މައާފު ދެއްވައިފިއެވެ.
ނަމަވެސް ބައިޑެން ކުރިން ވިދާޅުވެފައި ވަނީ އެ މައްސަލައިގައި އެއްވެސް ނުފޫޒެއް ނުފޯރުއްވާނެ ކަމަށެވެ.
އުމުރުން 54 އަހަރުގެ ހަންޓާ ޓެކްސްގެ ދައުވާއަށް އިއުތިރާފުވެ، ގަވާއިދާ ޚިލާފަށް ބަޑިއެއް ގެންގުޅުމާއި، ކޮކެއިންއަށް އެޑިކްޓްވެފައިވާ މީހެއް ނޫން ކަމަށްބުނެ ދޮގު މައުލޫމާތު ދިނުމާއި، އެ މައްސަލައާ ގުޅޭ އިތުރު ދެ ކުށެއްވެސް އޭނާގެ މައްޗަށް ސާބިތުވެފައި ވަނީ މިދިޔަ ޖޫން މަހުއެވެ.
މިއީ އެމެރިކާގެ ރައީސަކު މަގާމުގައި ހުންނަވަނިކޮށް ދަރިއެއްގެ މައްޗަށް ޖިނާއީ ކުށެއް ސާބިތުވި ފުރަތަމަ ފަހަރެވެ.
ފުރިހަމަ އަދި ޝަރުތުތަކާ ނުލައި މައާފު ދެއްވާފައިވާއިރު، މީގެކުރިން ތަކުރާރުކޮށް ބައިޑެން ވިދާޅުވެފައި ވަނީ ރައީސްގެ މައާފު ހަންޓާއަށް ނުދެއްވާނެ ކަމަށެވެ.
ނަމަވެސް އިއްޔެ ހަންޓާއަށް މައާފުދެއްވައި ބައިޑެން ވިދާޅުވީ އަދުލު އިންސާފުގެ ނިޒާމު ގަބޫލުކުރި ނަމަވެސް ސިޔާސީ ކަންކަން އެކަމުގެ ތެރެއަށްވަދެ، އޭގެ ސަބަބުން އިންސާފު ގެއްލިގެންގޮސްފައިވާ ކަމަށެވެ.
"އަޅުގަނޑު ވެރިކަމާ ހަވާލުވި ދުވަހުން ފެށިގެން އަޅުގަނޑު ބުނީ ޖަސްޓިސް ޑިޕާޓްމަންޓުގެ ނިންމުންތަކަށް ހުރަސް ނާޅާނަމޭ، އަދި އަޅުގަނޑުގެ ދަރިފުޅަށް ނުހައްގުން އަނިޔާ ލިބެމުންދިޔައިރުވެސް އަޅުގަނޑު ހުރީ އަޅުގަނޑުގެ ބަހުގައި ހިފަހައްޓައިގެން." ބައިޑެން ވިދާޅުވިއެވެ.
"ހަމަ ވިސްނޭ ކޮންމެ މީހަކު ވެސް ގަބޫލުކުރާނެ ހަންޓާގެ އެ މައްސަލަ ބަލައި ކުށް ސާބިތުވީ އެއީ އެކަނި އަޅުގަނޑުގެ ދަރިފުޅަށް ވީތީކަން. އެއީ ރަނގަޅު ގޮތެއް ނޫން،" އިންސާފުން އެއްކިބާވެ ނިންމާފައިވާ ނިންމުމެއް ކަމަށް ސިފަކޮށް ބައިޑެން ނެރުއްވި ބަޔާނުގައިވެއެވެ.
ހަންޓާ ބައިޑަން ވަނީ ސެޕްޓެމްބަރު މަހު ފެޑެރަލް ޓެކްސް ފްރޯޑްގެ ނުވަ ދައުވާއަކަށް އިއުތިރާފުވެފައެވެ. އެކަމުގެ ސަބަބުން 17 އަހަރުގެ ޖަލު ހުކުމެއް އޭނާގެ މައްޗަށް އަންނާނެ ކަމަށް ބީބީސީން ރިޕޯޓުކޮށްފައިވެއެވެ. އޭގެއިތުރުން ބަޑި ގެންގުޅުނު މައްސަލައިގައި 25 އަހަރުގެ ޖަލު ހުކުމެއްވެސް އަންނާނެ ކަމަށް ބީބީސީން ބުނެފައިވެއެވެ.
އެ މައްސަލަތަކުގެ ހުކުމް އިއްވުން ތާވަލުކޮށްފައި އޮތީ މި މަހުގެ 12 އަދި 16 ވަނަ ދުވަހުއެވެ.
މިއީ އެމެރިކާގެ ރައީސަކު އެބޭފުޅުންގެ އާއިލާގެ މީހަކަށް މައާފު ދިން ފުރަތަމަ ފަހަރެއް ނޫނެވެ.
އެމެރިކާގެ ކުރީގެ ރައީސް ބިލް ކްލިންޓަން ވަނީ އޭނާގެ އެއްބަނޑު އެއްބަފާ ކޮއްކޮ ރޮޖާ ކްލިންޓަންއަށް 1985 ވަނަ އަހަރު ސާބިތުވެފައިވާ ކޮކެއިން އާ ގުޅުން ހުރި ކުށެއްގައި 2001 ވަނަ އަހަރު މައާފުދެއްވާފައެވެ.
ދެހާސް ވިހި ވަނަ އަހަރު ޑޮނަލްޑް ޓްރަމްޕް ވަނީ އޭނާގެ އަންހެން ދަރިފުޅު އިވާންކާގެ ފިރިމީހާގެ ބައްޕަ، ޗާލްސް ކުޝްނާއަށް މައާފު ދެއްވާފައެވެ. އަދި ޓްރަމްޕް އާ ކެބިނެޓްގެ ފަރަންސޭސިވިލާތުގައި ހުންނަވާ ސަފީރުގެ މަގާމަށް ހޮނިހިރު ދުވަހު ވަނީ ކުޝްނާ އައްޔަންވެސް ކުރައްވާފައެވެ.
ނޮވެމްބަރު މަހު ބޭއްވި އެމެރިކާގެ ރިޔާސީ އިންތިޚާބުގައި ޑިމެކޮރެޓިކް ޕާޓީން ވާދަކުރެއްވި ކެންޑިޑޭޓް އަދި މިހާރުގެ ނާއިބު ރައީސް ކަމަލަ ހެރިސްގެ މައްޗަށް ޓްރަމްޕް ކާމިޔާބު ހޯއްދަވާފައިވާއިރު، މަގާމުގެ ހުވާކުރެއްވުމުގެ ރަސްމިއްޔާތު ބޭއްވުމަށް ހަމަޖެހިފައި ވަނީ އަންނަ މަހުގެ 20 ވަނަ ދުވަހުއެވެ.