ނ. ހޮޅުދޫގައި ބޮޑެތި ޒަޚަމްތަކަކާއެކު މަރުވެފައި އޮއްވައި ފެނުނު 50 އަހަރުގެ ޒަކިއްޔާ މޫސާގެ މައްސަލައިގައި ތަހުގީގު ލަސްވާތީ، އެކަމާ ކަންބޮޑުވުން ފާޅުކުރުމަށް މާދަމާ އެއްވުމެއް ބާއްވަން ހޮޅުދޫ ރައްޔިތުން ނިންމައިފިއެވެ.
ޒަކިއްޔާ މަރުވެފައި އޮއްވައި ފެނުނީ މިދިޔަ ސެޕްޓެމްބަރު މަހުގެ 10 ވަނަ ދުވަހުގެ ހެނދުނެވެ. އެހެންވެ، ހަމަ އެދުވަހު މާލޭން އެ މަރުގެ ތަހުގީގަށް ފުލުހުންގެ ޓީމެއް ދިޔައެވެ. އަދި ހަމަ އެެ ރޭގެ ވަގުތެއްގައި އިތުރު ތަހުގީގުތަކަށް އޭނާގެ ހަށިގަނޑު މާލެ ގެނައެވެ. ނަމަވެސް، ޕޯސްޓްމޯޓަމް ނަހަދައި، އެރަށަށް ފޮނުވާލައި ހޮޅުދޫގައި ވަނީ ޒަކިއްޔާގެ ހަށިގަނޑު ވަޅުލާފައެވެ.
އެ މައްސަލައިގައި ތަހުގީގު ލަސްވާތީ، މާދަމާ ހަވީރު 4:15ގައި އެރަށު ބޯޅަދަނޑުގައި ވަނީ އެއްވުމެއް ބާއްވަން ނިންމާފައެވެ.
މި މަރާ ގުޅުވައި "ސަން"އާ ވާހަކަދެއްކި ހޮޅުދޫ މީހަކު ބުނީ، އެއްވުން ބާއްވަނީ ޒަކިއްޔާ މަރުވީ އަމިއްލައަށް ނޫން ކަމަށް ގަބޫލުކުރެވޭތީ އެކަމާ ގުޅުން ހުރި ޝުއޫރުތައް ފާޅުކުރަން ކަމަށެވެ.
ޒަކިއްޔާގެ މަރުގެ މައްސަލައިގައި ތަހުގީގު ލަސްވާތީ، އެކަމުގެ ކަންބޮޑުވުންތައް ފާޅުކުރަން މާދަމާ އެއްވުމެއް ބާއްވަން ހޮޅުދޫ ރައްޔިތުން ވަނީ ނިންމާފައި ----
"މިކިޔަނީ މަރެއްގެ ވާހަކަ. މީހަކަށް ތުހުމަތެއް ނުކުރެވޭ، ލޮލަށް ނުފެންނަ ކަމަކާ ގުޅިގެން އަސްލު އަމިއްލަ މަރެކޭ ބުނާތީ، އެއްވެސް ލޮލަކަށް ނުފެންނަ ކަމެއްގައި އަމިއްލަ މަރެއް ކަމަށް ނުއެއް ނިންމޭނެ ދެއްތޯ. އެއީ އަސްލު އިން އެންމެ ބޮޑު ކަންބޮޑުވުމަކީ،" އެ މީހާ ބުންޏެވެ.
ޒަކިއްޔާ މަރުވެފައި އޮއްވައި ކަރުން ޒަޚަމްތަކެއް ފެނުނުއިރު އޭނާގެ ކައިރި ވަޅިއެއް ވެސް އޮތްކަމަށް މީގެކުރިން "ސަން"އަށް މައުލޫމާތު ދިން ހޮޅުދޫ މީހަކު ވަނީ ބުނެފައެވެ.