ނ. ހޮޅުދޫގައި ބޮޑެތި ޒަޚަމްތަކަކާއެކު މަރުވެފައި އޮއްވައި ފެނުނު 50 އަހަރުގެ ޒަކިއްޔާ މޫސާގެ މަރުގެ މައްސަލައިގެ ތަހުގީގު ލަސްވާތީ އެކަމާ ކަންބޮޑުވުން ފާޅުކުރަން މުޅި ހޮޅުދޫ އެއްވެ އިންސާފު އަވަސްކުރަން ގޮވައިލައިފިއެވެ.
ޒަކިއްޔާ މަރުވެފައި އޮއްވައި ފެނުނީ މިދިޔަ ސެޕްޓެމްބަރު މަހުގެ 10ވަނަ ދުވަހުގެ ހެނދުނެވެ. އެހެންވެ، ހަމަ އެދުވަހު މާލޭން އެ މަރުގެ ތަހުގީގަށް ފުލުހުންގެ ޓީމެއް ދިޔައެވެ. އަދި ހަމަ އެެ ރޭގެ ވަގުތެއްގައި އިތުރު ތަހުގީގުތަކަށް އޭނާގެ ހަށިގަނޑު މާލެ ގެނައެވެ. ނަމަވެސް، ޕޯސްޓްމޯޓަމް ނަހަދައި، އެރަށަށް ފޮނުވާލައި ހޮޅުދޫގައި ވަނީ ޒަކިއްޔާގެ ހަށިގަނޑު ވަޅުލާފައެވެ.
ޒަކިއްޔާގެ މަރުގެ މައްސަލައިގައި އިންސާފު އަވަސްކުރަން ގޮވައިލައި ބޭއްވި އެއްވުން -- ފޮޓޯ/ ފޭސްބުކް، އަރީޝާ
މި މައްސަލައިގެ ތަހުގީގު ލަސްކަމަށް ބުނެ ހުރި ކަންބޮޑުވުންތައް ފާޅުކުރަން ރަށުގެ ކުދިބޮޑު އެންމެން މިއަދު ވަނީ އެއްވުމެއް ބާއްވައިފައެވެ. މި އެއްވުން ފަށައިފައި ވަނީ ހަވީރު 4:15ގައި އެރަށު ބޯޅަ ދަނޑުގައެވެ.
މި އެއްވުމާ ގުޅިގެން "ސަން"އަށް މައުލޫމާތު ދިން ހޮޅުދޫ މީހަކު ބުނީ، އެއްވުމުގައި ރަށުގެ ގިނަ އަދަދެއްގެ މީހުން ބައިވެރިވެފައި ވާކަމަށެވެ.
"އެންމެންގެ ވެސް އެންމެ ބޮޑު ކަންބޮޑުވުމަކީ ހަމަ އިންސާފު ލިބުން ލަސްވުން،" އޭނާ ބުންޏެވެ.
ކެޕްޝަން.. ޒަކިއްޔަ މަރުގެ މައްސަލައިގައި އިންސާފު އަވަސްކުރަން ގޮވައިލައި ބޭއްވި އެއްވުން -- ފޮޓޯ/ ފޭސްބުކް، އަރީޝާ
މި އެއްވުމުގައި ބައިވެރިވި އެންމެން ވެސް ތިބީ އެމީހުންގެ ޝުއޫރު ފާޅުކުރުމަށްޓަކައި ބެނާތަކާއި ކަރުދާސްތައް ހިފައިގެންނެވެ. އެ ކަރުދާސްތަކާއި ބެނާތަކުގައި ގާތިލު ހައްޔަރު ކުރުމަށް ގޮވައިލައިފައި ވެއެވެ.
އަދި ޒަކިއްޔާ މަރުވީ އަމިއްލައަށް ނޫން ކަމަށާއި އަމިއްލަ ނަފުސަށް އެވަރު އަނިޔާއެއް ނުދެވޭނެ ކަމަށް ބުނެ މިއަދު އެއްވުމުގައި ވަނީ އަޑު އުފުލައިފައެވެ. އެމީހުން ވަނީ ޒަކިއްޔަގެ މަރާ ގުޅިގެން ހެދި ތަހުލީލީ ރިޕޯޓުތައް ވެސް އާންމު ކުރުމަށް ގޮވައިލައިފައެވެ.
މުޅި ހޮޅުދޫ މިއަދު ހަވީރު ގޮވަމުން ދިޔައީ ޒަކިއްޔާ މަރުވީ އަމިއްލައަށް ނޫން ކަމަށެވެ. އަދި ތަހުގީގު އަވަސްކުރުމަށް ވަނީ ގޮވައިލައިފައެވެ.
ޒަކިއްޔާ މަރުވެފައި އޮއްވައި ކަރުން ޒަޚަމްތަކެއް ފެނުނުއިރު އޭނާގެ ކައިރި ވަޅިއެއް ވެސް އޮތްކަމަށް މީގެކުރިން "ސަން"އަށް މައުލޫމާތު ދިން ހޮޅުދޫ މީހަކު ވަނީ ބުނެފައެވެ.
މި ހާދިސާއާ ގުޅިގެން އެއްވެސް މީހަކަށް ޝައްކުކުރެވޭކަމަށް އަދި ފުލުހުން ހާމަކޮށްފައެއް ނުވެއެވެ.