އިންގްލިޝް ޕްރިމިއާ ލީގުގެ ޗެމްޕިއަން މެންޗެސްޓާ ސިޓީ މިހާރު ވެއްޓިފައިވާ އަޑިގަނޑުން އަލުން އަރައިގަންނާނެ ކަމުގެ ޔަގީންކަން އެބައޮތް ކަމަށް އެޓީމުގެ ކޯޗު ޕެޕް ގާޑިއޯލާ ބުނެފިއެވެ.
ޕެޕް މިހެން ބުނެފައި ވަނީ ޕްރިމިއާ ލީގުގައި ތާވަލުގެ އެއްވަނައިގާ އުޅޭ ލިވަޕޫލާ ދެކޮޅަށް ރަށުން ބޭރުގައި ކުޅުމަށް ހަމަޖެހިފައިވާ މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައެވެ. ޕެޕް ހާމަކުރިގޮތުގައި ސިޓީ އަލުން އެނބުރި އަންނާނެ ދުވަހެއް ނޭނގުނު ނަމަވެސް އަލުން އެނބުރި އަންނާނެއެވެ. އަދި އޭނާ މިހިރީ އެކަން ކުރަން ތައްޔާރަށް ކަމަށްވެސް ޕެޕް ހާމަކުރިއެވެ.
ޕެޕް ބުނީ ސިޓީއަށް މިހާރު ދިމާވެފައިވާ އަޑިގަނޑުން އަރައިގެނުވުމަށްޓަކައި ކުރެވެން އޮތް ހުރިހާ ކަމެއް ކުރާނެ ކަމަށެވެ. އަދި މިކަމުން ރެކި ފިލަން ނުދުވާނެ ކަމަށާއި އޭނާ މިހިރީ ސިޓީ އާއެކު ފަސް ޖެހުމެއް ނެތި ކުރިއަށް ދާން ތައްޔާރަށް ކަމަށެވެ. ޕެޕް ހާމަކުރިގޮތުގައި ދިގު ކެރިއަރުތަކުގައި ހުރިހާ ކަމަކާ ވެސް ކުރިމަތިވާނެއެވެ. އެޓީމު ޖެހިޖެހިގެން ފަސް މެޗުން ބަލިވީ ކަމަށާއި އަދި އެންމެ ފަހުން މޮޅުވާން ޖެހޭ މެޗަކުން އެއްވަރުވީ ކަން ފާހަގަކޮށް އޭނާ ބުނީ ފުޓްބޯޅައިގައި ބައެއްފަހަރު މިހެން ދިމާވެދާނެކަމަށެވެ.
ޕެޕް ބުނީ މިވަގުތު ލީގު ކާމިޔާބު ކުރުމާމެދު ނުވިސްނާ ކަމަށާއި މިވަގުތު ވިސްނުން އޮތީ ހަމައެކަނި ކުރިއަށް އޮތް މެޗަށް ކަމަށެވެ. އަދި ކުރިއަށް އޮތް މެޗަކީ ފަސޭހަ މެޗަކަށް ނުވާނެ ކަމަށާއި ލިވަޕޫލްގެ ކޮންމެ ދިމާލަކަށް ބަލާލިނަމަވެސް ފެންނަނީ ވަރުގަދަ އަދި އެހާމެ ފޯމުގައި ކުޅެމުންދާ ކުޅުންތެރިންކަމަށެވެ. އަދި މިމެޗުގައި ކޮންމެ ގޮތެއްވިޔަސް ޕްރެޝަރަށް ވެއްޓޭނެ ވަގުތުތައް ދާނެކަމަށާއި ނަމަވެސް މުހިންމީ އެވަގުތު ތަކުގައި ޓީމެއްގެގޮތުގައި ހުރިހާ ކުޅުންތެރިން އެކަތިގަނޑެއްގެ ގޮތުގައި ކުޅުން ކަމަށްވެސް ޕެޕް ހާމަކުރިއެވެ.
ޕްރިމިއާ ލީގުގައި ލިވަޕޫލާއި ސިޓީ ބައްދަލުކުރާ މެޗުން ސިޓީ ބަލިވެއްޖެނަމަ ދެޓީމުގެ ދެމެދުގައިވާ ފަރަގު 11 ޕޮއިންޓަށް އިތުރު ވެގެންދާނެއެވެ. އަދި މިވަގުތު ދެވަނައިގާ އޮތް ނަމަވެސް އެމަގާމު ގެއްލި ހަ ވަނައަށް ވެއްޓިގެން ދިއުމަކީ ވެސް އެކަށީގެންވާކަމެކެވެ.