ދިރާގު އޮރެންޖް ބޮކްސް މެޝް ވައިފައި މެދުވެރިކޮށް، ގޭގެ ހުރިހާ ދިމާލަކަށް ފަސޭހަކަމާއެކު ކަނެކްޓިވިޓީ ލިބޭނެ ކަމަށް އެ ކުންފުނިން ބުނެފިއެވެ.
ދިރާގުން ބުނީ އޮރެންޖް ބޮކްސް މެޝް ވައިފައި މެދުވެރިކޮށް ހަލުވި، މެދުކެނޑުމެއް ނެތް އިންޓަނެޓް ގޭގައި ތަޖުރިބާކުރުމަށް މަގުފަހިވާނެ ކަމަށެވެ. އެއީ ގޭގެ އިންޓަނެޓް ކަވަރޭޖް އަދި ސިގްނަލް ވަރުގަދަކޮށްދީ، އެކި ކޮޓަރިތަކާއި ފަންގިފިލާތަކަށް ހަލުވި ސްޕީޑްގެ ކަނެކްޓިވިޓީ ފޯރުކޮށްދިނުމަށް ފަރުމާކޮށްފައިވާ ޑިވައިސެއްގެ ގޮތުގައި އެ ކުންފުނިން ސިފަކުރެއެވެ.
ދިރާގުގެ ކަސްޓަމާ ވެލިއު މެނޭޖަރު ބްރޯޑްބޭންޑް އެންޑް ޑިވައިސަސް އަހުމަދު އިޝާން ވިދާޅުވީ ދިރާގު އޮރެންޖް ބޮކްސް މެޝް ވައިފައިއާއެކު ފައިބާ ބްރޯޑްބޭންޑް ކަސްޓަމަރުންނަށް ހަރުދަނާ އަދި ވަރުގަދަ އިންޓަނެޓް ކަނެކްޓިވިޓީ ލިބޭނެ ކަމަށެވެ.
"އެގޮތުން އެންމެ ބަލާ ހިތްވާ ޝޯތައް ސްޓްރީކޮށްލަން، އޮންލައިންކޮށް ގޭމުކުޅެލަން ނުވަތަ ގޭގެ ސްމާޓް ޑިވައިސްތައް މެނޭޖުކޮށްލަން ވިޔަސް މި ޑިވައިސްއާއެކު ގޭގެ ކޮންމެ ތަނެއްގައި ހުރެގެންވެސް ފަސޭހަކަމާއެކު އިންޓަނެޓާ ގުޅާލެވޭނެ،" އޭނާ ވިދާޅުވިއެވެ.
ދިރާގުގެ އިންސްޓޯލްމެންޓް ޕްލޭންތަކާއެކު މަހަކު 70 ރުފިޔާއަށް ދިރާގު އޮރެންޖް ބޮކްސް މެދުވެރިކޮށް ޚިދުމަތް ހޯދޭނެއެވެ. އެގޮތުން ދިރާގުގެ ފައިބާ ބްރޯޑްބޭންޑް ޚިދުމަތް މިހާރު ބޭނުންކުރާ ހުރިހާ ކަސްޓަމަރުންނަށް ވެސް ދިރާގު މައި އެކައުންޓް މެދުވެރިކޮށް މި އޮފާއަށް އެޕްލައިކުރެވޭނެއެވެ.
އެ ކަސްޓަމަރުންނާ އެންމެ ކައިރީގައި ހުންނަ ކަސްޓަމާ ސާވިސް ސެންޓަރަށް ދިޔުމުން އޮރެންޖް ބޮކްސް ޑިވައިސް ހޯދޭނެއެވެ.
ދިރާގު އޮރެންޖް ބޮކްސްއާ ބެހޭ އިތުރު މައުލޫމާތު ވެބްސައިޓުން ލިބޭނެއެވެ.