ކުޑަކުއްޖެއްގެ ބަރަހަނާ މަންޒަރުތައް ފެންނަހެން އޮރިޔާންކާޑު ހެދި މީހަކަށް ކްރިމިނަލް ކޯޓުން ކުރި 20 އަހަރުގެ ޖަލު ހުކުމް ހައިކޯޓުން އިއްޔެ ބާތިލް ކޮށްފިއެވެ.
މިއީ ކްރިމިނަލް ކޯޓުން އަސްލަމް ހަސަންގެ މައްޗަށް ސާބިތުވި، 20 އަހަރުގެ ޖަލު ހުކުމް ހައިކޯޓުގައި އިސްތިއުނާފު ކުރުމަށް އޭނާގެ ފަރާތުން ހުށަހެޅި މައްސަލައެކެވެ. މި މައްސަލައިގައި ދައުލަތުން އަސްލަމްގެ މައްޗަށް އުފުލާފައި އޮތީ ދެ ދައުވާއެކެވެ.
އެއީ ދިވެހިރާއްޖޭގައި އޮރިޔާންކާޑު ގެންގުޅުމުގެ ކުށުގެ ދައުވާގެ އިތުރުން، ކުޑަކުއްޖެއްގެ ޖިންސީ ގުނަވަނެއް ހާމަކޮށް ފެންނަ ގޮތަށް އޮރިޔާންކާޑު ހެދުމުގެ ދައުވާއެވެ. މި ދެ ދައުވާ އޭނާގެ މައްޗަށް ސާބިތުވާ ކަމަށް ކަނޑައަޅައި، ކްރިމިނަލް ކޯޓުން ވަނީ އޭނާގެ މައްޗަށް 20 އަހަރާއި އެއް މަހާއި ހަ ދުވަހުގެ ޖަލު އަދަބެއް ކަނޑައަޅައިފައެވެ.
އަސްލަމްގެ ފަރާތުން ހައިކޯޓުގައި މި މައްސަލ އިސްތިއުނާފުކުރިއިރު، އޭނާގެ ފަރާތުން ހުށަހަޅާފައިވަނީ ދެ ކަމެކެވެ. އެއީ ހައިކޯޓުން ފާހަގަކޮށްފައިވާ އުސޫލުތަކާއި ގާނޫނީ ސަބަބުތަކާ މުޅިން ޚިލާފަށް އޭނާގެ މައްޗަށް ދައުވާ ސާބިތުވާ ކަމަށް ކަނޑައެޅުމާއި، އުސޫލާ ޚިލާފަށް ކުށް ސާބިތުކޮށްފައިވާ ކަމަށް ބުނެ ފާހަގަ ކުރި ނުކުތާއެވެ.
މި މައްސަލަ ބެއްލެވި ފަނޑިޔާރުންގެ އިއްތިފާގުން ކުރި ހުކުމްގައިވަނީ އަސްލަމްގެ މައްޗަށް ކްރިމިނަލް ކޯޓުން ކުރި ހުކުމް އޭނާގެ މައްޗަށް ސާބިތުނުވާ ކަމަށެވެ. އެއީ ދައުލަތުން ހެކީގެ ގޮތުގައި ހުށަހެޅި ވީޑިއޯއިން ފެންނަނީ ކުޑަކުއްޖެއްކަން ދެނެގަނެވޭ ހެއްކެއް ހުށަހެޅިފައި ނެތަތީއެވެ.
ރާއްޖޭގައި އޮރިޔާން ކާޑު އުފެއްދުމުގެ ކުށަށް ދެވޭނެ އެންމެ ބޮޑު އަދަބަކީ ތިން މަސްދުވަހަށް ޖަލަށްލުމެވެ. އެހެން ނަމަވެސް ކުޑަކުއްޖެއްގެ ޖިންސީ ގުނަވަނެއް ހާމަކޮށް ފެންނަގޮތަށް އޮރިޔާންކާޑު ހެދުމުގެ ކުށުގެ އަދަބަކީ 20 އަހަރާއި 25 އަހަރާ ދެމެދުގެ ޖަލު އަދަބެކެވެ.