ހުޅުމާލޭގެ ދެވަނަ ފިޔަވަހީގައި ތަރައްގީކޮށްފައިވާ ވިނަރެސް ފްލެޓުތައް ގަނެފައިވާ ފަރާތްތަކަށް ކާރު ޕާކު ކުރުމަށް 154 ޖާގަ ބީލަމުގެ އުސޫލުން ދޫކުރުމަށް ނިންމައިފިއެވެ.
ހުޅުމާލޭގެ ބެލެނިވެރި ފަރާތް، ހައުސިން ޑިވަލޮޕްމަންޓް ކޯޕަރޭޝަން (އެޗްޑީސީ)ން މިއަދު ކުރި އިއުލާނެއްގައިވަނީ، ދޫކުރުމަށް ހަމަޖެހިފައިވާ 154 ޕާކިން ޖާގައިގެ ތެރެއިން 76 ޖާގަ ދޫކުރަނީ ވިނަރެސް އިމާރާތުގެ ތެރެއިން ކަމަށެވެ. ބާކީ 78 ޖާގަ ދޫކުރަނީ އިމާރާތުގެ ބޭރުންނެވެ.
މީގެ ތެރެއިން އިމާރާތުގެ ތެރެއިން ދޫކުރާ ޖާގަތައް ދޫކުރަން ހަމަޖެހިފައިވަނީ ކާރު ރަޖިސްޓްރީ ކުރެވޭ ގޮތަށެވެ.
ޕާކިން ޖާގައަށް އެދި ހުށަހެޅުމުގެ ޝަރުތުތަކުގެ ތެރޭގައި ހިމެނެނީ:
- ވިނަރެސް މަޝްރޫއިން ފްލެޓު ގަތުމުގެ އެއްބަސްވުމުގައި ސޮއިކޮށްފައިވާ މައި-އެޕްލިކަންޓް ކަމުގައިވުން
- ޑިސެންބަރު ފަހެއްގެ ނިޔަލަށް އެޗްޑީސީއަށް އެއްވެސް ފައިސާއެއް ދައްކަންޖެހި، އެ ފައިސާ ނުދައްކައިވާ ފަރާތެއް ކަމުގައިނުވުން
އެޗްޑީސީން އިއުލާންކޮށްފައިވާ ގޮތުން ކޮންމެ ފަރާތަކަށް ވެސް ދޫކުރެވޭނީ އެންމެ ޕާކިން ޖާގައެކެވެ. އަދި އެ ޖާގަ ހަމަޖެހޭނީ ފްލެޓު އެއްބަސްވުމުގެ ދަށުން ދޫކުރެވޭ ޖާގައެއްގެ ގޮތުގައެވެ.
އިމާރާތުން ދޫކުރާ ޕާކިން ޖާގަ: މި ޖާގަތަކަކީ ބީލަމުގެ އުސޫލުން ވިއްކާ ޖާގަތަކެކެވެ. މި ޖާގަތަކުގެ ބީލަން ފެށޭ އަގެއްގެ ގޮތުގައި ކަނޑައަޅާފައިވަނީ 650،000 ރުފިޔާއެވެ. ޖާގަ ގަންނަ ފަރާތްތަކަށް އެ ތަނުގައި ކާރު ރެޖިސްޓްރީ ކުރުމުގެ ހުއްދަ ދޫކުރުމަށް ހަމަޖެހިފައިވާއިރު، ބީލަމުގެ ޖުމްލަ އަގު ދެއްކުމަށް 30 ދުވަހުގެ މުއްދަތެއް ދޭނެ ކަމަށް އެޗްޑީސީން ބުނެއެވެ.
އިމާރާތުގެ ބޭރުން ދޫކުރާ ޕާކިން ޖާގަ: މި ޖާގަތަކަކީ ބީލަމުގެ އުސޫލުން ކުއްޔަށްދޭ ޖާގަތަކެކެވެ. މި ޖާގަތަކުގެ ބީލަން ފެށޭ އަގެއްގެ ގޮތުގައި ކަނޑައަޅާފައިވަނީ 2،000 ރުފިޔާއެވެ. ފަސް އަހަރުގެ މުއްދަތަށް މި ޖާގަ ކުއްޔަށް ދޭއިރު، ސެކިއުރިޓީ ޑިޕޮސިޓުގެ ގޮތުގައި ތިން މަހުގެ ކުލީގެ ފައިސާ ދެއްކުމަށް ހަތް ދުވަސް ދިނުމަށް ވަނީ ހަމަޖެހިފައެވެ. އެޗްޑީސީން ބުނީ މި ޖާގަތައް ދޫކުރެވޭނީ ހަމައެކަނި ޕާކިންގެ ބޭނުމަށް ކަމަށާއި، ކުއްޔަށް ދޫކުރާ ޖާގަތަކުގައި ކާރު ރެޖިސްޓްރީ ކުރުމުގެ ހުއްދަ ނުދޭނެ ކަމަށެވެ.
މި ކަމަށް ޝައުގުވެރިވާ ފަރާތްތަކުން ބީލަމުގެ އުސޫލުން ކާރު ޕާކިން ގަތުމަށް، ނުވަތަ ކުއްޔަށް ހިފުމަށް އެދި ހުށަހަޅަންޖެހޭނީ އޮންލައިންކޮށެވެ. އެ ގޮތުން އިންވެސްޓާ ރެޖިސްޓްރޭޝަން އަދި ޕްރޮޖެކްޓު ރެޖިސްޓްރޭޝަން ހުށަހެޅުމުގެ ފުރުސަތު މިއަދުން ފެށިގެން ޑިސެންބަރު ފަހެއްގެ ނިޔަލަށް އެޗްޑީސީން ވަނީ ހުޅުވާލައިފައެވެ.
މި ޕާކިން ޖާގަތަކުގެ ލޭއައުޓް ފޯމެޓާއި ބިޑް ސެކިއުރިޓީ ފޯމެޓުގެ އިތުރަށް، މި ކަމާ ގުޅޭ މައުލޫމާތު އެޗްޑީސީގެ ވެބްސައިޓުގައި ވަނީ އާންމުކޮށްފައެވެ.