އައިކެއާއިން ނ. އަތޮޅުގެ ރަށްތަކުގައި ލޯ ސްކްރީން ކުރުމުގެ ހަރަކާތްތަކެއް ކުރިއަށްއެބަދެއެވެ.
މިދިޔަ މަހުގެ 28އިން ފެށިގެން ށ. އަތޮޅު ފޭދު، ފޯކައިދޫ، ކަނޑިތީމު، ކޮމަންޑޫ، ޅައިމަގު، މާއުނގޫދޫގެ އިތުރުން މިލަންދޫ ހިމެނޭގޮތަށް ކުރިޔަށްގެންދެވުނު މި ހަރަކާތުގައި 361 މީހުންންގެ ލޯ ސްކްރީން ކުރެވިފައިވާކަމަށް އައިކެއާއިން ހާމަކުރިއެވެ. އަދި މި ސްކްރީނިންތަކުން ލޮލުގެ ހާލަތު ދެނެގަނެ، ފަރުވާގެ ޚިދުމަތްތަކެއް ފޯރުކޮށްދެވުނުކަމަށް ވެސް އައިކެއާއިން ބުންޏެވެ.
ކޭމްޕުގެ ހަރަކާތްތައް ކުރިޔަށްގެންދަނީ ރަށްރަށުގެ ސިއްހީ މަރުކަޒުތަކާ ގުޅިގެންކަން ފާހަގަކޮށް، މި ގޮތަށް މަސައްކަތްކުރުމުގެ ބޭނުމަކީ ރައްޔިތުންނަށް ލޮލުގެ ފަރުވާގެ ޚިދުމަތްތައް ފަސޭހައިން ލިބޭނެ މަގު ތަނަވަސްކޮށްދިނުން ކަމަށް އައިކެއާއިން ބުންޏެވެ.
ށ. އަތޮޅަށް ފަހު މިހާރު އައިކެއާގެ ޓީމުން ސްކްރީނިން ކުރިއަށް ގެންދަނީ ނ. އަތޮޅުގައެވެ. އެގޮތުން އެ އަތޮޅު ވެލިދޫ، ހޮޅުދޫ އަދި ކެނދިކުޅުދޫގައި މިހާރު ސްކްރީނިންތައް ނިމިފައިވާކަން އައިކެއާއިން ވަނީ ފާހަގަކޮށްފައެވެ.
ކުރިއަށް އޮތް ދުވަސްތަކުގައި ލަންދޫގެ އިތުރުން މާފަރުގައި ސްކްރީނިންތައް ބޭއްވުމަށް އައިކެއާއިން ވަނީ ނިންމާފައެވެ. އެހެންކަމުން، ލަންދޫ އަދި މާފަރު ސިއްހީ މަރުކަޒައް ގުޅައިގެން އެޕޮއިންޓްމަންޓް ހެއްދޭނެއެވެ.