އިންޑިއާގެ ކޮންގްލޯމެރޭޓް އަދާނީ ގްރޫޕްގެ ވެރިޔާ އަދި ދުނިޔޭގެ އެންމެ މުއްސަނދި އެކަކު ކަމަށްވާ ގޯތަމް އަދާނީގެ މައްޗަށް އެމެރިކާއިން ކޮށްފައިވާ ބިލިއަން ޑޮލަރުގެ ރިޝްވަތާއި މަކަރާއި ހީލަތުގެ ދައުވާއާ ގުޅިގެން ފުރަތަމަ ފަހަރަށް އޭނާ ވާހަކަދައްކައިފިއެވެ.
އިންޑިއާގެ ޖައިޕޫރުގައި އިއްޔެ ބޭއްވި އެވޯޑް ހަފުލާއެއްގައި ވާހަކަ ދައްކަމުން އަދާނީ ވިދާޅުވީ އޭނާ އާއި އެ ކުންފުނީގެ އިސްވެރިންގެ މައްޗަށް ކުރާ, ދުއިސައްތަ ފަންސާސް މިލިއަން ޑޮލަރުގެ ރިޝްވަތު ސްކީމެއް ރާވައި، މަކަރާއި ހީލަތް ހެދުމުގެ ދައުވާ އާއި އިންސާފަށް ހުރަސް އެޅުމަށް ރޭވުމުގެ ދައުވާއަށް އިންކާރު ކުރާ ކަމަށެވެ.
"މިއީ މިފަދަ ގޮންޖެހުންތަކާ ކުރިމަތިލާން ޖެހުނު ފުރަތަމަ ފަހަރެއް ނޫން." އަދާނީ ވިދާޅުވިއެވެ. "އެފަދަ ކޮންމެ ހަމަލާއަކުން އަޅުގަނޑުމެން ވަރުގަވެގެންދާނެ."
އެމެރިކާގެ ދައުވާތަކާ ގުޅިގެން "ނެގެޓިވިޓީ" ފަތުރާކަމަށް ތުހުމަތުކޮށް އަދާނީ ގްރޫޕުން ވަނީ އެ ގްރޫޕުގެ ދިފާއުގައި ކޯޓުގައި ވަކާލާތު ކުރާނެ ކަމަށް ބުނެފައެވެ.
އެމެރިކާގެ ޕްރޮސިކިއުޓަރުން ދައުވާގައި ތުހުމަތުކޮށްފައިވާ ގޮތުގައި ގޯތަމް އާއި އޭނާގެ އިސް މުވައްޒަފުން ވަނީ އިޔާދަކުރެވެނިވި ހަކަތައިގެ ޕްރޮޖެކްޓްތައް އެ ކުންފުންޏަށް ކާމިޔާބުކުރުމަށް އިންޑިއާ ސަރުކާރުގެ އޮފިޝަލުންނަށް ފައިސާ ހުށަހަޅައިފައެވެ. އެ ޕްރޮޖެކްޓްތަކުން 20 އަހަރު ތެރޭ ދެ ބިލިއަން ޑޮލަރުގެ ފައިދާއެއް އެ ކުންފުންޏަށް ވާނެ ކަމަށް އޮތީ ލަފާކޮށްފައެވެ.
އެ ތުހުމަތަށް އިންކާރުކޮށް އަދާނީ ގްރޫޕުން ބުނީ އެ ތުހުމަތުގައި އެއްވެސް އަސްލެއް ނެތް ކަމަށެވެ.
"މިކަމުގެ ދިފާއުގައި ގާނޫނީ ގޮތުން ކުރެވެން ހުރި ހުރިހާ ކަމެއް ކުރާނަން،" އަދާނީ ގްރޫޕުން ނެރުނު ބަޔާނުގައި ބުންޏެވެ.
އަދާނީ ގްރޫޕުން ސްޓޮކާއި ހިސާބުތައް އޮޅުވާލުމުގެ އަމަލުތައް ހިންގަމުން އަންނަތާ އެތައް އަހަރެއް ވެފައިވާ ކަމަށް ބުނެ 2023 ވަނަ އަހަރު އެމެރިކާގެ ޝޯޓް-ސެލާ ހިންޑެންބާގް ރިސާޗްއިން ރިޕޯޓެއް ޝާއިއުކުރި ހިސާބުން ފެށިގެން އަދާނީ ގްރޫޕް އޮތީ ބޮޑު މައްސަލަގަނޑެއްގެ ތެރޭގައެވެ.
އެމެރިކާއިން ވަނީ ގޯތަމްގެ އިތުރުން އޭނާއަށް ބޮޑު ބޭބެކިޔާ މީހަކާއި އިތުރު ހަތް މީހެއްގެ މައްޗަށް ދައުވާކޮށްފައެވެ.
ފޯބްސް މަޖައްލާއިން ބުނާ ގޮތުން އުމުރުން 62 އަހަރުގެ އަދާނީގެ މިލްކިޔާތު 69.8 ބިލިއަން ޑޮލަރަށް އަރައެވެ. އޭނާ އަކީ އެމެރިކާގައި ޖިނާއީ ކުށެއްކޮށްފައިވާ ކަމަށް ރަސްމީކޮށް ތުހުމަތު ކުރެވޭ މަދު ބިލިއަނަރުންގެ ތެރެއިން އެކަކެވެ.
އަދާނީއަކީ ދުނިޔޭގެ 22 ވަނައަށް އެންމެ މުއްސަނދި މީހާ، އަދި ރިލަޔަންސް އިންޑަސްޓްރީސްގެ ޗެއާ މުކޭޝް އަމްބާނީއަށްފަހު އިންޑިއާގެ ދެވަނައަށް އެންމެ މުއްސަނދި މީހާ ކަމަށް ފޯބްސްއިން ބުނެއެވެ.
އިންޑިއާގެ ގުޖުރާތު ސްޓޭޓަށް އުފަން ގޯތަމް އަދާނީ ގްރޫޕް އުފެއްދީ 1988 ވަނަ އަހަރުއެވެ. އޭގެފަހުން ވިޔަފާރީ ފުޅާކޮށް ކުރި މަސައްކަތުން މިހާރު އެ ކުންފުންޏަކީ އެއާޕޯޓްތަކާއި ޝިޕިން ބަނދަރުތަކާއި ކަރަންޓް އުފެއްދުމާއި ހަކަތަ ޓްރާންސްމިޝަން އަދި މައިނިން ކުންފުނިތައް ހިމެނޭ ބޮޑު ކުންފުންޏެކެވެ.