އިސްރާއީލުން ފަލަސްތީނުގެ ޣައްޒާއަށް ދެމުންދާ ހަމަލާތަކުގެ ސަބަބުން ޣައްޒާގެ އުތުރުގައި ބޭހާއި، ކާނާއާއި، ތެޔޮ އަދި ބޯހިޔާވަހިކަންވެސް ލިބޭނެގޮތެއް ނެތް ކަމަށް ދުނިޔޭގޭ ސިއްޚަތު ޖަމުއިއްޔާ (ޑަބްލިޔުއެޗްއޯ) އިން ބުނެފިއެވެ.
ޑަބްލިޔުއެޗްއޯގެ ވެރިޔާ ޓެޑްރޯސް އަދަނޮމް ގެބްރެއިސަސް ވިދާޅުވީ މީގެ އަހަރަކަށް ވުރެ ގިނަ ދުވަސް ކުރިން އިސްރާއީލުން ޣައްޒާގައި ހަނގުރާމަ ފެށިއިރު، ހަމަނުޖެހުންތަކުގެ ސަބަބުން ގެދޮރު ގެއްލިފައިވާ އެންމެން ހިޔާވަހިކަން ހޯދާފައި ވަނީ އާންމު އިމާރާތްތަކުގައި ނުވަތަ އާއިލާގެ އެހެން މެމްބަރުންގެ ގެތަކުން ކަމަށެވެ. ނަމަވެސް މިހާރު 90 އިންސައްތަ މީހުން ދިރިއުޅެނީ ޓެންޓުތަކުގައި ކަމަށް އޭނާ ވިދާޅުވިއެވެ.
"މިކަމުގެ ސަބަބުން ނޭވާލާ ނިޒާމާއި އެހެނިހެން ބަލިތައް ވަރަށް ފަސޭހައިން ޖެހޭ. ފިނި މޫސުމާއި ވާރޭ ވެހުމާއި ފެންބޮޑުވުމުގެ ސަބަބުން ކާބޯތަކެތީގެ ރައްކާތެރިކަން ނެތުމާއި ކާނާ ލިބުން ދަތިވުން އިތުރަށް ގޯސްވާނެ ކަމަށް ބެލެވޭ." އޭނާ ވިދާޅުވިއެވެ.
ޑަބްލިއުއެޗްއޯ އާއި އެހެން ޖަމުއިއްޔާތަކުން ގުޅިގެން މި ހަފުތާގައި ވަނީ ޣައްޒާގެ އުތުރުގައި ތިން ދުވަހުގެ މިޝަނެއް ކުރިއަށް ގެންގޮސް، ގިނަ އަދަދެއްގެ ސިއްޚީ ޚިދުމަތްދޭ ތަންތަނަށް ޒިޔާރަތްކޮށްފައެވެ.
ޓެޑްރޯސް ވިދާޅުވީ އެ ޓީމަށް ފެނިފައިވަނީ ދިގުމުއްދަތަކަށް ފަރުވާ ބޭނުންވާ ބަލިތައް ހުންނަ ބަލިމީހުން އިތުރުވަމުންދާ ތަން ކަމަށެވެ. އަދި ޒަރޫރީ ބޭހުގެ ދަތިކަން ވަރަށް ބޮޑަށް އެބައޮތް ކަމަށްވެސް ޓެޑްރޮސް ވިދާޅުވިއެވެ.
ސިއްޚީ ޚިދުމަތްތަކާއި ސާމާނު ފޯރުކޮށްދިނުމުގައި ކުރެވެންހުރި ހުރިހާ ކަމެއް ޑަބްލިޔުއެޗްއޯއިން ކުރަމުން އަންނަ ކަމަށް ޓެޑްރޮސް ފާހަގަކުރެއްވިއެވެ.
އެގޮތުން މި ހަފުތާގައި ޣައްޒާއިން އުރުދުނަށް 17 ބަލިމީހުން ސިއްޚީ ފަރުވާ ދިނުމަށް ގެންދިއުމަށް މަގުފަހިކޮށްދީފައިވާ ކަމަށާއި އޭގެ ތެރެއިން 12 ބަލިމީހުން ފަރުވާއަށް އެމެރިކާއަށް ދާނެ ކަމަށް ފަލަސްތީނު ސަރަހައްދަށް ކަނޑައަޅާފައި ހުންނަ ޑަބްލިޔުއެޗްއޯގެ މަންދޫބު ރިކް ޕީޕަކޯން ވިދާޅުވިއެވެ.
އެއީ މެއި މަހުގެ ކުރީކޮޅު އިސްރާއީލުން ޣައްޒާގެ މައި ރަފާ ބޯޑަރު ހުރަސްކުރި ފަހުން ޣައްޒާއިން ނިކުތް ގާތްގަނޑަކަށް 300 ބަލިމީހުންގެ ތެރޭގައި ހިމެނޭ ބައެއް ކަމަށްވެސް ޕީޕަކޯން ވިދާޅުވިއެވެ.
އޮކްޓޫބަރު ހަތް ވަނަ ދުވަހުން ފެށިގެން އިސްރާއީލުން ޣައްޒާއަށް ދެމުންދާ ހަމަލާތަކުގައި މިހާތަނަށް 44،300 އަށްވުރެ ގިނަ މީހުން ވަނީ ޝަހީދުކޮށްލާފައެވެ. ހަމަލާތަކުގައި ޒަޚަމްކޮށްލާފައިވާ މީހުންގެ އަދަދު 105،000 އަށް ވަނީ އުފުލިފައެވެ.