އިންގްލިޝް ޕްރިމިއާ ލީގުގައި ނޮޓިންހަމް ފޮރެސްޓް އާއި އިޕްސްވިޗް ޓައުން ބައްދަލުކުރި މެޗު ފޮރެސްޓް އިން ކާމިޔާބުކޮށް ތާވަލްގެ ހަވަނައަށް ކުރިއަށް ޖެހިލައިފިއެވެ.
ފޮރެސްޓްގެ ދަނޑުގައި ކުޅުނު މި މެޗު އެޓީމު ކާމިޔާބުކޮށްފައިވަނީ އެއް ލަނޑު ސުން ލަނޑުންނެވެ. ދެ ޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މި މެޗުގައި އިޕްސްވިޗްއިން ގިނައިރު ބޯޅަ ގެންގުޅުނު އިރު ގިނަ ހަމަލާ އުފައްދާފައިވަނީ ފޮރެސްޓް އިންނެވެ.
މި މެޗްގެ ފުރަތަމަ ހާފުގައި ދެ ޓީމުން ކުރެ އެއްވެސް ޓީމަކަށް ލަނޑެއް ކާމިޔާބު ކުރެވިފައެއް ނުވެއެވެ.
މި މެޗުގެ ހަމައެކަނި ލަނޑު ދެވަނަ ހާފުގެ ކުޅުން ފެށިތާ ހަތަރުވަނަ މިނެޓުގައި ލިބުނު ޕެނަލްޓީ އަކުން ކާމިޔާބު ކޮށްދީފައިވަނީ ކްރިސް ވުޑްއެވެ. މިއީ މި ފަހަރު ލީގުގައި އޭނާ ކާމިޔާބު ކުރި އަށްވަނަ ލަނޑެވެ. މި މެޗުގައި އިޕްސްވިޗްއިން ލަނޑު ޖެހޭތޯ މަސައްކަތް ކުރި ނަމަވެސް ފޮރެސްޓްގެ ޑިފެންސް ފޫއަޅުވާލެވޭ ގޮތެއްނުވިއެވެ.
މިކާމިޔާބީއާއެކު ފޮރެސްޓް މިހާރުވަނީ 22 ޕޮއިންޓާއެކު ތާވަލްގެ ހަވަނައަށް ކުރިއަށް ޖެހިލާފައެވެ. އަދި އިްޕްސްވިޗް އުޅެނީ ނުވަ ޕޮއިންޓާއެކު ތާވަލްގެ 19 ވަނައިގައެވެ.