ޕާކިސްތާނުގެ އިސްލާމާބާދާއި ރަވަލްޕިންޑީގައި ދެ ދުވަހުގެ މުއްދަތަށް އިންޓަނެޓް ޚިދުމަތް މެދުކަނޑާލުމަށްފަހު، އަލުން އެ ޚިދުމަތް ދޭން ފަށައިފިއެވެ.
ޕާކިސްތާނުގެ ކުރީގެ ބޮޑުވަޒީރު އިމްރާން ޚާނަށް ސަޕޯޓްކުރާ ފަރާތްތަކުން ކުރަމުންދާ މުޒާހަރާތަކާ ގުޅިގެން އެގައުމުގެ އިންޓީރިއާ މިނިސްޓްރީގެ އަމުރަށް ބައެއް ސިޓީތަކުންވަނީ އިންޓަނެޓް ޚިދުމަތް މެދުކަނޑާލާފައެވެ. އިންޓަނެޓްގެ ޚިދުމަތް ލިބެން ފެށި ނަމަވެސް، ޚިދުމަތް އަނބުރާ ދޭން ފެށުމާއެކު ސޯޝަލް މީޑިއާ އެޕްތަކުގެ ޚިދުމަތްތަކުގައި މައްސަލަތަކެއް ހުރިކަމަށް ބުނެ ގިނަ ބަޔަކު އަދިވެސް ޝަކުވާ ކުރަމުންދެއެވެ.
މީގެ އިތުރުން، ޕާކިސްތާން ތަހްރީކް-އެ-އިންސާފް (ޕީޓީއައި) ގެ މުޒާހަރާ ނިމުމަކަށް އައުމާއެކު، ޑީ-ޗައުކާއި އެ ސަރަޙައްދުގެ އެހެން ތަންތަނުން މުޒާހިރުން ފޭބުމާ ގުޅިގެން، އިސްލާމާބާދާއި ރަވަލްޕިންޑީގައި އާންމު ޙާލަތަށް އެނބުރުމުގެ ގޮތުން މަގުތަކުން ކޮންޓެއިނަރުތައް ނަގަން ފަށައިފިއެވެ. ފައިޒާބާދު ފްލައިއޯވަރާއި މުރީ މަގުން ކޮންޓެއިނަރުތައް ނަގަމުންދާއިރު، ފަސް ދުވަހުގެ މުއްދަތަށް ބަންދުކޮށްފައިވާ ފައިޒާބާދު އިންޓަޗޭންޖް ވެސް އަލުން ހުޅުވާލައިފިއެވެ.
ހަތަރު ދުވަހުގެ މުއްދަތަށް ބަންދުކޮށްފައިވާ މޯޓަވޭ ވެސް ހުރިހާ ބާވަތެއްގެ ދަތުރުފަތުރަށް ހުޅުވާލައިފިއެވެ. އިސްލާމާބާދުން ލާހޯރަށް ދާ އެމް1 މޯޓަވޭ، ސިއާލްކޯޓުން ލާހޯރަށް ދާ އެމް2 މޯޓަވޭ، އަދި އެމް3، އެމް4، އަދި އެމް5 މޯޓަވޭތައް ދަތުރުފަތުރަށް ހުޅުވާލައިފިއެވެ. އަދި މުލްތާނުން ސުއްކުރަށް ދާ މޯޓަވޭ ވެސް އަލުން ހުޅުވާލައިފިއެވެ.
މި ދަނޑިވަޅުގައި، އިންޓީރިއާ މިނިސްޓާ މުޙްސިން ނަޤްވީ ވަނީ ޑީ ޗައުކާއި ޚައިބަރް ޕްލާޒާ ދެމެދުގެ ސަރަޙައްދަށް ޒިޔާރަތްކޮށް، ޤާނޫނު ތަންފީޒުކުރާ އިދާރާތަކުގެ މުވައްޒަފުންނާ ބައްދަލުކޮށް، އެ މީހުންގެ ހިތްވަރުގަދަކަމަށް ތަޢުރީފުކޮށްފައެވެ.