ސްޕެނިޝް ލަލީގާގައި އެންމެ ފަހުގެ ޗެމްޕިއަން ރެއާލް މެޑްރިޑާއި ގެޓާފޭ ބައްދަލުކުރި މެޗު ރެއާލް އިން ކާމިޔާބު ކޮށް ތާވަލްގެ އެއްވަނައިގާ އުޅޭ އެފްސީ ބާސެލޯނާއާ ދެމެދުގައިވާ ފަރަގު ކުޑަކޮށްފިއެވެ.
ރެއާލްގެ ދަނޑުގައި ކުޅުނު މިމެޗު އެޓީމުން ކާމިޔާބު ކޮށްފައިވަނީ ދެ ލަނޑު ސުން ލަނޑުންނެވެ. ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ރެއާލްއިންނެވެ.
މިމެޗުގެ ފުރަތަމަ ލަނޑު ރެއާލް އިން ކާމިޔާބު ކޮށްފައިވަނީ މެޗުގެ 30ވަނަ މިނެޓުގައި އެޓީމަށް ލިބިގެންދިޔަ ޕެނަލްޓީ އަކުންނެވެ. މި ޕެނަލްޓީ އެޓީމަށް ކާމިޔާބު ކޮށްދީ މެޗުގެ ލީޑު ނަގައިދިނީ ޖޫޑް ބެލިންހަމްއެވެ. އަދި މިލަނޑު ޖެހިތާ އަށް މިނެޓް ފަހުން ރެއާލްގެ ލީޑު ފުޅާކޮށްދިނީ ބެލިންހަމް ތަނަވަސްކޮށްދިން ފުރުސަތެއްގައި ކިލިއަން އެމްބާޕޭއެވެ.
މިމެޗުގެ ދެވަނަ ހާފުގައި އިތުރު ލަނޑެއް ފެނިގެން ނުދިޔަ ނަމަވެސް ލަނޑު ޖަހާނެ ފުރުސަތު ދެޓީމަސްވެސް ލިބިގެންދިޔައެވެ. މިގޮތުން ގެޓާފޭގެ ކްރިސްޓަންޓުސް އުޗޭ އާއި ޖޯން ޕެޓްރިކްއަށް ލިބިގެންދިޔަ ދެ ފުރުސަތު ފާހަގަ ވެގެންދިޔައިރު ރެއާލްގެ އެމްބާޕޭ އާއި ބްރަހީމް ޑިއާޒްއަށްވަނީ އެޓީމުގެ ލީޑު ފުޅާކުރާނެ ރަނގަޅު ދެ ފުރުސަތު ލިބިގެން ގޮސްފައެވެ.
މިކާމިޔާބީއާއެކު ރެއާލް މިހާރު އުޅެނީ ކުޅުނު 14 މެޗުން ލިބިފައިވާ 33 ޕޮއިންޓާއެކު ތާވަލްގެ ދެވަނައިގައެވެ. އަދި އެއްވަނައިގާ 15 މެޗުން 34 ޕޮއިންޓް ހޯދާފައިވާ ބާސާއާ ދެމެދު ވާ ފަރަގު މިވަނީ އެއް ޕޮއިންޓަށް ކުޑަވެގެން ގޮސްފައެވެ. ރެއާލް އެއް މެޗު މަދުން ކުޅެފައިވުމުން އެމެޗު ކާމިޔާބު ކުރެވިއްޖެނަމަ ތާވަލްގެ އެއްވަނައަށް އެރުމުގެ ފުރުސަތު ވެސް އެޓީމަށް އެބައޮތެވެ.
މިމުބާރާތުގައި އެޓްލެޓިކޯ މެޑްރިޑާއި ވަޔަޑޮލިޑް ބައްދަލުކުރި މެޗު ރަށުން ބޭރުގައި ފަސް ލަނޑު ސުން ލަނޑުން ކާމިޔާބު ކޮށްފައިވަނީ އެޓްލެޓިކޯޢެވެ. މިމެޗުގައި އެޓްލެޓިކޯއިން ކާމިޔާބު ކުރި ފަސް ލަނޑު އެޓީމަށް ޖަހައިދިނީ ކްލެމެންޓް ލެންގްލެޓް، ހޫލިއަން އަލްވަރޭޒް، ރޮޑްރިގޯ ޑި ޕޯލް، އެންޓޮއިން ގްރީޒްމަން އަދި އެލެގްޒެންޑާ ސޮރިއޮތުއެވެ. މިކާމިޔާބީއާއެކު އެޓްލެޓީކޯ 32 ޕޮއިންޓާއެކު ތާވަލްގެ ތިންވަނައިގާ އުޅޭ އިރު ވަޔަޑޮލިޑް އުޅެނީ ނުވަޕޮއިންޓާއެކު ތާވަލްގެ އެންމެ ފުލުގައެވެ.