ގައުމީ ޔުނިވާސިޓީން މި އަހަރުގެ ދެވަނަ ޓާމުގައި ހުޅުވާލި ސްކޮލަޝިޕް ސްކީމުގެ ދަށުން 11 ދަރިވަރަކަށް އިއްޔެ ސްކޮލަޝިޕް ދީފިއެވެ.
މި ސްކޮލަޝިޕް ދީފައިވަނީ ދެވަނަ ޓާމުގައި އަލަށް ކުރިމަތިލި ކުދިންގެ ތެރެއިން, ތިން ގިންތިއަކުންނެވެ.
ޖުމުލަ 24 ފުރުސަތު ހިމެނޭ މި ސްކީމުގެ ދަށުން ތިން ގިންތިއަކުން ސްކޮލަޝިޕް ހާސިލްކުރީ މެރިޓް އުސޫލުން 10 ދަރިވަރަކަށާއި ޝަހީދު އެވޯޑު ސްކީމުގެ ދަށުން އެއް ދަރިވަރެކެވެ.
އެމްއެންޔޫއިން ބުނި ގޮތުގައި، މި ސްކީމުގައި ހިމެނެނީ ޓިއުޝަން ފީ ހިލޭ ސްކޮލަޝިޕް، އަންޑަގްރެޖުއޭޓެޑް ސްކޮލަޝިޕާއި ޕޯސްޓް ގްރެޖުއޭޓް ސްކޮލަޝިޕް އެވެ.
މިގޮތުން، ޓިއުޝަން ފީ ހިލޭ ސްކޮލަޝިޕް ސްކީމަށް މި ސެމިސްޓާގައި 20 ފުރުސަތަށް 51 ދަރިވަަރަކު ކުރިމަތިލާފައިވާއިރު، އަންޑަގްރެޖުއޭޓް ފުލް ސްކޮލަޝިޕް ސްކީމަށް ހުޅުވާލި ދެ ފުރުސަތަށް އެދި 33 ދަރިވަރަކު ހުށަހަޅާފައިވާ ކަމަށް އެ ޔުނިވާސިޓީން ބުނެއެވެ.
ޕޯސްޓް ގްރެޖުއޭޓް ފުލް ސްކޮލަޝިޕް ސްކީމްގެ ދަށުން ދެ ފުރުސަތަށް 15 ދަރިވަރަކު ހުށަހަޅާފައިވާ ކަމަށާއި ޝަހީދު އެވޯޑު ސްކީމުން ހުޅުވާލީ ހަތަރު ފުރުސަތަށް ތިން ދަރިވަރުން ހުށަހަޅާފައިވާ ކަމަށް އެމްއެންޔޫއިން ބުނެއެވެ.
އެމްއެންޔޫއިން ބުނި ގޮތުގައި، ސްކޮލަޝިޕް ސްކީމަކީ އެ ޔުނިވާސިޓީގެ ކައުންސިލުން ތައާރަފްކުރި ސްކީމެއް ކަމަށާއި މި ސްކީމުގެ ދަށުން ސްކޮލަޝިޕަށް ޚަރަދު ހަމަޖައްސަނީ ޔުނިވާސިޓީއަށް ލިބޭ އާމްދަނީއިން ކަމަށެވެ.
ޝަހީދު އެވޯޑަކީ 3 ނޮވެމްބަރު 1988ގައި ޝަހީދުވި ޝަހީދުންގެ ޒިކުރާ އާކުރުމުގެ ގޮތުން ރައީސް އޮފީހުން 1999 އަކުން ފެށިގެން އެމްއެންޔޫގެ ހަތަރު ފެކަލްޓީގައި ހިންގާ އެންމެ މަތީ ފެންވަރުގެ ކޯހުގެ ތެރެއިން ފުރަތަމަ ސެމިސްޓާގައި އެންމެ ރަނގަޅު ނަތީޖާ ހާސިލުކުރާ ދަރިވަރުންނަށް ދޭ އެވޯޑެކެވެ.